Read Tzotzil 2 Reyes 25 Bible Online

2 Reyes 25 - Tzotzil bible

2 Reyes 25

¹Ti ta slajunebal (10) c'ac'al yu'un ti slajunebal (10) u ta sbalunebal (9) jabil yochel ta ajvalilal ti Sedequiase, ti ajvalil Nabucodonosore laj stam ech'el sbe xchi'uc scotol ti yajsoldadotac ta stsaquel ta leto ti jteclum Jerusalene, ti volol c'ot ta stojole. Lic slaman sbaic ta yeloval. Laj spas stec'obic ta joyob yo' jech ta stsacvanic ta leto.

²Ti jteclume staoj yav joyobtabil ti c'alal sta sbuluchibal (11) jabil yochel ta ajvalil ti Sedequiase.

³Ta sbalunebal (9) c'ac'al yu'un ti xchanibal (4) u ti jech jabil taje, lic tsots vi'nal ta jteclum. Mu'yuc xa jset'uc c'usi ta slajesic ti jnaclejetique.

⁴Va'i un, lic sjom loq'uel sbeic ta smocal ti jteclume. Manchuc mi joyobtabil ta maquel yu'un ti caldeoetique, ti ajvalile xchi'uc scotol ti yajsoldadotaque jatavic loq'uel ta ac'ubaltic ta jteclum. Loq'uic ech'el ta ti'na ta stuq'uil ti oy smacoj cha'c'ol moc ta sbelel ts'unbil nichimetic yu'un ti ajvalile. Laj stamic ech'el sbelel stenlejal yu'un ti uc'um Jordane.

⁵Ja'uc le' une, ti ajvalil Sedequiase nutsbil bat yu'un ti soldado caldeoetique. C'ot lubtsanatuc ta be ta stenlej Jericó. Tene comel yu'un ti yajsoldadotaque, tan puc batic.

⁶Ti soldado caldeoetique laj staic ta tsaquel ti ajvalile, ti yic'ojic batel ta stojol ti ajvalil yu'un ti Babilonia ti oy ta Ribla ta yosilal ti Hamate. Ti bu taje, albat sc'oplal yu'un ti Nabucodonosore ti j'ech'el ta xac' sjol sbaquile.

⁷Yiloj ta sba ta sat ti loc' mantale, ti ac'o yich' c'ocbel snuc' ti xnich'nabe. Ja'uc ma' ti Sedequías une, loc' mantal ti ac'o yich' pitsbel xchibal ti sbec' sate, ti yich'uc chuquel ta carina yo' jech ta xich' iq'uel ech'el ta Babiloniae.

⁸Ta yucubal (7) c'ac'al yu'un ti yo'obal (5) u ti ta sbalunlajunebal (19) sjabilal yochel ta ajvalilal ti Nabucodonosor ajvalil yu'un ti Babiloniae, c'ot ta Jerusalén ti Nabuzaradán yaj'opisial ti ajvalil ti yich'oj ta sventa ti jvoc' soldado jchabivanej yu'un ti ajvalile.

⁹Och ta stsanbel sc'ac'al ti ch'ulnae, sna ti ajvalil ti bu c'otem ta xchapanobbaile, xchi'uc scotol ti naetic ta jteclume, ti xcaltique, scotol snaic ti buch'utic ojtiquinbilic leque.

¹⁰Ti soldado caldeoetic ti xchi'inojan batele, laj sjinesic smocaltac ta sjoylej ti jteclum Jerusalene.

¹¹Laj taj une, ti Nabuzaradane laj stsob batel ta chuquel ta Babilonia ti buch'utic oyic ta jteclume, xchi'uc ti buch'utic laj snaban sbaic ta stojol ti ajvalil yu'un ti Babiloniae, xchi'uc ti c'u yepal oyic to ti buch'utic sna'ic yabtelanel ep ta tos ti c'usitique.

¹²C'ajomal xa no'ox laj yicta comel jun chibuc ti c'u yepal ti buch'u spajebal xa no'ox abol sbae, yo' jech ta stuc'ulanic ta sq'uelel ti uvae, xchi'uc ta yabtelanel ti osile.

¹³Xi s'elan ma' ti c'usitic laj slilinic ta voq'uel ti caldeoetic ti meltsanbil ta c'anal taq'uin ti oy ta ch'ulnae: ti balajtic va'anbil muyele, ti xchotlebtaque, xchi'uc ti muc' ta pila yavil vo'e. Scotol laj yich'ic batel ta Babilonia ti c'anal taq'uine.

¹⁴Laj yich'ic batel xtoc ti yaviltac tane, ti spulobiltaque, ti xulobiltac sc'aq'uemal xnich ti c'usitic ta stsanique, ti lechetique, xchi'uc scotol ti c'usitic meltsanbil ta c'anal taq'uin ti ta stunesic ti c'alal laj spasic stoyel xi'el ti Diose.

¹⁵Mu'yuc ta alel ma' ti xi s'elan laj yich' batel ti buch'u yich'oj ta sventa ti jvoc' jchabivanej soldado yu'un ti ajvalile, scotol ti c'usitic meltsanbil ta oroe, ta platae: ti xch'amleb ac'aletique, xchi'uc ti muc' ta lech-lech taq'uinetique.

¹⁶Ja'uc ti c'usi chib balajtic va'anbil muyele, ti muc' ta pila yavil vo'e, ti scajtac ti laj yac' ta meltsanel Salomón ta sventa ti ch'ulnae, mi ja'uc na'baj c'u yepal ti yalale.

¹⁷Yu'un ti jujun c'usi balajtic va'anbil muyele, x'ech' to ta vaxaquib (8) metro ti stayleje. Ti ta sjoltaque, x'ech to ta chib (2) metro staylej pasbil xnichimaltac ta c'anal taq'uine, yich'oj chaj-chaj taq'uin smac ta joyob, yich'oj loc'tabil sat granada ta joyob. Ti c'usi balajtic va'anbil muyele, co'ol smuc'tiquil xchibal.

¹⁸Ti banquilal jtsobvanej yu'un ti soldadoetique, laj stsac ta chuquel xtoc ti banquilal pale Seraiase, ti Sofonías ti xchi'il sbaic ta paleale, xchi'uc ti oxib (3) viniquetic ti sbainojic ta xchabiel ti ochebal sti' ti ch'ulnae.

¹⁹Ti jnaclejetic yu'un ti lume, tsaqueic ta chuquel yu'un ti banquilal jtsobvanej yu'un ti jujuvoc' soldadoe, xchi'uc vo'ob (5) viniquetic yajtuneltac ti ajvalil ti laj staic ta jteclume, ti banquilal jtunel soldado ti buch'u sbainoj ta sventainel ti soldadoetique, xchi'uc ti oxvinic (60) ta vo' viniquetic ti ich'bil ye sti'ic ta jteclume.

²⁰Scotolic taje, ic'bil batic yu'un ti Nabuzaradán ta stojol ajvalil yu'un Babilonia ti oy ta Ribla ta yosilal ti Hamate.

²¹Ti bu taje, laj yal mantal ti ajvalil yu'un Babilonia, ti ac'o yich'ic milele. Ja' jech c'ot ta pasel ti bec'bil loq'uic ta slumalic ti Judae.

²²Ti Nabucodonosor ajvalil yu'un ti Babiloniae, lic stic' ta ajvalilal ti Gedalías xnich'on ti Ahicame, smom ti Safane, yo' jech ta sbain ti c'u yepal com ti jnaclejetic ta Judae.

²³C'alal laj ya'iic ti banquilaletic yu'un ti jujuvoc' soldado ta Judae, xchi'uc ti svinictaque, batic ta Mispa ta sc'oponel ti Gedaliase. Bat ti Ismael xnich'on ti Netaniase, ti Johanán xnich'on ti Careae, ti Seraías xnich'on ti Tanhumet ti liquel talel ta Netofae, xchi'uc ti Jaazanías xnich'on jun vinic ti liquel talel ta Maacae. Xvoletic batel xchi'uc ti svinique.

²⁴Ti Gedaliase laj sva'an sba ta yalel ta stojol ti buch'utic c'otic ta stojole xchi'uc ti svinictaque, ti mu xi'ic yu'un ti j'opisial caldeoetique, ti ta xcom naquiicuc ta jteclume, ti ac'o yac' sbaic ta tunel ta stojol ti ajvalilal yu'un ti Babiloniae yo' jech mu sta ti svocolique.

²⁵Ja'uc ti ta yucubal (7) u une, ti Ismael xnich'on ti Netaniase, smom ti Elisamae, snitilul ti ajvalil yu'un Judae, xchi'ucanojan c'otel lajunvo' (10) viniquetic ti laj stsaquic ta milel ti Gedaliase, xchi'uc ti israeletique, xchi'uc ti caldeoetic ti oyic ta Mispae.

²⁶Va'i un, scotol ti jnaclejetic ti ta xi'ic yu'un ti caldeoetique, ta biq'uit ta muc', banquilaletic yu'un ti soldadoe, laj svol sbaic ti jatavic ech'el ta Egiptoe.

²⁷Ti ta yucubal xcha'vinic (27) c'ac'al yu'un ti xlajchebal (12) u ta yuclajunebal xcha'vinic (37) jabil ti laj yich' chuquel loq'uel ta Judá ti ajvalil Joaquine, ja' o lic ochuc ta ajvalilal yu'un Babilonia ti Evil-merodaque. Laj yac' ta ilel ti syail xc'uxul yo'nton ta stojol ti Joaquine. Laj sloq'ues ta chuquel.

²⁸Lec laj spas sba ta stojol ti cajal c'ot sc'oplal yu'une, ti ja' mu sta ti yan ajvaliletic ti xchi'inojan ta Babiloniae.

²⁹Ti jech taj une, ti Joaquine ja' to jech lic sloc' ti sc'u' ti slapoj to ox ta chuquinabe, ti jmoj lic ve'uc xchi'uc ti ajvalil ti c'u sjalil cuxule.

³⁰Ma'uc no'ox taje, ti c'u sjalil cuxul ti Joaquine, ac'bat yu'un ajvalil Babilonia ti c'usi ta xtun yu'un ti jujun c'ac'ale.