Read Tzotzil 2 Reyes 20 Bible Online

2 Reyes 20 - Tzotzil bible

2 Reyes 20

¹Ti jech ta yorail ta vo'ne taje, yal ta chamel ti Ezequiase, ti naca tey xa come. Ti j'alc'op Isaías xnich'on ti Amose xi laj yalbe ya'i ti c'alal bat sq'uele: —Ti Diose xi ta xale: ‘Chapanbo xa ya'i comel slajeb slo'il yatel avo'nton ta bijubtasel ti c'u yepal oy ta anae, yu'un ta xacham. Mu xa cha'bel x'ech' avu'un.’

²Ti Ezequiase laj sjoybin ech'el sat ta stuq'uil pac'bal, ti xi lic c'opojuc ti'inuc ta stojol ti Diose:

³“Cajval, avocoluc, mu xch'ay xava'i ti sjunul co'nton laj cac' jba ta tunele, ti jamal lec co'nton laj jpas c'usi ta xac'ane.” Lic smil sba ta oq'uel un.

⁴Ja'uc le' une, c'ot ta pasel ti c'alal mu to ta xloc' ech'el ta o'lol yamaq'uil sna ajvalil ti Isaiase, xi albat yu'un Dios ti tal c'oponatuque:

⁵“Cha'sutan batel, xi bat albo ya'i ti Ezequías jtsobvanej yu'un ti calab jnich'nabe: ‘Xi ta xal ti Ajvalil Dios yu'un ti amolmuc'tot David ta vo'nee: Laj xa ca'i ti xavocolete. Laj quil ta jba ta jsat ti laj amal ti ya'lel asate. Ta jtic' jba ta apoxtael. Ti li' ta yoxibal (3) c'ac'ale, xu' avu'un ta xac'ot ta xch'ulna ti Diose.

⁶Ta to jts'acbot ech'el vo'lajuneb jabil (15) acuxlej. Ta jtic' jba ta apojel xchi'uc ta spojel ti jteclum Jerusalene, ti mu ja'uc xcac'ot ta yoc ta sc'ob ti ajvalil yu'un Asiriae. Vu'un ta jva'an jba ta spojel ti jteclum li'e, ta sventa ti mu tuch'baj ta co'nton ti Davide, ti mu ja'uc tuch'baj xca'i jba eque.’ ”

⁷Ti Isaiase laj yal mantal ti yich'uc juch'el tenbil icuxe. Jech laj yich' pasel. Laj yich' pac'bel ti bu ip ta xa'ie. Lic poxtajuc ti ajvalile.

⁸Va'i un, ti Ezequiase xi laj sjac'be ti Isaiase: —¿C'usi svinajeb ta xquil yo' jech ta jna' ta xipoxtaj yu'un ti Diose, xchi'uc ti li' ta yoxibal (3) c'ac'al xu' ta xibat ta xch'ulna ti Diose?

⁹Xi tac'bat yu'un ti Isaiase: —Xi s'elan svinajeb ta spas ma' ti Dios ta atojol ti xc'ot xc'opoje: ¿Mi ja' ta xac'an ta xc'ot ta lajuncoj (10) ti bu ta smac jelavel ti queovale, mi ja' ti ta sut yalel ta yolon ti slajun-cojal (10) ti queovale?

¹⁰Ti Ezequiase xi laj stac': —Ti queoval ti ta xmuy ech'ele, mu vocoluc ma' le'e. Toj vocol ti ta sut yalel ta yolon ti slajun-cojale.

¹¹Va'i un, ti j'alc'op Isaiase lic c'opojuc ti'inuc ta stojol ti Diose. Jech ti Diose laj syales ech'el ta yolon ti po'ot xa ox sta ta slajun-cojal (10) ti queov ti bu ta xac' iluc sbisobil c'ac'al yu'un ti Acaze.

¹²Ti jech ora ta vo'ne taje, ti ajvalil Merodac-baladán xnich'on ti Baladán ajvalil yu'un Babiloniae, laj ya'i ti oy bu ta xich' lo'iltabel sc'oplal ti ip ta xa'i ti Ezequiase. Ta sventa ti j'al-mantal j'ich'-c'opetic yu'une, laj stacbe batel jlic ts'ibabil vun xchi'uc matanal.

¹³Ti Ezequías une lec laj ya'i. Laj yotesan, laj yac'anbe yil sq'uejleb ti platae, ti oroe, ti muil poxetique, ti t'ujbil aceitee, ti bu sq'uejleb yabtejebtaque, xchi'uc scotol yan ti c'usitic oy ta yaviltaque. Mu'yuc xa c'usi jtosucal ma' ti mu'yuc xac' iluc ti oy ta snae, xchi'uc scotol ti c'u yepal sventainoje.

¹⁴Va'i un, ti j'alc'op Isaías une xi laj sjac'be ti ajvalil Ezequías ti c'alal bat sc'opone: —¿Bu talemic ti viniquetic le'e? ¿C'usi laj yalbot? Ti Ezequiase xi laj staq'ue: —Liquemic talel ta namal muc' ta lum, ti ta Babilonia to talemique.

¹⁵Ti Isaiase xi laj sjaq'ue: —¿C'usitic laj yilic ti li' ta ana une? Ti Ezequiase xi laj staq'ue: —Laj yilic scotol ti c'usitic x'ayan li'e. Mu'yuc xa c'usi jtosucal ti mu'yuc xcac'be yilic ti oy ta sq'uejobiltac cu'une.

¹⁶Va'i un, ti Isaiase xi laj yalbe ti Ezequiase: —A'yio ava'i ti xi s'elan ta xal ti Diose:

¹⁷‘Scotol ti c'usitic oy ta anae, scotol ti c'u yepal stsoboj comel ti amolmuc'totac ta vo'ne ti li' to oy avu'un avi tana li'e, ta xc'ot sc'ac'alil ta xich' tsobel batel c'alal to Babilonia. Mu jutebuc ti oy c'usi ta scomtsanic li'e.

¹⁸Ma'uc no'ox taje, oy jlom ti anitilultaque tsatsal ic'bil ta xbatic ta Babilonia, ti ta xich'ic pasel ta capon ti ta x'ochic ta mosovil ta sna ti ajvalile.’

¹⁹Ti Ezequiase, ti ja' no'ox laj snop ti mu'yucuc c'usi sna' ti lajemuc c'op ti cu sjalil cuxule, xi laj stac'be ti Isaiase: —Ti slo'il ya'yejal Dios ti avich'ojbun talele, xpatet to co'nton yu'un ta xca'i.

²⁰Ti sc'oplal slo'il ya'yejal ti Ezequiase, ti c'u s'elan cuch yu'une, ti c'u s'elan lic smeltsan ti sts'anleb vo'e, ti c'u s'elan laj smeltsan ech'el ti beo' ta xich' ech'el ta jteclume, ts'ibabil com ta jpoc svunal slo'il ya'yejal yabtel ajvaliletic yu'un ti Judae.

²¹C'alal cham ti Ezequiase, lic ochuc ta ajvalilal ti Manasés ti ja' xnich'one.