Read Tzotzil 2 Reyes 24 Bible Online

2 Reyes 24 - Tzotzil bible

2 Reyes 24

¹C'alal tiq'uil ta ajvalilal ti Joacime, ti Nabucodonosor ajvalil yu'un ti Babiloniae, laj sbec' ta u'ninel ti muc' ta jteclume ti oxib (3) jabil sjalil pasbil ta mantal ti Joacime. Ts'acal to un, lic sjol ta scontrainel ti ajvalile.

²Ja'uc le' une, tacbat talel yu'un Dios ta stojol ti Joacime, epal j'elec' caldeoetic, sirioetic, moabitaetic, xchi'uc ti amonitaetique. Laj stac talel ta yilbajinel ti Judae yo' jech ta xc'ot ta pasel ti ta xch'aybat sc'oplal ta j'ech'el jech c'u cha'al scaj'aloj ono'ox ti Dios ta sventa ti yajtunel j'alc'optaque.

³Ti jech c'ot ta stojol ti Judá taje, yu'un jech ono'ox snopoj ti Diose, ti ta xch'ac loq'uel ta stojol ta scoj ti mu no'ox albajuc yepal smul staoj ti Manasese,

⁴ta scoj xtoc ti laj smalbe xch'ich'el ti buch'u mu'yuc smulique, ti mal yu'un ta sjunul ti Jerusalene. Jech o xal mu'yuc xa xch'aybat smul scolo' yu'un ti Diose.

⁵Sc'oplal slo'il ya'yejal ti Joacime, ts'ibabil com ta jpoc svunal slo'il ya'yejal yabtel ti ajvaliletic yu'un ti Judae.

⁶Ti c'alal chame, cuchbat comel yabtel yu'un ti Joaquín ti ja' xnich'one.

⁷Ta jech yepal un, ti ajvalil yu'un ti Egiptoe, j'ech'el mu'yuc xa xloc' ti ta slumale, yu'un scotol ti c'u yepal smacoj ti ta xlic ta uc'um Egipto ti ta xc'ot c'alal to ta uc'um Eufratese, volbat ta u'ninel yu'un ti ajvalil ta Babiloniae.

⁸C'alal lic ochuc ta ajvalilal ti Joaquine, yich'oj vaxaclajuneb (18) jabil, ti oxib no'ox u ech' ta ajvalilal ta Jerusaléne. Nehustá sbi ti sme'e, yantsil nich'on ti Elnatane, ti liquel ta Jerusalene.

⁹Yu'un ti c'usitic lic spase, mu lecuc laj yil ta sba ta sat ti Diose, co'ol laj spas jech c'u cha'al ech' ti stote.

¹⁰Ti jech yorail vo'ne taje, yajsoldadotac ti Nabucodonosor ajvalil yu'un ti Babiloniae, laj stam ech'el sbeic ta scontrainel ti Jerusalene, ti volol c'otic ta stsaquel ta c'ope.

¹¹C'alal xyaquet ti leto yu'unic ta jteclume, c'ot ec ti Nabucodonosore.

¹²Va'i un, ti Joaquín ajvalil yu'un ti Judae, jmoj xchi'uc ti sme'e, ti banquilaletic yu'une, ti yaj'opisialtaque, ti viniquetic ti jun yo'nton xchi'uque, laj yac' sbaic ta c'abal yu'un ti ajvalil yu'un ti Babiloniae, ti tsaqueic ta chuquel yu'une. Ti jech c'ot ta pasel taje, ta xvaxaquibal (8) xa ox jabil stic'lej ta ajvalilal ti Nabucodonosore.

¹³Ts'acal to un, ti Nabucodonosore laj stam loq'uel ti taq'uinetic ti oy ta xch'ulna ti Diose, xchi'uc ti oy ta sna ti ajvalile, jech c'u cha'al scaj'aloj ono'ox ti Diose. Laj slilin ta voq'uel scotol ti c'uisitic smeltsanojan ta oro ti Salomón ajvalil to ox yu'un ti Israele, ti laj smeltsan ta sventa ta xtun ta xch'ulna ti Diose.

¹⁴Laj taj une, laj xchuc batel scotol ti jnaclejetic ta Jerusalene, scotol ti banquilaletique, ti soldadoetic ti lec xtojobique, xchi'uc scotol ti buch'utic xtojobic ta spasel ep ta tos abtele, ti jten-taq'uinetique, ja' to ti c'uxi ts'aqui yu'un ti lajunmil (10,000) ta vo' jchuqueletique. Mu'yuc xa yajval com ti jteclume. C'ajomal xa no'ox bevbil com ti buch'u spajebal me'un mu'nate.

¹⁵Ti Nabucodonosore xchucoj batel xtoc ti Joaquine, ti sme'e, ti yajniltaque, ti yaj'opisialtaque, xchi'uc ti buch'utic ich'bil ye sti'ic ta jteclume. Tsobbil loq'uic ta Jerusalén, ti chucbil batic c'alal to Babiloniae.

¹⁶Ta scotol ti jchuqueletic ti lec ojtiquinbilic yu'un ti ajvalil ta Babiloniae, vucmil (7,000) ta vo' ta scotol, xchi'uc jmil (1,000) ta vo' ti sna'ic spasel ep ta tos abtele, xchi'uc ti jten-taq'u'netique, ti ja' viniquetic baxbolic chapalic lec ta ac'-letoe.

¹⁷Ts'acal to un, ti ajvalil yu'un Babiloniae laj yac'be snup yabtel ta ajvalilal ti Matanías ta xcuchbel yabtel ti sjun nich'on Joaquine. Laj sjelbe ti sbie, ti lic sbiin yu'un Sedequiase.

¹⁸C'alal lic ochuc ta ajvalilal ti Sedequiase, yich'oj xa jun xcha'vinic (21) jabil, ti c'ajomal no'ox buluchib (11) jabil ech' ta ajvalilal ta Jerusalene. Hamutal sbi ti sme'e, yantsil nich'on ti Jeremías ti liquel talel ta Libnae.

¹⁹Yu'un ti c'usitic lic spase, mu lecuc laj yil ta sba ta sat ti Diose, ti co'ol laj spas jech c'u cha'al ech' ti Joacime.

²⁰Jech o xal ti Diose ilin ta stojol ti Jerusalene xchi'uc ta stojol ti Judae, ti laj sten loq'uel ta stojole. Ts'acal to un ti Sedequiase lic sjol ta scontrainel ti ajvalil yu'un ti Babiloniae.