Read Tzotzil 2 Reyes 15 Bible Online

2 Reyes 15 - Tzotzil bible

2 Reyes 15

¹Ti ta yucubal xcha'vinic (27) jabil yochel ta ajvalilal ti Jeroboam ajvalil yu'un ti Israele, ja' o lic ochuc ta ajvalilal ti Azarías xnich'on ti Amasías ti ajvalil yu'un ti Judae.

²Ja' to no'ox yich'oj vaclajuneb (16) jabil ti c'alal lic ochuc ta ajvalilale. Lajcheb yoxvinic (52) jabil ech' ta ajvalilal ti ta Jerusalene. Jecolías sbi ti sme'e, ti liquel ta Jerusalene.

³Ti c'usitic laj spas ti Azariase, lec laj yil ta sba ta sat ti Diose. Jech laj spas jech c'u cha'al laj spas talel ti stot ti Amasías sbie.

⁴Manchuc mi jech un, mu'yuc laj stubbe sc'oplal ti c'usitic oy ta c'opojebaletique, ti bu to staoj yav ta xchiq'uic matanaletique, ti ta xchiq'uic pom ti jnaclejetique.

⁵Tsots ac'bat svocol ta c'a'emal chamel yu'un Dios ti ajvalile, ja' to ti c'uxi chame. Ti ajvalile mu'yuc xa bu xnaqui ta sna ti bu ti chapanobbaile. Laj yich' ich'bel ta yan ti yabtele, ja' laj yich' ti Jotam ti ja' xnich'one, ti lic sventain ti jteclume.

⁶Ti c'u yepal slo'il ya'yejal ti Azariase, xchi'uc scotol ti c'usitic laj spase, ts'ibabil com ta jpoc svunal slo'il ya'yejal yabtel ti ajvaliletic yu'un ti Judae.

⁷C'alal cham ti Azariase, bat smuquic jmoj xchi'uc ti bu mucajtic ti smolmuc'totac ta Steclumal ti Davide. Ts'acal to un, och ta xq'uexol ta ajvalilal ti Jotame ja' ti xnich'one.

⁸Ti ta xvaxaclajunebal xcha'vinic (38) jabil yochel ta ajvalilal yu'un Judá ti Azariase, ja' o lic ochuc ta ajvalilal yu'un Israel ti Zacarías xnich'on ti Jeroboame, ti vaquib u (6) no'ox ech' ta ajvalilal ta Samariae.

⁹Yu'un ti c'usitic lic spase, mu lecuc laj yil ta sba ta sat ti Diose. Ti c'u s'elan laj spas ti smolmuc'totaque, ja' jech lic spas ec. Mu'yuc laj yicta sba ta spasel jech c'u cha'al laj spas chopol ti Jeroboam xnich'on ti Nabat ti laj sta smul yu'un ti Israele.

¹⁰Le' une, ti Salum xnich'on ti Jabese lic scontrain ti laj xchap sc'op ta mucule, ti laj stsac ta c'op ti Ibleam ti laj smil ta j'ech'ele. Lec chotiuc ta ajvalil ti stuc une.

¹¹Ti slo'il ya'yejal ti c'usitic laj spas ti Zacariase, ts'ibabil com ta jpoc svunal slo'il ya'yejal yabtel ti ajvaliletic yu'un ti Israele.

¹²Taje, ja' c'ot ta pasel ti jech ono'ox caj'albat ti Jehú yu'un ti Dios ti ta xchanq'uexelal totil me'iletic ta x'ech' chotiicuc ta ajvalil ti xnich'nabtaque.

¹³C'alal och ta ajvalilal ti Salum xnich'on ti Jabese, ja' o ti c'alal oy xa ta sbalunlajunebal xcha'vinic (39) jabil yochel ta ajvalilal ta Judá ti Uziase. Ja'uc le' une, c'ajomal jun u lec tsacal ti ech' ta ajvalilal ta Samariae.

¹⁴Yu'un ti Manahem xnich'on ti Gadie loc' talel ta jteclum Tirsa, bat stsac ta c'op ti Salum ti oy ta Samariae. C'alal laj xa smile, och ta xq'uexol ta ajvalilal.

¹⁵Ti c'u yepal slo'il ya'yejal ti Salume, xchi'uc ti lic scontrain ta mucul ti Zacariase, ts'ibabil com scotol ta jpoc svunal slo'il ya'yejal yabtel ti ajvaliletic yu'un ti Israele.

¹⁶Va'i un, ti Manahem une lic slilin ti jteclum Tifsae. Laj stsob ech'el scotol ti c'usitic x'ayan ta osil banomil taje, ti lic ech'el ta Tirsae. Jech xtoc laj sjatanbe xch'ut ti antsetic ti xchi'ucanojan yolique. Ja' jech laj spas ta scoj ti mu'yuc xjambat sti'tac ti jteclume.

¹⁷Ti ta sbalunlajunebal xcha'vinic (39) jabil yochel ta ajvalilal ti Azarías ta ajvalil yu'un Judae, ja' o lic ochuc ta ajvalilal ti Manahem xnich'on ti Gadí ti ta Israele. Lajuneb (10) no'ox jabil ech' ta ajvalilal ta Samaria.

¹⁸Yu'un ti c'usitic lic spase, mu lecuc laj yil ta sba ta sat ti Diose. Mu'yuc laj yicta sba ta spasel chopol jech c'u cha'al laj spas ti Jeroboam xnich'on ti Nabat ti laj sta smul yu'un ti Israele.

¹⁹Ti ta sc'ac'alil taje, ja' o vul ta loq'uel ti Pul ajvalil yu'un ti Siriae, ti laj sbec' ta mesel ti jteclume. Ti Manaheme loc' ayan ta yo'nton ti laj yac'be oxlajuneb xcha'vinic ta mil (33,000) kilo plata yo' ta sc'uban sba lec xchi'uc ti yabtele.

²⁰Yo' jech ta stojbe ajvalil yu'un Asiria ti va'i yepal taje, ti Manaheme laj yal mantal ti ac'o yaq'uic x'ech' jutuc ta o'lol kilo plata taq'uin sventa spatanic scotol ti jc'ulejetic ta Israele. Ti jech taj une, ti ajvalil yu'un Asiriae sut batel ta slumal. Mu'yuc xa xjoc'tsaj ti ta jteclume.

²¹Ti sc'oplal slo'il ya'yejal ti Manaheme, xchi'uc scotol ti c'usitic laj spase, ts'ibabil com ta jpoc svunal slo'il ya'yejal yabtel ti ajvaliletic yu'un ti Israele.

²²Ts'acal to un, ti c'alal cham xae, ja' laj xcuch comel abtelal ti Pekaía ti ja' xnich'one.

²³Ti ta yo'lajunebal (50) jabil stic'lej ta yabtel ti Azarías ajvalil yu'un ti Judae, ja' o lic ochuc ta ajvalil yu'un Israel ti Pekaía xnich'on ti Manaheme. Chib jabil ech' ta ajvalilal ta Samaria.

²⁴Ti c'usitic lic spase, chopol laj yil ta sba ta sat ti Diose. Mu'yuc laj yicta sba ta spasel chopol jech c'u laj spas ti Jeroboam xnich'on ti Nabat ti laj sta smul yu'un ti Israele.

²⁵Ja'uc le' une, oy jun yaj'opisial ti sbiinoj Pekae, xnich'on ti Remaliase, lic sjol ta scontrainel ti laj spay xchi'iltac lajuneb yoxvinic (50) ta vo' viniquetic ti liquemic talel ta Galaade. Xvoletic c'otel ta pojobbail jteclum ti bu spasob mantal ti ajvalile. C'alal cham laj xa yu'une, ja' xa stuc lic chotluc ta ajvalilal.

²⁶Ti sc'oplal slo'il ya'yejal ti Pekaiae, xchi'uc scotol ti c'usi laj spase, ts'ibabil com ta jpoc svunal slo'il ya'yejal yabtel ti ajvaliletic yu'un ti Israele.

²⁷Ti ta xlajchebal yoxvinic (52) jabil stic'lej ta yabtel ti Azariase, ajvalil yu'un ti Judae, ja' o lic ochuc ta ajvalilal yu'un Israel ti Peka xnich'on ti Remaliase. Jtob (20) jabil ech' ta ajvalilal ta Samaria.

²⁸Ti c'usitic lic spase, mu lecuc laj yil ta sba ta sat ti Diose. Mu'yuc xicta sba ta spasel chopol jech c'u cha'al laj spas ti Jeroboam xnich'on ti Nabat ti laj sta smul yu'un ti Israele.

²⁹C'alal yorail ochem ta ajvalilal yu'un Israel ti Pekae, ja' o c'ot ti Tiglat-pileser ajvalil yu'un ti Asiriae, ti laj yu'nin ti Iione, ti Abel-bet-maacae, ti Janóahe, ti Quedese, ti Hasore, ti Galaade, ti Galilea, xchi'uc scotol yosilal ti Neftalie. Laj xchuc batel c'alal to Asiria scotol ti jnaclejetic yu'une.

³⁰Va'i un, ti Osease, squerem ti Elae, lic sjol ta scontrainel ti Peka xnich'on ti Remaliase. Laj stsac ta leto, ti j'ech'el laj smile. Ti jech taj une, laj to yil ti lic chotluc ta ajvalilal ti c'alal jtob xa ox jabil stic'lej ta ajvalilal ti Jotam xnich'on ti Uziase.

³¹Ti sc'oplal slo'il ya'yejal ti Pekae, xchi'uc scotol ti c'usi laj spase, ts'ibabil com ta jpoc svunal slo'il ya'yejal yabtel ti ajvaliletic yu'un ti Israele.

³²Ti ta xchibal (2) jabil yochel ta yabtel ti Peka xnich'on ti Remaliase, ja' o lic ochuc ta ajvalilal yu'un Judá ti Jotam xnich'on ti Uziase.

³³Yich'oj xa vo'ob xcha'vinic (25) jabil ti c'alal lic ochuc ta yabtele, vaclajuneb (16) jabil ech' ta ajvalilal ta Jerusalén. Jerusa sbi ti sme'e, yantsil nich'on ti Sadoque.

³⁴Ti c'usitic laj spas ti Jotame, lec laj yil ta sba ta sat ti Diose jech c'u cha'al laj spas ti Uzías ti ja' stote.

³⁵Lic smeltsan ti muc' ta ti'na ti oy ta ochebal ch'ulna yu'un ti Diose. Ac'o mi jech un, mu'yuc laj slilin ti jujun c'opojebaletic ti na'bil yu'unic ti jnaclejetic ti bu ta xaq'uic milbil matanaletique, ti bu ta xchiq'uic ti pome.

³⁶Ti sc'oplal slo'il ya'yejal ti Jotame, xchi'uc scotol ti c'usitic laj spase, ts'ibabil com ta jpoc svunal slo'il ya'yejal yabtel ti ajvaliletic yu'un ti Judae.

³⁷Ti jech yorail ta vo'ne taje, ja' o ti Diose laj stac talel Rezin ajvalil yu'un ti Siriae, xchi'uc ti Peka xnich'on ti Remalias ta scontrainel ti Judae.

³⁸C'alal cham ti Jotame, bat smuquic ti bu mucul ti smolmuc'totac ta Steclumal ti Davide, ti ja' smolmuc'tote. Ts'acal to un, ja' laj xcuch comel abtel ta ajvalilal ti Acaz ti ja' xnich'one.