Read Tzotzil 2 Reyes 10 Bible Online

2 Reyes 10 - Tzotzil bible

2 Reyes 10

¹Ti Acabe, oy lajuneb xchanvinic (70) ta vo' xnich'nab ta jteclum Samariae. Jech o xal ti Jehue laj sts'iba batel vun ta stojol ti j'abteletique, ta stojol ti moletique, xchi'uc ta stojol ti buch'utic sbisoj sbaic ta totil yu'un xnich'nab ti Acab ta jteclume, ti xi laj yal ti vune:

²“Ti jech oy ta avoc ta ac'obic xnich'nab ti avajvalique, jech c'u ch'al ti sca'taque, ti scarretatac sventa ac'ob-letoe, ti pojobbail jteclume, ti abtejebaletique, ti c'alal ta xc'ot ta avoc ta ac'obic ti ts'ibabil vun li'e,

³a'yio ava'iic lec. T'ujic junuc xnich'on ti avajvalic ti lec baxbole, ti xtojob leque. Chotanic ta spasob mantal ti stote. Tsatsajanic ta spacbel sc'oplal ti avajvale.”

⁴Ep xi'ic yu'un ti va'i s'elan taje, ti xi laj yalbe sbaique: “¿Mi yu'un vo'otic xa la xu' cu'untic ta spojel ti c'alal mu'yuc c'usi bal o laj ya'i ti cha'vo' ajvaliletic ti laj stsac sbaic ta leto xchi'uque?”

⁵Va'i un, ti buch'u ich'bil ye sti' ti bu chotol ta spas mantal ti ajvalile, ti ajvalil yu'un ti jteclume, ti moletique, xchi'uc ti buch'utic c'otem ta xq'uexol totil sbisoj sbaique, xi laj yalic ti laj stac'beic batel mantal ti Jehue: “Mu stac' ma' ti toyol cajal xa ti quecutic ta atojol une. Chapaluncutic ta spasel ti c'usi ta xac'ane. Ja'uc le' une, mu'yuc buch'u junuc ta jva'ancutic ta ajvalil. Paso ti c'usi lec ta xava'i ta xac' ti ajol ta spasele.”

⁶Ti Jehue laj sts'iba batel xchibal velta vun ta stojolic ti xi ta xale: “Mi co'ol jol co'ntontique, mi ta xach'unic ti jmantale, tsobbeicun talel sjol xnich'nabtac ti avajvalique. Jech ora oc'om li'e, xtal aq'uelicun li' ta Jezreele.” Ti lajuneb xchanvinic (70) ta vo' squeremtac ti ajvalile, oyic ta stojol ti buch'utic caj tsacal xa'i sbaic ta jteclum ti c'otemic ta jts'itesvanej yu'unique.

⁷C'alal laj yich'ic ti ts'ibabil vune, laj stsobic talel ti lajuneb xchanvinic (70) ta vo' queremetique, laj smilic. Ta jech yepal laj stic'beic ech'el sjol ta jun chib moch ti laj staquic batel c'alal Jezreel.

⁸C'alal c'ot ti j'al-mantal j'ich'-c'op ta stojol ti Jehue, xi laj yale: —Laj xa yich'beic talel sjol xnich'nabtac ti ajvalile. Xi laj yal mantal ti Jehue: —Busanic ta cha'bus ta ochebal sti' ti jteclume. Busanic comel, oc'om to jq'ueltic.

⁹Ta yoc'omal un, loc' batel ti Jehue. Xiq'uil lec sva'anoj sba ti xi laj yalbe ya'i scotol ti jteclume: —Ma'uc amulic ma' ti vo'oxuc le'e. Yu'un vu'un laj jpaybe sc'oplal ti cajval ti laj smilique. Ja'uc le' une, ¿buch'u abolaj ta smilel scotol le' une?

¹⁰Na'ic lec, ti c'u s'elan laj slo'iltabe sc'oplal xnich'nabtac Acab ti Diose, mi ja'uc stselbuj ma' ti mu xc'ot ta pasele. Ja' laj spas stuc ti Dios jech c'u cha'al laj scaj'albe ti Elías ti yajtunele.

¹¹Ti Jehue laj smilbe scotol ti c'u to yepal oy yalab xnich'nab ti Acab ta Jezreele. Lajic xtoc scotol ti buch'utic ich'bil ye sti'ique, ti buch'u lec xil sbaic xchi'uque, xchi'uc ti paleetic yu'unique. Mi junuc ti cuxul laj yicta comele.

¹²Laj taj une, laj stam ech'el sbe ta Samaria. C'ot ta Bet-equed ti bu nopem xa'iic xc'ot svol sbaic xchi'uc xchij ti j'il-chijetique.

¹³Ti bu taje, laj snup ta be xchi'iltac ta voq'uel ti Ocozías, ajvalil yu'un ti Judae. Xi jac'batic yu'un ti Jehue: —¿Buch'uoxuc le' xcal une? Ti stuquique xi laj staq'uique: —Xchi'iluncutic ta voq'uel ti Ocoziase, ti tal jvu'lancutic xnich'nabtac ti ajvalile. Yalabtac ti me' ajvalile.

¹⁴Va'i un, ti Jehue xi laj yalbe mantal ti c'u yepal xvoletic batel ta stojole: —Abolajanic, ac'o sts'ic xch'a svocol avu'unic le'e. Jliquel xa xvic'lajan ti satique. Yu'un naca xc'ocbat no'ox snuq'uic yu'un ti buch'u xvoletic xchi'uc ti Jehue ta sts'el joc' ta Bet-equed ti bu nopem xa'iic xc'ot svol sbaic xchi'uc xchij ti j'il-chijetique. Mi junuc cuxul laj yictaic comel ti chib yoxvinic (42) ta vo' viniquetic ti oyic ta scotolique.

¹⁵C'alal loc' batel ti Jehú ti bu taje, laj snup ta be ti Jonadab xnich'on ti Recabe, ti bat q'uelatuc yu'une. Xi laj yal ti Jehú ti laj sc'opon sbaique: —¿Mi atamoj talel stuq'uil ta jtojol jech c'u cha'al jtamoj stuq'uil jol co'nton ta atojole? —Ja' jech —xi laj stac' ti Jonadabe. —Ti mi jech taj un cha'e, jtsacbe jba jc'obtic quere —xi ti Jehue. Ti Jonadabe laj yac' ti sc'obe. Nitbil muy ta carreta yu'un ti Jehue.

¹⁶Xi lic yalolanbee: —Chi'inun batel, ta xavil ta aba ta asat ti c'u s'elan mu jc'an soquesbe sc'oplal ti Diose. Ja' yu'un un, laj xcuch batel ta scarreta.

¹⁷C'alal och ech'el ta jteclum Samaria ti Jehue, laj smil scotol ti snitilultac ti Acab ti cuxul to ox comique. Laj stsutsesbe sc'oplal ta j'ech'el jech c'u cha'al caj'albil yu'un Dios ti Eliase.

¹⁸Laj taj une, ti Jehue xi laj yal ti c'alal laj stsob scotol ti jteclume: —Ti Acabe, jutuc no'ox laj spasbe stoyel xi'el ti Baale. Ja'uc ti vu'une x'ech' to yutsil ta jpasbe ti stoyel xi'ele.

¹⁹Ja' yu'un un cha'e, taic talel ta iq'uel scotol yaj'alc'optac ti Baale, ti buch'utic xnijilet xchimiletic ta stojole, xchi'uc ti paleetic yu'une. Mi ja'uc junuc ti buch'u mu xvule, ja' ti chapal xa cu'un ti milbil matanal ta sventa yich'el ta muc' ti Baale. Yan ti buch'u mu xvule, ta xich' milel. Ja' no'ox un, ti Jehue lo'lael ti va'i s'elan xchapanoj leque yo' jech ta stsutsesbe sc'oplal ti buch'utic lec xa'iic spasel stoyel xi'el ti Baale.

²⁰Jech o xal laj scaj'al mantal ti ac'o yich' pasbel sq'uinal smuyubtael ti Baale, ti jech laj yich' pasele.

²¹Laj taj une, laj stac batel j'al-mantal j'ich'-c'opetic ta sjunul ti lum Israele. Scotol ti buch'utic lec xa'iic ta yich'el ta muc' ti Baale, c'otic ta ch'ulna. Mi junuc ma' ti buch'u mu'yuc xc'ote. Noj ta jujujot xocon xch'ulna ti Baale.

²²Jech ti Jehu une laj yalbe mantal ya'i ti buch'utic sbainojic ta xchabiel ti jtunelal c'u'iletic ti ac'o sloq'ues sventa ta slapic scotol ti buch'utic lec xa'iic ta snijanel xchimanel sbaic ta smuyubtael ti Baale. Ti buch'u yich'oj ta sventa ti c'u'ile, ja' jech laj spasic.

²³Ta jech yepal ec un, och ech'el ta xch'ulna Baal ti Jehue, ti Jonadabe. Ti Jehue xi laj yalbe scotol ti jmuyubtaej Baale: —Tuc'ulanic lec ti mu'yuc junuc ti capal ta x'och batel ti buch'utic ta snijan xchiman sbaic ta stojol ti Diose. Ja'uc no'ox ochuc batel ti c'u yepal lec xa'iic stoyel xi'el ti Baale.

²⁴Jech ti buch'utic lec xa'iic stoyel xi'el ti Baale, ochic batel ta ch'ulna yo' jech ta xaq'uic ti milbil matanale, ti chic'bil matanale. C'alal jech syaquelique, ti Jehue laj xchapan chanvinic (80) ta vo' viniquetic ta pana ti xi laj scaj-bijubtase: —Ti buch'u ta xcol batel yu'un junuc ti viniquetic ti laj cac' ta avoc ta ac'obique, ta xich' ta j'ech'el ec.

²⁵C'alal laj yo'ntonic ta yaq'uel ti chic'bil matanale, jech ti Jehue xi laj yalbe mantal ti yajsoldadotaque, xchi'uc ti banquilaletic yu'un ti jujuvoc' soldadoetique: —¡Ochanic batel, milic ya'iic ta j'ech'el, ti mu xcol junuque! Svinictac ti Jehue laj smilic ta espada ti c'u yepal oyique. Laj sjipic loq'uel ti bu oye. Ts'acal to un, ochic batel ta yut xch'ulna ti Baale.

²⁶Laj sloq'uesic talel ti c'usitic sbisojic ta ch'ul loc'obbailetic ti va'ajtique, laj xchiq'uic.

²⁷Laj sjinesic yalel ta lum ti altare, xchi'uc xch'ulna ti Baale. Laj sjoybinic ta paxyajebal scotol, ti jech to stunel yu'unic avi tana le'e.

²⁸Ja' jech laj xch'aybe sc'oplal Baal ti Jehu ta Israele.

²⁹Manchuc mi jech un, mu'yuc laj yicta sba ta spasel chopol jech c'u cha'al laj spas chopol ti Jeroboam xnich'on ti Nabote, ti laj sta smul yu'un ti israeletique, ti staoj yav ta spasbel stoyel xi'el ti loc'obbail vacax oro ti oy ta Dane, xchi'uc ti ta Betele.

³⁰Ti Diose xi laj yalbe ya'i ti Jehue: “Ti jech lec avabtel laj apas ta jtojole, ti lec bat ta nopel avu'un ta jba ta jsate, ti jech laj apas ta stojol xnich'nab Acab jech c'u cha'al jnopoje, jech ti anich'nabtaque ta x'ochic ta ajvalil ti ta xc'ot c'alal to xchanq'uexel ti totil me'iletique.”

³¹Manchuc mi jech taj une, ti Jehue mu'yuc laj svul yo'nton xchi'uc ti jbeluc sc'oplal ti c'otuc ta pasel yu'un ti oy c'usi jbel albil yu'un ti Ajvalil Dios yu'un ti Israele. Mu'yuc laj yicta sba ta spasel jech c'u cha'al laj spas ti Jeroboam ti laj sta smul yu'un ti israeletique.

³²Ti jech yorail ta vo'ne taje, ja' o lic tuch'ilanbatuc yosil sbanomilic ti Israeletic yu'un ti Diose. Xi s'elan lic tsacaticuc ta leto ti Israel yu'un Hazael ta jujun sts'aquique:

³³Lic ta stuq'uil sloq'ueb c'ac'al yu'un ti Jordane, ta scotol yosilal ti Galaade, ta yosilal ti Gade, ta yosilal ti Rubene, xchi'uc ta yosilal ti Manasese. C'ot c'alal to Areor ti oy ta sti'il uc'um Arnone. Laj yu'nin ec ti Galaade xchi'uc ti Basane.

³⁴Ti c'u yepal slo'il ya'yejale, xchi'uc scotol ti c'usi laj spas ti Jehue, ti c'u s'elan cuch yu'une, ts'ibabil com ta jpoc svunal slo'il yabteltac ti ajvaliletic yu'un ti Israele.

³⁵C'alal cham xa une, laj yich' muquel ta Samaria. Och ta xq'uexol ta ajvalilal ti Joacaz ti xnich'one.

³⁶Ti Jehue, vo'ob xcha'vinic (25) jabil sjalil och ta ajvalilal ta jteclum Samaria ti oy ta Israele.