Read Tzotzil 2 Reyes 11 Bible Online

2 Reyes 11 - Tzotzil bible

2 Reyes 11

¹Ti Atalía sme' ti Ocoziase, c'alal laj ya'i cham xa ti yole, lic sjol ti bat stsutsesbe sc'oplal ta j'ech'el yalab xnich'nab ti ajvalile.

²Ja'uc ti Josebae, stseb ti ajvalil Jorame, xchi'il ta voq'uel ti Ocoziase, laj xch'ac loq'uel ti Joás ti capal ta stojol ti yan xnich'nabtac ti ajvalil ti ta xich'ic milele. Mu'yuc xtae ta ilel yu'un ti Atalía jmoj bat naq'ueuc ta jbej vayebal na jmoj xchi'uc ti jts'itesvanej yu'une. Ja' jech mu'yuc xtae ta milel.

³Ti Joase, vaquib (6) jabil xnaq'uet xchi'uc ti jts'itesvanej yu'un ta xch'ulna ti Diose. Ja'uc ti Atalía une lic spas mantal ti ta jteclume.

⁴Ta yucubal jabil une, ti Joiadae laj stac ta iq'uel ti banquilaletic yu'un ti jujuvoc' soldadoetique, ti cereteoetique, xchi'uc ti jchabivanejetique. Ochic batel yu'un ta xch'ulna ti Dios ti bu tiq'uil ti Joase. Laj yac' strate ta stojolic ta sba ta sat ti Dios ti bu taje. Lic yac' ta ilel ti ch'in ajvalil Joase.

⁵Ta jech to yepal, xi lic yalanbe ya'i ti mantale: “Xi s'elan sc'an ta xapasic ti vo'oxuc jech c'u cha'al li'e: Ti jch'ac ta oxch'ac ti vo'oxuque, sc'an oyoxuc ta chabivanej ta chapanobbail ti ta sc'ac'alil cuxob o'ntonale.

⁶Ti jch'ac ta oxch'aque ta xbat svol sbaic ta ochebal Shur sbie. Ti jch'ac ta oxch'aque ta xbat svol sbaic ta loq'uebal sti' ti bu volol ti jvoc' soldadoetique. Ja' jech ta xa'ech'ic ta chabivanej ta jujuchop ti ta pasob mantale.

⁷Ti jcha'ch'ac ti ta xloq'uic ech'el ta sc'ac'alil cuxob o'ntonale, jmoj ta xbat svol sbaic xchi'uc ti jchabivanejetic ta xch'ulna Dios ti bu oy ti ajvalile.

⁸Ti vo'oxuque, joyoloxuc ta spat xocon ti ajvalil ti chapalucoxuc xchi'uc avabtejebic ti jujune. Ti buch'u ta xch'ic sba ochel ti bu chololoxuque, ta xich' milel. Buyuc no'ox ta xbat ti ajvalile, ta xachi'inic batel.”

⁹Ti banquilaletic yu'un ti jujuvoc' soldadoetique, jech laj spasic scotol jech c'u cha'al albatic yu'un ti pale Joiadae. Ta jujunic lic svol ti sviniquique jech c'u cha'al ti jvoc' ti ta xchabivanic ta sc'ac'alil cuxob o'ntonale, jech c'u cha'al ti buch'utic ta xloq'uic batele. Jech bat sva'an sbaic ta stojol ti pale Joiadae.

¹⁰Va'i un, ti pale laj yac'be jelavel ti banquilaletic yu'un ti jujuvoc' soldadoetic ti lanzaetique, xchi'uc ti macobbailetic ti laj to ox stunes ti ajvalil David ti q'uejbil ta xch'ulna ti Diose.

¹¹Jech ti jchabivanejetique batic ti bu ac'bat yavilic ti smacojic lec ta jujujot ti oy ta bats'i c'obe, ti ta ts'et c'ob yu'un ti ch'ulnae, xchi'uc ti ta sjoylej ti altare. Ti jujunique chapalic lec xchi'uc yabtejebic yo' jech ta xchabiic ti ajvalile.

¹²Va'i un, ti Joiada une laj yic' loq'uel talel xnich'on ti ajvalile. Laj yac'be slap ti sronail sjole, xchi'uc ti yan senyailtac svinajeb ti c'ot xa ta ajvalile. Laj yich' cocanbel ti aceite ta sjole. Lic yich' albel ti ja' xa ajvalile. Ts'acal to un, scotolic laj sbaj sc'obic ti xi lic avanicuque: “¡Ajvalil xa!”

¹³C'alal laj ya'i ti Atalía ti x'avlajet xa ti jchabivanejetique xchi'uc ti jteclume, bat ta xch'ulna ti Dios ti bu tsobol scotolique.

¹⁴Ti bu taje, laj yil ti va'al ti ajvalil ta yoc muc' ta oy jech c'u cha'al liquem ono'ox yu'unic ta spasele. Ti ta jujujot xocone, va'ajtic ti banquilaletic yu'un ti jujuvoc' soldadoetique, xchi'uc ti epal jtij-vobetique, ti xmuyubajic no'ox ta xoq'uisanic oq'ues ti jteclume. Va'i un, ti Ataliae xi laj yal ti laj xch'i' ta jatel ti sc'u'e: —¡J'ac'vanej ta vocol! ¡J'ac'vanej xa ta vocol!

¹⁵Ja'uc ti pale Joiadae xi laj yalbe ya'i mantal ti banquilaletic ti oy ta yoc ta sc'obic ta spasel ta mantal ti soldadoetique: —Chechic loq'uel ya'i le'e ti jech li' capale. Jmoj ac'o yich'ic milel ta espada xchi'uc ti buch'u co'ol sjolique. Ti jech yaloj xa ono'ox ti palee, ti mu smilic ta yut xch'ulna ti Diose,

¹⁶laj xchuquic loq'uel. Laj xchechic batel ta ochebal sti' ti scotleb ca'etic ti oy ta chapanobbail yu'un ti ajvalile. C'ot smilic ti bu taje.

¹⁷Ts'acal to un, ti Joiadae laj sliques jun trate ta stojol ti Diose, ta stojol ti ajvalile, ta stojol ti jteclume, ti ta xc'otic ta steclumal ti Diose, xchi'uc ta stojol ti ajvalil xchi'uc ti jteclume.

¹⁸Laj taj une, scotol batic ta xch'ulna ti Baale ti laj slilinic ta lomesele. Laj slilinic ta lomesel ta j'ech'el ti altaretique xchi'uc ti loc'obbailetique. Ja'uc ti Matán yajpale ti Baale, laj sc'ocbeic snuc' ta sts'el ti altaretique. Ta jech no'ox yepal un, ti palee lic sva'anan jchabivanejetic ta xch'ulna ti Diose.

¹⁹Ts'acal to un, lic stsob ti baquilaletic yu'un ti soldadoetique, ti sereteoetique, ti jchabivanej soldadoetique, xchi'uc scotol ti jteclume. Jmoj xvoletic loq'uel scotolic ta xch'ulna ti Diose, ti xchi'inojic batel c'alal to chapanobbail yu'un ti ajvalile. Ochic batel ta ti'na ti bu oy ti jvoc' jchabivanej soldadoetique. Choti ta chapanobbail ti Joase.

²⁰Xmuyubajic no'ox scotol ti jteclume. Ti jech laj xa ta milel ta espada ti Atalía ta chapanobbaile, ja' to jech mu'yuc xa c'usi sna' com ti jteclume.