Read Tzotzil 2 Reyes 18 Bible Online

2 Reyes 18 - Tzotzil bible

2 Reyes 18

¹Ti ta yoxibal (3) jabil yochel ta ajvalil ti Oseas xnich'on ti Ela ajvalil yu'un ti Israele, ja' o lic ochuc ta ajvalilal ti Ezequías xnich'on ti Acaz ajvalil yu'un ti Judae.

²Yich'oj xa ox vo'ob xcha'vinic (25) jabil ti c'alal och ta yabtele. Baluneb xcha'vinic (29) jabil sjalil och ta ajvalilal yu'un ti Jerusalene. Ti sme'e, Abi ti sbie, yantsil xnich'on ti Zacariase.

³Ti c'usitic lic spas ti Ezequiase, lec laj yil ta sba ta sat ti Diose, yu'un xco'olaj scotol laj spas jech c'u cha'al ech' ti David smolmuc'tot ta vo'nee.

⁴Taje, ja' ti buch'u laj slilin ti jujun c'opojebaletique. Laj slilin ta voq'uel ti loc'obbail tonetique. Laj slilin ta voq'uel sloc'obbailtac ti Aserae. Laj slilin ta voq'uel ti c'anal taq'uin sloc'obbail chon ti laj smeltsan ti Moisese, ti laj xchic'beic to ox pom ti israeletic ti Nehustán sbiinoj yu'unique.

⁵Ti Ezequiase laj spat yo'nton ta stojol ti Ajvalil Dios yu'un ti Israele. Yu'un ta scotol ti ajvaliletic yu'un ti Judá ti laj ech'uc ta ba'yele, xchi'uc ti laj ech'uc ta ts'acale, mu'yuc buch'u xco'olaj junuc jech laj spas jech c'u cha'al ti stuque.

⁶Staoj yav jun yo'nton snabanoj sba ta stojol ti Diose. Mi ja'uc laj xch'ac sba ta stojol. C'ot ta pasel yu'un smantaltac ti Dios ti albil comel ti Moisese.

⁷Jech o xal coltabil yu'un ti Diose. Scotol ti c'usi ta spase, lec ta xc'ot ta pasel yu'un. Ti Ezequiase laj stoy sba ta scontrainel ti ajvalil yu'un ti Asiriae. Mi ja'uc laj xch'un pasel ti mantale.

⁸Ma'uc no'ox taje, c'ot c'alal to Gaza ti cuch yu'un ta stsalel ti filisteoetic ti c'u sjamlej ti yosilalique, ti lic ech'el ta toyol luchlebal q'uelob osiletique, ti c'ot c'alal to ta pojobbail jteclumetique.

⁹Ti ta xchanibal (2) jabil stic'lej ta ajvalilal ti Ezequiase, ti yucubal (7) xa jabil stic'lej ta ajvalilal ti Oseas xnich'on ti Ela ajvalil yu'un ti Israele, ti Salmanasar ajvalil yu'un ti Asiriae, bat stsac ta volel ta leto ti lum Samariae.

¹⁰Ta yoxibal (3) to jabil c'ot yu'nin. Ti ta svaquibal (6) xa jabil stic'lej ta ajvalilal ti Ezequiase, ja' o xa sbalunebal (9) jabil stic'lej ta ajvalil ti Oseas ta Israel ti c'alal u'ninat ti jteclum Samariae.

¹¹Ti ajvalil yu'un ti Asiriae laj stsob loq'uel ti israeletic ti yic'oj batel c'alal to Asiriae. Bat yac' nacliicuc ta jteclum Halah ti oy ta yosilal ti Habore, ti ta yosilal ti uc'um Gozane, xchi'uc ta jteclumetic yu'un ti medoetique.

¹²Ti jech c'ot ta pasel taje, ja' ta scoj ti jelav stoyobbailic ta stojol ti Ajvalil Dios yu'unique, ti c'ajomal no'ox laj sju'beic ta teq'uel ti stratee. Mi ja'uc laj yaq'uic ta venta ta spasel ti c'usi yaloj Moisés yajtunel ti Diose.

¹³Ti ta xchanlajunebal (14) jabil stic'lej ta ajvalilal ti Ezequiase, ti Senaquerib ajvalil yu'un ti Asiriae, bat stsac ta leto ti jnaclejetic ti oyic ta scotol ti pojobbail jteclumetic ti oy ta Judae. Laj yu'nin.

¹⁴Va'i un, ti Ezequías ajvalil yu'un ti Judae, xi laj stac batel mantal ta stojol ti ajvalil yu'un ti Asiria ti oy ta Laquise: “Laj xa jsa' ep jmul. Mu xa'och talel ti li' ta jteclumale. Ta jtojbot ti patan ti c'u yepal ta xac'anbune.” Jech o xal ti ajvalil yu'un ti Asiriae, ta jech yepal laj yac'be stoj patan ti Ezequías ajvalil yu'un ti Judae, balunmil xchi'uc baluneb ciento (9,900) ta kilo ti platae, ja' baluneb ciento xchi'uc lajuneb yo'vinic (990) ta kilo ti oroe.

¹⁵Jech ti Ezequías une laj yac' jelavel ta c'abal scotol ti plata ti laj sta loq'uel ta xch'ulna ti Diose, xchi'uc ti q'uejanbil ta yavil ta chapanobbail ta sna ti ajvalile.

¹⁶Ta vo'ne taje, ti Ezequiase laj st'ol loq'uel ti oro ti ac'bil ta smarcoal ta sti' xch'ulna ti Diose, ti ja' yac'oj stuque. Laj yac'be ech'el ti ajvalil yu'un ti Asiriae.

¹⁷Ta ts'acal to un, ti ajvalil yu'un Asiriae laj stac ech'el jun yajbanquilal j'opisial, xchi'uc jun vinic ti jun yo'nton yu'une, xchi'uc yan yaj'opisial ti jba'be ech'el yu'un ti epal soldadoetique. Loq'uic ech'el ta Laquis ti batic ta Jerusalén yo' jech ta stsaquic ta leto. C'alal c'otic ta Jerusalene, c'ot svol sbaic ta sts'el sts'anleb vo' ti bu macbil yalel talel yoc ta ac'ole, ta sbelel ti osil ti bu sbiinoj Chuc'ob C'u'il yu'unique.

¹⁸Ta ts'acal to un, laj staic ta iq'uel ti ajvalile, xchi'uc ti Eliaquim xnich'on ti Hilciase, ti sbainoj ti chapanobbaile. Ti Sebna ti sbainoj ta yalel ti c'usitic ta xc'ot ta pasele, xchi'uc ti Joa xnich'on ti Asafe, yajts'ibajom ti ajvalile, loq'uic batel ta nupvanej ta be.

¹⁹Ti bu taje, xi albatic yu'un ti j'opisial asirioe: —Xi xchapet xavalbeic ya'i ti Ezequiáse, slo'il ti stacoj talel ti muc'ul ajvalile, ja' ti ajvalil Asiriae: ‘¿Mi mu'yuc no'ox ti xi'el ta xava'i le'e?

²⁰¿Mi yu'un ta xanop ti jelavem yip ti jun yutsil chapbilal c'op avaloje, ti ja' mu sta yip ti buch'u lec sna' xtojob ta letovajele? ¿Buch'u apatoj avo'nton yu'un ti ta xatoy aba ta jtojole?

²¹Jna' ti apatoj avo'nton ta stojolal ti Egiptoe. Ja'uc le' une, ti uni Egiptoe, co'ol s'elan jun uni silbilal aj ti ta squits ta yayijesel ti c'abal c'alal ta jquican jbatic ta stojole. Taje, ja' jech ta xc'ot ta stojol scotolic ti buch'utic spatoj yo'ntonic ta stojol ti faraón ajvalil yu'un ti Egiptoe.

²²Yan mi xachi ta xavalbeicune: Ma' ti vu'uncutique jpatoj co'ntoncutic ti ja' jpojvanej cu'uncutic ti Diose. ¿Mi yu'un mu'yuc laj slilin loq'uel Ezequías ti jujun c'opojebaletique xchi'uc ti altaretic yu'un ti Dios taje? ¿Mi mu'yuc laj yalbe ya'i ti jnaclejetic ta Judae, xchi'uc ta Jerusalén ti c'ajomaluc no'ox spasbeic stoyel xi'el ta altar ti oy ta Jerusalene?

²³Quere, xi s'elan chap lec ac'opic xchi'uc ti cajval ajvalil yu'un ti Asiriae: Ta xcac'bot cha'miluc ta cot (2,000) ca'etic mi ta xatabe yajval ta scajlebinele.

²⁴Ti vo'ote, mi ja'uc jset'uc xu' ta x'och ta jatobal avu'un ti j'opisial asirioetique, ac'o mi talemic ti slajeb xa st'ujbenale. ¿Mi yu'un naca no'ox amalaoj ta xich' sa'belot talel viniquetic ca'etic ta xlic talel ta Egiptoe?

²⁵Ja' jech xtoc un, ¿mi yu'un ta xanop lital ta stsaquelot ta c'op, ta slilinel ti jteclum ti mu'yuc xquich'ojbe ye sti' ti Diose? Ja' laj yalbun mantal ti tal jtsacot ta letoe ti ta jtsutseselot ta j'ech'ele.

²⁶Ti Eliaquim une, ti Sebnae, xchi'uc ti Joae, xi laj stac'beic ti j'opisial asirioe: —Avocoluc, c'oponuncutic ta arameo c'op, yu'un xca'icutic. Mu xac'oponuncutic ta hebreo c'op. Scotol ti c'u yepal oyic ta ba moque, ta xa'iic lec.

²⁷Ja'uc ti j'opisial asirioe xi laj yale: —Ma'uc ti avajvalique, mi ja'uc ti jnaclejetic ti vololic ta ba moc ti laj stacun talel ava'iic yu'un ti ajvalil ti va'i s'elan taje. Ja'ic ti jnaclejetic ti vololic ta ba moque, ti stuquic jech c'u cha'al ti vo'oxuque, ta xlic alo' avic'obalic, ta xavuch' ti ac'abique.

²⁸Va'i un, ti j'opisiale sva'anoj sba lec ti xi tsots avan ta hebreo c'op ti bu va'ale: —A'yio ava'iic ti xi ta xal ti muc'ul ajvalile, ti ajvalil yu'un Asiriae:

²⁹‘Mu xalajic ta lo'lael yu'un ti Ezequiase, ti mu ja'uc xu' yu'un xaspojic ta coc ta jc'obcutique.’

³⁰Mi ta xac'boxuc ana'ic ti Ezequías ti c'otuc ta avo'ntonic ta spojoxuc ti Diose, ti xi ta xalboxuque: ‘Ma' ti Diose, jbel sc'oplal ta xispojotic, mi ja'uc ta xac' ye sti' ta x'och ta yoc ta sc'ob ajvalil Asiria ti jteclum li'e’,

³¹mi ja'uc xavich'beic ta muc'. Ti ajvalil yu'un Asiriae laj stacun talel ta yalel ava'iic ti lajuc ti ac'op avu'unic xchi'uque, ti mu xatoy abaique, ti jujunoxuc une xu' ta xatun ta xalajesic ti sat uva avu'unique, ti sat icux avu'unique, ti xu' ta xavuch'ic ti vo' ti oy ta ajoq'uique.

³²Ts'acal to un, ta xayic'oxuc batel ta jun lum ti mu yanuc jech c'u cha'al ti alumalique, ta jun jteclum xch'ieb ti trigoe, xch'ieb ti uvae, yo' jech ta xameltsanic ti pane, ti vinoe, ti ja' jun yavilal ti aceite olivoe, xchi'uc ti ajapom ta jteclum taje. Ja' to jech jun avo'ntonic ta xacuxiic. Mi ja'uc ta xachamic. Mu xa xavich'beic ta muc' sc'op ti Ezequiase. C'ajomal no'ox ta xaslo'laoxuc ti ta xal ti ta stic' sba ta apojelic ti Diose.

³³¿Mi yu'un oy bu junucal diosal yu'un ti yan lumetic ti cuch yu'un ta spojel ti steclumal ta yoc ta sc'ob ti ajvalil Asiriae?

³⁴¿Bu oy ti diosetic yu'un ti lum Hamate, xchi'uc ti lum Arfade? ¿Bu oy ti diosetic yu'un ti lum Sefarvaime, ti Henae, ti Ivae? ¿Mi cuch yu'un ta spojel sbaic ta yoc ta sc'ob Asiria ti Samariae?

³⁵¿Bu jchopucal diosetic ti cuch yu'un ta spojel ti steclumal ta yoc ta sc'ob ti ajvalil Asiriae? ¿C'u cha'al ta to xanopic ti xu' yu'un ti Dios ta stic' sba ta spojel ti Jerusalene?

³⁶Ti jnaclejetique ts'ijil comic. Mi jbeluc xtac' yu'unic, yu'un albatic yu'un ti ajvalile ti mu xtac'avic jbeluque.

³⁷Va'i ti Eliaquim une, ti ja' sbainoj ti chapanobbaile, ti Sebna ti ta xac' ta na'el ti c'usitic ta xc'ot ta pasele, xchi'uc ti Joa yajts'ibajom ti ajvalile, mu xa x'ech' laj ya'iic. Lic xch'i' ta jatel ti sc'u'ique. Batic ta stojol ti Ezequiase yo' jech ta xalbeic ya'i scotol ti c'usi laj yal comel ti banquilal j'opisial yu'un ti Asiriae.