Read Tzotzil 2 Reyes 1 Bible Online

2 Reyes 1 - Tzotzil bible

2 Reyes 1

¹C'alal cham xa ti Acabe, lic stoy sba ta stojol Israel ti Moabe.

²Ti Ocoziase balch'uj yalel ta ventana ta xcha'cojal sna ti oy ta Samariae. Toj yayijel c'ot ta j'ech'el. Va'i un, laj stac' ech'el j'al-mantal j'ich'-c'op ta sjaq'uel sba ta stojol ti Baal-zebub dios yu'un ti Ecrone yo' jech ta sna' mi ta to xcol ta xlecub.

³Ja'uc ti yaj'ánjel Diose xi laj yalbe ya'i ti Elías ti liquel talel ta Tisbee: “Batan, ba nupo ta be ti yaj'al-mantal j'ich'-c'op ti ajvalil ta Samariae. Jac'bo ya'i mi mu'yuc xa Dios yu'un ti Israele ti ta sjac' sba ta stojol ti Baal-zebub dios yu'un ti Ecrone.

⁴Albo ya'i xtoc ti vu'un Diosune xi ta xcalbe ya'i ti Ocoziase: ‘Ma' ti jech puch'ulot ta atem le' une, mu xa xatam aba. C'ajomal no'ox ta xacham.’ ” Ti Eliase bat. Jech laj spas jech c'u cha'al albate.

⁵C'alal sutic talel ti j'al-mantal j'ich'-c'opetic ta stojol ti ajvalile, xi jac'batic yu'une: —¿C'u cha'al lasutic talel un?

⁶Xi laj stac' ti stuquique: —Laj jnupcutic ta be jun vinic ti laj yalbuncutic ti sutcuncutic talel ta stojol ti ajvalil ti laj stacuncutic batele, ti xi la calbecutic ya'ie: ‘Xi ta xal ti Diose: ¿Mi ch'abal Dios yu'un ti israeletic yo' jech ta sjac' sba ta stojol ti Baal-zebub dios yu'un ti Ecrone? Ti jech yacalot ta spasel le'e, mu xa xatam aba ti puch'ulot ta ateme. C'ajomal no'ox ta xacham.’

⁷Xi jac'batic yu'un ti ajvalile: —¿C'u s'elan ya'yel ti vinic ti loc' talel snupoxuc ta be ti va'i s'elan laj yalboxuc taje?

⁸Xi laj staq'uic ti stuquique: —Jun vinic ti lec pim stsotsil ti smacobil sic yu'une, xchuquinoj nucul. —¡Ma' taje, ja' ti Elías ti liquel talel ta Tisbee! —xi avan ti ajvalile.

⁹Ta jech yepal laj stac batel ta stojol Elías jun banquilal soldado xchi'uc ech'el lajuneb yoxvinic (50) ta vo' soldadoetic. C'alal c'otique, ti Eliase chotol ta jun toyol lican ch'entic ti ta vitse. Va'i un, xi albat yu'un ti banquilal yu'un ti soldadoe: —¡J'alc'op, ti ajvalile ta xalbot ava'i mantal ti yalan talel ta anil ti vi to bu oyote!

¹⁰Xi albatic yu'un ti Eliase: —Jech, j'alc'opun, yaluc talel c'oc' ta vinajel. Xchic'ot ava'i xchi'uc ti lajuneb yoxvinic (50) ta vo' avajsoldadotaque. Ta jech no'ox yepal, yal talel c'oc' ta vinajel. Chamic ta c'oc' scotolic.

¹¹Laj taj une, jech ti ajvalile laj stac ech'el yan jpas-mantal yu'un ti soldadoe. Laj yic' ech'el yan lajuneb yoxvinic (50) ta vo' soldadoetic. Va'i un, xi laj yalbee: —¡J'alc'op, ti ajvalile ta xalbot ava'i mantal ti yalan talel ta anil ti vi to bu oyote!

¹²Ti Eliase xi laj staq'ue: —Jech, j'alc'opun, yaluc talel c'oc' ta vinajel. Xchic'ot ava'i xchi'uc ti lajuneb yoxvinic (50) ta vo' avajsoldadotaque. Ta jech no'ox yepal, yal talel c'oc' ta vinajel. Va'i un, chamic scotolic.

¹³Ta yoxibal xa velta un, ti ajvalile laj to stac batel yan banquilal yu'un ti soldadoe, xchi'uc yan lajuneb yoxvinic (50) ta vo' soldadoetic. Ja' no'ox un, ti yoxibal banquilal jpas-mantal yu'un ti soldadoetique, muy batel ti bu to c'alal oy ti Eliase. Xi laj sc'anbe vocol ti xquejelet ta stojole: —Avocoluc, j'alc'op, c'uxubajuc avo'nton cu'un xchi'uc ti lajuneb yoxvinic (50) ta vo' soldadoetic li'e, ti ja' avajtuneltaque.

¹⁴Yu'un ti banquilal jpas-mantaletic yu'un ti soldadoetic ti tacbilic talel ta ba'yele, lajic ta c'oc' xchi'uc ti yajsoldadotac ti jujune. Jech ti vu'une ta xajc'anbot vocol ti c'uxubajuc avo'nton cu'une.

¹⁵Ja' yu'un un, ti yaj'ánjel Diose xi laj yalbe ya'i ti Eliase: —Chi'ino batel. Mu xaxi' yu'un. Jech ti Eliase yal talel ti bu oye. Laj xchi'in batel ti banquilal jpas-mantal yu'un ti soldadoe yo' jech ta xbat ta stojol ti ajvalile.

¹⁶Va'i un, xi laj yalbe ya'ie: —Xi ta xal ti Diose: ‘Ti jech laj atac batel avinictac ta sjaq'uel aba ta stojol ti Baal-zebub sdiosic ti Ecrone, ti laj apas aba ti co'ol xa s'elan yilel ti ch'abal sDiosic ti israeletic yo' jech ta xajac'bee, ja' yu'un un, mu xa xatam aba ti jech puch'ulot ta ateme. Ta xacham.’

¹⁷Melel, cham ono'ox ti Ocoziase jech c'u cha'al laj yal ono'ox ti Dios ta sventa ti yaj'alc'op Eliase. Ti jech mu'yuc ono'ox xnich'on ti Ocoziase, ja' och ta xq'uexol ta ajvalilal ti sbanquile, ti ja' sbiinoj Jorame. Ti jech taje, ja' xa xchibal jabil yochel ta ajvalilal ti Jorame, ti ja' xnich'on ti Josafat ta Judae.

¹⁸Ti jech oy to ya'yejal slo'iltael ti Ocoziase, xchi'uc ti c'usitic laj spase, ts'ibabil ta jpoc svunal yabteltac ti ajvaliletic yu'un ti Israele.