Read Tzotzil 2 Reyes 4 Bible Online

2 Reyes 4 - Tzotzil bible

2 Reyes 4

¹Oy jun ants ti ajnilanbil to ox yu'un jun ta scotol ti j'alc'opetique, ti xi bat sc'an chapanel ta stojol ti Eliseoe: —Chamem xa ti jmalale. Xana' lec ti xi'taoj ti Diose. Tana li' une, ti j'ac'-ch'om taq'uine tal li'e, ti ta xic' batel ta smosov ti xchibal calabe.

²—¿Mi oy c'usi stac' ta jpas ta atojol un? Albun ca'i, c'usi oy avu'un ta ana —xi tac'bat yu'un ti Eliseoe. —Ti avajtunel li'e, mu'yuc yan ti c'usi x'ayan yu'un ta snae. C'ajomal no'ox oy juteb uni aceite ta poquet —xi laj stac' ti stuque.

³Va'i un, xi tac'bat yu'un ti Eliseoe: —Batan un cha'e, ba ch'amunbo spoquetac ti alac'nataque, ti bu xa c'alal xocajtic ta xata scotol ti poquetetique.

⁴Mi laj taj une, ochan ech'el ta yut ana xchi'uc ti avalabe. Bajo ti ti' nae. Lic nojesano ta aceite scotol ti binetique, ti slecoj xavac' ti bu nojemic xae.

⁵Jech ti antse laj sc'opon comel ti Eliseoe, bat sbaj sba ta na xchi'uc ti yalabe. Va'i un, lic snojesan ti uni binetic ti ta xjelubtasbat ech'ele.

⁶C'alal noj xa scotol ti binetique, xi laj yalbe mantal jun ta xchibal ti yole: —Jelubtasbeicun xa talel jayibuc ti bine. Ja'uc le' une, xi tac'bat yu'un ti yole: —Ch'abal xa yan ma' ti binetic une. Ta jech to yepal, ch'ab xi ti xq'uebet no'ox ta xyal ti aceitee.

⁷Ts'acal to un, loc' batel ta yalbel ya'i ti j'alc'ope, ti xi albat yu'une: —Tana le' une, batan ta xchonel ti aceitee. Tojo ti avil xchi'uque. Ti scomelale, tunuc xa avu'un xchi'uc ti avalabe.

⁸Oy jun c'ac'al, ech' ta Sunem ti Eliseoe. Ti bu taje, nacal jun ants ti caj tsacal xa'i sbae, ti laj stsatsal pajes yo' co'ol ta xve' xchi'uquique. C'alal jujucoj ta x'ech' ti Eliseo ti bu taje, ta x'ech' ve'uc.

⁹Va'i un, xi laj yalbe ya'i ti smalale: —Tac'avan, jna' lec ti vinic li' ti ta x'ech' svu'lanotic jujucoje, ja' jun ch'ul j'alc'op yu'un Dios.

¹⁰La' jmeltsanbetic jc'oluc sna ta xcha'cojal ti nae. Ta xcac'betic junuc stem, junuc xmexa, junuc xila, xchi'uc junuc slampara. Va'i un, ti c'alal ta x'ech' svu'lanotique, xu' ta xcom ti bu taje.

¹¹C'ot yorail ti bat ta jc'ol na taje yo' jech ta xcom vayuc.

¹²Xi laj yalbe ya'i ti smosov ti Giezi sbie: —Ic'o talel ti sunamita antse. Ti smosove laj yic' talel. Ti c'alal c'ot sva'an sba ta stojole, ti Eliseoe xi laj yalbe ya'i ti smosove:

¹³—Albo ya'i ti ants li'e ti ep xa c'uxubaj cu'untique, mi oy c'usi stac' ta jpastic ta stojol, mi ta sc'an xbat jt'ambecutic ya'i ajvalil ti sc'oplale, mi ja' ta stojol ti banquilal jpas-mantal yu'un ti soldadoe. Xi laj stac' ti antse: —Jun co'nton xchi'uc ti jchi'iltac li'e.

¹⁴—Va'i un, ¿c'usi stac' ta jpastic ta stojol un cha'e? —xi laj yal ti Eliseoe. —Mu jna' —xi laj stac' ti Giezie—. Mi junuc yalab, mol xa ti smalale.

¹⁵—Ic'o talel —xi ti Eliseoe. Ti mosovile bat yic' talel. Ja'uc ti ants une va'al c'ot ta ti'na.

¹⁶Va'i un, ti Eliseoe xi laj yalbe ya'ie: —Ti jabil ta xtale, jech c'u cha'al li'e, apetoj xa ox avol un. Ti stuque xi laj staq'ue: —¡Mi ja'uc un, yojtot! Ti jun yajtunel Diose, mu stac' ta slo'la ti me' jtunel yu'une.

¹⁷Nab yol ti antse jech c'u cha'al caj'albat yu'un ti Eliseoe. Ta yan jabil une, voc' ti yole.

¹⁸Lic ch'iuc ti quereme. Ja'uc le' une, oy jun c'ac'al loc' batel ta sq'uelel stot ti bu xchi'uc svinictac yacal ta stsobic ti ts'unubale.

¹⁹Xi x'avet xa liquel ta stojol ti stote: —¡Mu xa ono'ox cha'bel un ti jole! ¡Toj c'ux ta j'ech'el ti jole! Va'i un, ti stot une xi laj yalbe ya'i ti smosove: —Ic'o batel ta stojol ti sme'e.

²⁰Ti mosovile laj spet ti quereme, ti yic'oj batel ti bu oy ti sme'e. Jech ti stuque laj xchotan ta sba yo' spetoj ti querem sta ti o'lol c'ac'ale. Va'i ti querem une, cham.

²¹Ti antse muy batel ta jc'ol na yu'un ti j'alc'ope. Laj xpuch'an comel ta tem ti yole. Loc' batel ti laj smac comel ti ti'nae.

²²Ta jech yepal laj sta ta iq'uel ti smalale, ti xi laj yalbe ya'ie: —Tacbun batel ta xchi'inelun junuc amosov xchi'uc jcotuc burro yo' jech xba jq'uel ti j'alc'ope. Ta xisut no'ox talel un.

²³—¿C'u cha'al ta xbat aq'uel un? Ma'uc to yorail ti ach' ue, mi ja'uc yorail ti cuxob o'ntonale —xi laj sjac' ti smalale. —Mu xavul avo'nton yu'un —xi laj stac' ti antse.

²⁴Laj yal mantal ti ac'o yich' lapbel siya ti sburroe, ti xi laj yalbe ya'i ti smosove: —Jelavan ech'el un, batic. Mu xapajesun ta be ja' to ti mi laj calbot ava'ie.

²⁵Loc' ech'el un, c'ot ta vits Carmelo ti bu oy ti j'alc'ope. C'alal ile yu'un ti Eliseo ta nom xloc' ech'ele, xi laj yalbe ti Giezi ti ja' smosove: —A'yio ava'i, le'e, ja' ti sunamita antse.

²⁶Ba nupo ta be ta anil. Jac'bo ca'itic c'u s'elan oy ti stuque, c'u s'elan oy ti smalale, ti yole. Bat ti mosovile, ti laj yal ti lec oyique.

²⁷Ta ts'acal to un, c'ot ta vits ti bu oy ti Eliseoe, ti c'ot sts'uyan sba ta yoque. Nopaj ech'el ti Giezie yo' jech ta xch'ac loq'uel. Ja'uc le' une, xi albat yu'un ti Eliseoe: —Ch'an uto, yu'un mu x'ech' xjelav ta xa'i ti svocole. Mu'yuc to c'usi yalojbun ti Dios avi tana le' ti c'usi c'ot ta pasele.

²⁸Va'i un, ti stuque xi laj yale: —Yojtot, ¿mi yu'un yalel laj jc'an ta atojol ti laj quilbe sat ti cole? ¿Mi mu lajuc ono'ox cal, lo'la'el yo' patob o'ntonal jna', ti xichie?

²⁹Ti Eliseoe xi laj yalbe ya'i ti Giezie: —Chapano aba, ich'o batel ti jvaxtone, batan ti bu taje. Mi oy buch'u ta xanup ta bee, mu xapajes aba ta xchi'inel ta lo'il. Mi oy buch'u ta xasc'opone, mu xatac'be. C'otuc no'ox ametsanbe ti jvaxton ta sat ti quereme.

³⁰Ja'uc le' une, sme' ti quereme xi laj yalbe ti Eliseoe: —Ta sba ta sat ma' ti Dios une, ta xcal ava'i ti mu xibat ti mi jtuc no'oxe. Ti Eliseoe bat xchi'uc ti antse.

³¹Ja'uc ti Giezie jelavem xa ech'el yu'unic ti laj xa smetsanbe ti vaxton ta sat ti quereme. Mu ja'uc ta xjoybij talel ti quereme. Tey bat snup talel ta be Eliseo ti Giezie, ti xi laj yalbe ya'ie: —Ti quereme mu cha'bel xjoybij talel.

³²C'alal c'ot ta na ti Eliseoe, chamem xa ti quereme, ti telel xa ta teme.

³³Va'i un, ti Eliseoe och batel ti ta nae. Laj smac ti ti'nae. Lic sta ta c'oponel ti Diose. C'ajomal stuc xchi'uc ti querem oyic ta yute.

³⁴Laj taj une, muy ti bu puch'ul ti quereme. Lic spuch'an sba ta sts'el ti quereme. Lic stijan ye, sat, sc'ob ta stojol ti quereme. Laj slats' ta petel ti quereme. Jech ti quereme joybij talel ti xq'uixnale.

³⁵Ti Eliseoe lic va'iuc un, ti xvalc'uj sutbij ta xanvil ta yut nae. Muy xtoc ti bu puch'ul ti quereme. Lic snaban ta sti' yo'nton ti quereme. Ta jech to yepal un, lic jat'isajuc vucub velta ti quereme, lic svic' ti sate.

³⁶Ti Eliseoe laj yavta ti Giezie, ti xi laj yalbe ya'ie: —Ic'o talel ti sunamita antse. Ti Giezie jech laj spas. C'alal c'ot ti bu oy ti Eliseoe, xi albat yu'une: —Ilo ti avole.

³⁷Ti antse nopaj ech'el, lic snujan sba ta yoc ti Eliseoe. Laj spet loq'uel ti yol ta na ta ts'acal to une.

³⁸Laj taj une, ti Eliseoe sut ech'el ta Gilgal. C'alal jech yorail ta vo'ne taje, ja' o oy jun muc' ta v'inal ti bu taje. C'ot ta pasel ti joyolic ta chotlej ti j'alc'opetic ta sts'el ti Eliseoe, ti xi laj yalbe ti smosove: “Cajano ta c'oc' ti muc' ta bine, ta xalacanbe sve'el ti j'alc'opetique.”

³⁹Oy jun ta scotolic ti loc' ech'el ta osiltic ta sa'el talel ti c'usi ta xtun yu'unique. Laj sta jpets colemal te' ti oy sat ti co'ol s'elan te'tical ts'ole. Laj xchup talel ta sloin c'u' ti c'u yepal x'oche. C'alal sut ech'ele, lic sbojilan, laj stic' ochel ta bin ta sta'ajesel ti mu ja'uc sna' c'usie.

⁴⁰Ta ts'acal to un, lic yich' jots'el yo' ta slajesic ti j'alc'opetique. C'alal lic xa slo'ique, xi avanique: —¡J'alc'op, mu chamebal ve'lil ma' ti laj yich' lacanel une! Mu'yuc xa laj slo'ic un.

⁴¹Ja'uc ti Eliseoe xi lic yale: —Ich'beicun talel jutebuc ninal trigo. Laj stic' ochel ti ninal trigo ta bine, ti xi laj yale: —¡Ac'beic slajesic ti c'u yepal li' oyic tanae! Ti c'u yepal oyique laj slo'ic. Ma'uc xa jun jmilvanej ma' ti ve'lil oy ta bine.

⁴²Laj taj une, c'ot jun vinic ti liquel ech'el ta Baal-salisá ti yich'ojbe ech'el jtob ta bej pan ti Eliseo ti meltsanbil ta jchop o trigo ti ja' to no'ox ta'ajem ech'ele, xchi'uc yaxal trigo ti tiq'uil ech'el ta snuti'e. Ti Eliseoe xi laj yalbe mantal ti smosove: —Ac'bo sve'ic ti c'u yepal li' oyique.

⁴³Ja'uc ti mosovil une xi laj staq'ue: —¿C'u ono'ox la xachi xana' ta xcac'be pan ti vo'vinic (100) ta vo' ti li' oyique? Ti Eliseo xi laj staq'ue: —Ac'bo ti c'u yepal li' oyique yo' jech ta sve'ic. Ti Diose laj xa yalbun ca'i ti ta to xcom scomelal ti c'u yepal ta sve'ique.

⁴⁴Ja' yu'un un cha'e, ti mosovile laj yac'be stunesic ti laj sve'ique, ti com to scomelal jech c'u cha'al laj ono'ox yal ti Diose.