Read Tzotzil 2 Reyes 14 Bible Online

2 Reyes 14 - Tzotzil bible

2 Reyes 14

¹Ta xchibal xa jabil yochel ta ajvalilal ti Joás xnich'on ti Joacaz ajvalil yu'un ti Israele, jech ti Amasías xnich'on ti Joase, ja' o lic ochuc ta ajvalilal ta Judá.

²Yich'oj xa vo'ob xcha'vinic (25) jabil ti Amasías c'alal lic ochuc ta ajvalilale. Baluneb xcha'vinic (29) jabil laj spas ajvalilal ta Jerusalene. Joadán sbi ti sme'e, liquel ta Jerusalén.

³Ti c'usitic laj spas ti Amasiase, lec laj yil ta sba ta sat ti Diose, ja' no'ox ti mu sta jech c'u cha'al laj spas ti David ti ja' smolmuc'tote. Yu'un ja' jech laj spas jech c'u cha'al laj spas ti Joás ti ja' stote.

⁴Yu'un mu'yuc laj yich' lilinel ti c'usitic oy ta jujun c'opojebaletic yu'unique. Staoj yav yac'ojbeic yipal ti jteclum ta xaq'uic ti chic'bil matanale, xchi'uc ti chic'bil pome.

⁵C'alal stsacoj xa lec yip xchi'uc yabtel ti Amasiase, laj smil scotol ti yaj'opisialtac ti buch'utic milbun ti stote.

⁶Ja'uc le' une, mu'yuc laj smilbe xnich'nabtac ti jmilvanejetique. Yu'un laj spas jech c'u cha'al ta xal ti jbel ti c'usi albil ti laj sts'iba comel ti Moisese, ti xi albat mantal yu'un ti Diose: “Ti totil me'iletique, mu xu' ta xich' o milel ta scoj ti c'usi chopol ta spas ti yalab xnich'nabique. Mi ja'uc ti alab nich'nabiletique, mu xu' ta xich' o milel ta scoj ti c'usi chopol ta spas ti totil me'iletique. Ti jujune ta xich' milel ta scoj ti c'u s'elan laj sta ti smul stuquique.”

⁷Ti Amasías taje, ja' ti buch'u laj smil lajunmil (10,000) ta vo' edomitaetic ta Stenlejal Ats'am sbie, ti laj yu'nin ti jteclum Selae, ti laj yac'be sbiin Jocteele, ti ja' to jech sbiinoj tana li'e.

⁸Laj ti jech laj spas taj une, laj stac batel jun j'al-mantal j'ich'-c'op ta stojol ti Joás xnich'on ti Joacaze, smom ti Jehue, ajvalil yu'un ti Israel ti xi laj yalbe ya'ie: “La' li'e quere, yo' jech ta jq'uelbe jba ti jsatique.”

⁹Ja'uc ti Joase xi xcholet laj stac ech'el ti stac'obil yu'une: “Ti tomal ch'ixe xi laj yalbe ya'i ti ch'ut te' ti oy ta Libanoe: ‘Ti jquerem nich'one, ac'bo atseb yo' jech ta xajnilin.’ Ja'uc le' une, ech' jcot jti'oval chon ti ech' xvoch' ta teq'uel ti tomal ch'ixe.

¹⁰Jna' lec ti cuchem avu'un ta stsalel ti edomitaetique, ti mu'yuc xa c'usi x'ech' o ta xava'i ti atoyoj aba xchi'uque. Ja' lec, chotlan no'ox ta ana quere. ¿C'u cha'al ti ta xasa' avocole, ti ta sta ta maquiel ti Judá avu'un eque?”

¹¹Manchuc mi jech un, mu'yuc laj yac' ta venta ti Amasiase. Va'i un, laj stam batel sbe ti Joase yo' jech ta stsac sbaic ta c'op xchi'uc ti Amasías ta Bet-semes ti oy ta yosilal ti Judae.

¹²Ti Judá une, tsalbil c'otic yu'un ti Israele. Ta jujun tal jatav batel ta snaic.

¹³Ti Joase, ajvalil yu'un ti Israele, ta Bet-semes laj stsac ta chuquel ti Amasías ti ajvalil yu'un ti Judae. Laj taj une, laj stam batel sbe ta Jerusalén ta ts'acal to un, ti balunvinic (180) metro snatil yiloj ti laj sjam ech'el ti smocale, ti lic ti bu sbiinoj Sti' sna Efraine, ti c'ot c'alal to ti sbiinoj Xuc'av Ti'nae.

¹⁴Ma'uc no'ox taje, laj yu'ninan scotol ti oroe, ti platae, scotol ti c'usitic jtunel ta xch'ulna ti Diose, xchi'uc ti oy ta chapanobbail yu'un ti ajvalile. C'alal laj xa xchuc jun chibuc viniquetic ta sventa ta xc'ot ta spojele, sut ech'el ta Samaria.

¹⁵Ti slo'il ya'yejal ti Joase, ti c'usitic laj spase, ti c'usitic cuch yu'une, xchi'uc ti laj stsac sbaic ta leto xchi'uc ti Amasías ajvalil yu'un ti Judae, ts'ibabil com ta jpoc svunal slo'il ya'yejal yabtel ti ajvaliletic yu'un ti Israele.

¹⁶C'alal chame, laj smuquic ta Samaria jmoj xchi'uc ti bu mucajtic ti ajvaliletic yu'un ti Israele. Ts'acal to un, och ta xq'uexol ta ajvalilal ti Jeroboam ti ja' xnich'one.

¹⁷Ti Amasiase, xnich'on ti Joás ajvalil yu'un ti Judae, cuxi to batel vo'lajuneb (15) jabil ti c'alal chamem xa ox ti Joás xnich'on ti Joacaz ajvalil yu'un ti Israele.

¹⁸Ti slo'il ya'yejal ti c'usitic laj spas ti Amasiase, ts'ibabil com ta jpoc svunal slo'il ya'yejal yabtel ti ajvaliletic yu'un ti Judae.

¹⁹Ti ta Jerusalene, oy buch'u laj xchap sc'opic ta mucul ta scontrainel ti Amasiase. Jech o xal jatav batel ta Laquis. Ja' no'ox un, nutsbil ech'el yu'un jcontrainvanejetic ta jteclum taje, ti laj smilic ti bu taje.

²⁰Laj taj une, laj scajanic muyel ta sba sca'. Laj smuquic ta Jerusalén jmoj xchi'uc ti bu mucajtic ti smolmuc'totac ta vo'ne ta Steclumal ti Davide.

²¹Va'i un, scotol ti jteclum Judae lic sva'anic ta ajvalil yu'unic ti Azariase, ta xq'uexol ta ajvalilal ti Amasías ti ja' stote. C'ajomal to no'ox yich'oj vaclajuneb (16) jabil ti Azariase.

²²C'alal chamem xa ti stote, ja' xa stuc lic xcha'va'an ti jteclum Elate yo' jech ta xc'ot ta yu'un ti Judae.

²³Ti ta yo'lajunebal (15) jabil yochel ta ajvalilal ti Amasías xnich'on ti Joás ajvalil yu'un ti Judae, ja' o lic ochuc ta ajvalilal ti Jeroboam xnich'on ti Joás ta Jerusalene, ti jun yoxvinic (41) jabil ech' ta ajvalilal ta Samariae.

²⁴Ja'uc le' une, ti c'usitic lic spase, mu lecuc laj yil ta sba ta sat ti Diose. Mu'yuc laj yicta sba ta spasel ti chopol jech c'u cha'al laj spas ti Jeroboam xnich'on ti Nabat ti laj sta smul yu'un ti Israele.

²⁵Ti Jeroboame lic yac'be sta stuq'uil stsaquic ti Israele, ti lic stam ech'el ta Hamate, ti c'ot ta nab Arabae. C'ot ta pasel jech c'u cha'al scaj'aloj ono'ox ti Ajvalil Dios yu'un ti Israel ta sventa ti yajtunel Jonás, xnich'on ti Amitaie, j'alc'op ti oy ta Gat-hefere.

²⁶Yu'un ti Diose laj yil ti mu x'ech' xjelav svocolic ti israeletique, ti mu junuc ta xcolique, ti mu junuc oy buch'u ta stic' sba ta spojelique.

²⁷Va'i un, ti Diose laj stic' sba ta spojelic ta sventa ti Jeroboam xnich'on ti Joase. Mu'yuc to c'otem ta yo'nton Dios ti ta xch'aybe sc'oplal ti israeletic ta banomile.

²⁸Ti slo'il ya'yejal ti Jeroboame, ti c'usitic laj spase, ti c'u s'elan cuch yu'un ti letovajel ti laj sliquese, xchi'uc ti c'u s'elan laj yu'nin ti Damascoe xchi'uc ti Hamate ta sventa ta stunesic ti Israele, ts'ibabil com ta jpoc svunal slo'il ya'yejal yabtel ti ajvaliletic yu'un ti Israele.

²⁹C'alal cham ti Jeroboame, laj smuquic jmoj xchi'uc ti bu mucajtic ti yan ajvaliletic yu'un ti Israele. Ts'acal to un, och ta xq'uexol ta ajvalilal ti Zacarías ti ja' xnich'one.