Read Tzotzil 2 Reyes 5 Bible Online

2 Reyes 5 - Tzotzil bible

2 Reyes 5

¹Oy jun vinic sbiinoj Naaman, banquilal jpas-mantal yu'un yajsoldado ti ajvalil ta Siriae, ti lec x'ilee, ti lec c'uxubinbil yu'un ti ajvalile, ti cuch yu'un ta spojel ti Siria ta sventa ti Diose. Ja'uc ti vinic taj une, ip ta xa'i ta c'a'emal.

²Oy jun ta scotol ti xvoletic ta tsacvanej ta leto ti siriaetic ta scontrainel ti israeletique, laj stsaquic ech'el ta chuquel jun tseb, ti com ta mosovil ta stojol yajnil ti Naamane.

³Ti tseb taje xi laj yalbe ya'i ti sme' ajvale: —Ti sc'anuc xbat ta sq'uelel j'alc'op ta Samaria ti cajvale, ta xcol ma' ti sc'a'emale.

⁴Ti Naamane bat lic xchapbe ya'i yajval ti va'i s'elan laj yal ti tsebe.

⁵Ti ajvalil yu'un ti Siriae xi laj staq'ue: —Lec oy un cha'e, batan, ba q'uelo, ta jmeltsan ech'el jlicuc vun ta stojol ti ajvalil yu'un ti Israele. Va'i un, ti Naamane bat. Laj yich' ech'el lajuneb xcha'vinic mil (30,000) ta sep plata, vacmil (6,000) ta sep oro, xchi'uc lajunlic (10) ta chop c'u'il.

⁶Jech xtoc laj yich' ech'el ti jlic ts'ibabil vun ta stojol ajvalil yu'un Israel ti xi ta xale: “C'alal ta xc'ot ta atojol ti vun li'e, ta xac'bot ana' ti laj jtac talel ta atojol ti caj'opisial Naamane, ti ta xapoxta ti tsacbil ta c'a'emale.”

⁷C'alal laj yavta vun ti ajvalil yu'un Israele, lic xch'i' ta jatel ti sc'u'e, svinajeb ti mu x'ech' ta xa'i ti vul o'ntone, ti xi laj yale: —¿Mi Diosun ya'yel ta yaq'uel cuxlejal xchi'uc ta xtuch'el yo' jech ta xistacbun talel jun vinic ta xpoxtabel ti sc'a'emale? A'yio ava'iic lec, ti mu xa slequiluc ma' le' une. Ja' xa no'ox ti c'usi mu xloc' ta nopel yu'un yo' jech ta xquich' contrainele.

⁸C'alal c'ot ta sni' ta xchiquin ti j'alc'op Eliseoe, ti laj xch'i' ta jatel sc'u' ti ajvalil ta sventa ti vune, xi laj stacbe batel mantal: “¿C'u cha'al laj ach'i' ta jatel ti ac'u'e? Ac'o tal sq'uelun ti vinic taje. Ta xlic sna' ti oy jun j'alc'op li' ta Israele.”

⁹Bat ti Naamane, xchi'uc ti scarretae, ti sca'taque, ti va'al c'ot ta sti' sna ti Eliseoe.

¹⁰Ja'uc ti Eliseoe laj stac batel jun j'al-mantal ti xi bat yalbe ya'ie: “Batan, ba la poco aba vucub la velta ta uc'um Jordán. Tusbil pocbil ta xc'ot ti abec'tal yu'un ti c'a'emale.”

¹¹Ti Naamane xi xvulvun xa batel ta scapemal sjole: —Laj jnop ti ta xloc' talel snupun ta be, ti va'al xa ta sta ta c'oponel ti Dios yu'une. Ta xjax jelavel sc'ob ti bu ipe, ti ta xcol ti jc'a'emale.

¹²¿Mi mu ja'uc x'ech' to yutsil yuc'umal ti Damascoe, yuc'umal ti Abanae, yuc'umal ti Farfare, ti ja' mu sta yutsil scotol ti uc'umetic ti oy ta Israele? ¿Mi mu ja'uc lec ti teyuc no'ox laj jpoc jba yo' jech ta xicol yu'un ti jchamel jechuque? Soquet xa ech'el sjol loc' batel ti bu taje.

¹³Ja'uc ti yajtuneltaque nopajic ech'el ta sts'el ti xi laj yalbeic ya'ie: —Ati lajuc yalbot ti j'alc'op ti tsots ta j'ech'el ti c'usi sc'an xapase, ¿mi mu tauc xapas xana'? Ja'uc le' une, c'ajomal no'ox laj yal ti ta xapoc aba yo' jech ta xacol, ti tsots sc'oplal ta xapase.

¹⁴Ti Naamane bat smul sba vucub velta ta uc'um Jordán jech c'u cha'al albat yu'un ti j'alc'ope. Xch'ulet no'ox liquel ti sbec'tal jech c'u cha'al junuc ti jch'iel quereme col ti xchamele.

¹⁵Va'i un, ti stuque xchi'uc ti xchi'iltaque sutic ech'el ta stojol ti Eliseoe. C'alal c'otic ta stojole, ti Naamane xi laj yale: —¡Avi ta une, c'ot ta jol ta jbaquil ti mu'yuc ta tael Dios ta sbejel ti banomile, yu'un ja' no'ox li' ta Israele! Avocoluc un cha'e, tsacbun, ich'bun ti matanal ti ta xac' ti avajtunel li'e.

¹⁶Ja'uc ti Eliseoe xi laj staq'ue: —Jamal xcal ava'i ta sba ta sat ti Dios ti yilojune, mi ja'uc ta jtsac ti matanale. Ac'o mi xvocolet ti Naamane, jbel sc'oplal mu'yuc laj stsac matanal ti Eliseoe.

¹⁷Va'i un, ti Naamane xi laj yale: —Ti mi jech taj un cha'e, ac'o ave ati' ti ta jcuch batel cha'cotuc ta ca' ti lum li' ta Israele. Ti avajtunel li'e mu'yuc xa ta xlic yac'be chic'bil milbil matanal ti yan diosetique, c'ajomal xa no'ox ti Diose.

¹⁸Jun xa no'ox ma' ti xi s'elan ta jc'anbe vocol ti Diose, ti ac'o xch'aybun ti jmul colo'e: ti c'alal xbat ta xch'ulna Rimón ti cajval ti sbic'tajesoj sba ta yich'el ta muq'ue, ti quiquil xa ta jtojole, ac'o xisch'aybun jmul jcolo' ti Dios ti ta jquejan jba eque.

¹⁹Ti Eliseoe xi laj staq'ue: —Junuc avo'nton, batan. Loc' batel ti Naamán bu taje. Xi xa snatil xloc' batele,

²⁰c'alal ti Giezi smosov ti j'alc'op Eliseoe, xi laj snope: “Ti cajvale sq'ueloj no'ox bat ti Naamán ti ja' jun sirioe. Mi ja'uc laj stsacbe comel ti c'usi yich'oj talele. Jamal xcal ta sba ta sat ti Diose, ta xba jta ta be ta anil. Jq'ueltic quic mi oy c'usi ta xiyac'bun talele.”

²¹Ti Giezie tijil bat ta spat ti Naamane. C'alal ile ti nabal batel ta patile, yal ta scarreta yo' jech tal snupvanuc ta be, ti xi jac'bate: —¿Mi oy c'usi chopol c'ot ta pasel?

²²—Mu'yuc —xi laj stac' ti Giezie—. Ja'uc ti cajvale laj stacun talel ti tal calbot ava'i ti naca to no'ox vul chib querem j'alc'opetic ti liquel talel ta vitstic yu'un ti Efraine. Ta sc'anbot vocol ti ac'bo la ech'el oxmiluc (3,000) ta sep plata taq'uin, xchi'uc cha'chopuc c'u'il.

²³Ti Naamane xi laj staq'ue: —Ich'o batel vacmiluc (6,000) ta sep plata taq'uin un cha'e, avocoluc. Ti Naamane mu xlaj yo'nton ta vulvunel ti yich'uc batele. Va'i un, laj stic' ochel ta cha'lic uni coxtal jmoj xchi'uc ti cha'chop c'u'ile. Scotol laj yac'be ech'el ti cha'vo' smosov ti jba'be ech'el yu'un ti Giezie.

²⁴C'alal c'otic ta stseleje, ti Giezie lic yich' ti plata taq'uin ti yich'ojic batel ti mosovile. Lic sq'uej ta na. Laj sc'oponan batel ti mosovile.

²⁵Laj taj une, bat ta stojol ti yajvale. Xi jac'bat yu'un ti Eliseoe: —¿Bu la'ay talel le'e, Giezi? —Mu'yuc bu jotucal xi'ay —xi laj stac' ti Giezie.

²⁶Ja'uc ti Eliseoe xi xvulvun liquele: —C'alal yal ta scarreta ti jun vinic ti tal snupot ta bee, jchi'inojot me ta jol jbaquil. Ja'uc le'e, ma'uc to yorail ta yich'el ti taq'uine, ta yich'el ti cha'chop c'u'ile, ta smanel osil ta yavil ti ts'unubale, ti ts'unbil uvaetique, ti chijetique, ti vacaxetique, ti mosoviletique mi vinic mi ants.

²⁷Ja'uc le' une, sc'a'emal chamel ti Naamane, sbatel osil nabal ta xc'ot ta atojol xchi'uc ti anitilultaque. C'alal laj xch'ac sba batel ti Giezi ta stojol ti Eliseoe, co'ol xa s'elan bot sac lo'an ta q'uelel ti sbec'tale. Tsacbil xa ta c'a'emal ta j'ech'el.