Read Tzotzil 2 Reyes 9 Bible Online

2 Reyes 9 - Tzotzil bible

2 Reyes 9

¹Ti j'alc'op Eliseoe laj yic' talel jun ta scotol ti c'u yepal oyic ti j'alc'opetique, ti xi laj yalbee: —Chapano aba, yu'un oy bu ta xabat. Ilo ti jun limite aceite li'e, batan ta Ramot ti oy ta Galaade.

²C'alal mi lac'ot ti bu taje, sa'o ti Jehú xnich'on ti Josafate, smom ti Nimsie. Ochan batel ti bu oye, ch'aco loq'uel ta stojol ti xchi'iltaque, ti stuc xavic' ochel ta jc'ol na.

³Tamo ti jun limite aceitee, ti xi xavalbe ti c'alal ta xacocanbe ta sjol ti aceitee: ‘Xi ta xal ti Diose: Ta xcac' anup avabtel ta ajvalilal yu'un ti Israele.’ Jamo ta anil ti ti'nae, jatavan loq'uel ta stojol.

⁴Ti querem vinic j'alc'ope bat ta Ramot ti oy ta Galaade.

⁵C'alal c'ot ti bu taje, tsobolic c'ot sta ti banquilaletic yu'un ti soldadoetique. Va'i un, xi laj yalbee: —Oy c'usi tsots sc'oplal tal calbe ya'iic ti banquilal cu'une. —¿Buch'u junucal cu'uncutic ta jcotolcutic? —xi laj stac' ti Jehue. —Ja' li vo'ote, cajtsobvanej —xi laj yal ti j'alc'ope.

⁶Loc' batel ti Jehue, och batel ta jc'ol na. Va'i un, ti j'alc'ope laj scocanbe ti aceite ta sjole, ti xi laj scaj'albe ya'ie: —Xi ta xal ti Ajvalile, Dios yu'un ti Israele: ‘Ta xcac' anup avabtel ti ta xa'och ta ajvalilal yu'un ti Israele, ti ja' calab jnich'nabe.

⁷Vo'ot ta xatsutsesbe sc'oplal snitilultac ti Acab ti avajvale, ja' to jech ta xapacbe sutel ti laj smalbeic xch'ich'el ti caj'alc'optaque, ti cajtuneltaque, ta spaybil c'op ti Jezabele.

⁸Ta xich' tsutsesel scotol snitilultac ti Acabe, xchi'uc ti squerem nich'nab ti nacalic ta Israele. Mi ja'uc jun ti cuxul ta xcom cu'une.

⁹Co'ol jech ta jpasbe snitilultac ti Acabe jech c'u cha'al laj jpasbe ta stojol snitilultac ti Jeroboam xnich'on ti Nabate, xchi'uc jech c'u cha'al laj jpasbe ti Baasa xnich'on ti Ahiase.

¹⁰Ja'uc ti Jezabele, ja' ta xc'ot ta yaj'muclumal ti ts'i'etic xve' yu'un ta osiltic yu'un ti Jezreele.’ C'alal laj yal taje, laj sjam ti ti'nae. Jatav loq'uel ti j'alc'ope.

¹¹C'alal bat stsob sbaic xchi'uc yaj'opisialtac yajval ti yaj'ajvalil ti Jehue, xi jac'bate: —¿C'usi c'ot ta pasel? ¿C'u cha'al tal sq'uelot ti chuvaj le'e? —Yu'un vulem ta ajolic, xavojtiquinic ti c'u s'elan xc'opoje —xi laj stac' ti Jehue.

¹²—Mu xalo'launcutic —xi laj stac' ti stuquique—. ¡Quere, albun ca'itic scotol! Va'i un, ti Jehue xi laj staq'ue: —Ja' jech laj yalbun jech c'u cha'al li'e: ‘Xi ta xal ti Diose: Ta xcac' anup avabtel yo' jech ta xa'och ta ajvalilal yu'un ti Israele.’

¹³Ta jech yepal ti jujunique laj slosanic ta lum ta yoquic ti smacobil sic yu'unic ti oyic ta scojol cojol tec'obale. Laj taj une, lic yoq'uisanic ti xulub chije, ti xi lic avanicuque: “¡Ajvalil xa ti Jehue!”

¹⁴Ti Jehú xnich'on ti Josafate, smom ti Nimsie, lic sjol ta scontrainel ti Jorame. Ti Joram ti jech jmoj sjolic xchi'uc ti Israele, ta spojic ti jteclum Ramot ti oy ta Galaade. Jech ta stsacvan ta letovajel ti Hazael ti ja' ajvalil yu'un ti Siriae.

¹⁵Ti jech taje, ti Jorame sut xa ox talel ta Jezreel ta xpoxtael sba, ti jech yayijesat ti c'alal laj stsac sbaic ta leto xchi'uc ti Hazaele. Ti Jehue laj yalbe ya'i ti xchi'iltaque, mi ta melel ta sc'anic ti ja' ta xc'ot ta ajvalil yu'unique, sc'an ti mu'yuc buch'u junucal ti ta xloc' batel ta jteclum ti xchapbel ya'i ti jteclum Jezreele.

¹⁶Ts'acal to un, caji batel ta scarreta sventa ti ac'ob-letoe. Bat c'alal to Jezreel ti bu batem ta poxtael ti Jorame. Ja' jech xtoc ti Ocozías ajvalil yu'un ti Judae, batem ta svu'lanel ti Jorame.

¹⁷C'alal c'ot ta sat ti jq'uel-osil ta toyol luchlebal ta Jezreel ti xvolet batel svinictac ti Jehue, xi avanique: —¡Oy buch'u le' xtalique! Ti Jorame xi laj yal mantale: —Taquic batel junuc vinic ti cajal ta xbat ta ca'e yo' jech ta sjac'be mi lequilal ti sc'op yich'ojic talele.

¹⁸Jech ti buch'u cajal ta ca'e bat snup ta be ti Jehue. Xi laj yalbee: —Ti ajvalile laj stac talel mantal ta sjaq'uel mi lequilal ti c'op avich'ojic talele. Xi laj stac' ti Jehue: —Le'e, mu xu' ta xcalbot ava'i. ¡Nablan no'ox talel ta jpat quere! Va'i un, ti jq'uel-osile xi laj yale: —Ti j'al-mantal j'ich'-c'ope c'ot ti bu oyique. Ja' no'ox un, vinaj ti mu'yuc sut o talele.

¹⁹Ti ajvalile, ta ora no'ox xtoc, laj stac batel yan vinic ti cajal bat ta ca'e, ti xi c'ot yal ti bu oyique: —Ti ajvalile laj stacun talel ta sjac'belot mi lequilal ti c'op avich'ojic talele. Ti Jehue xi laj staq'ue: —Ma'uc aventa ta xcalbot ava'i. ¡Nablan no'ox talel ta jpat!

²⁰Ti jq'uel-osile xi no'ox lic yal xtoque: —Ti xchibale c'ot xtoc ti bu oyique. Ja' no'ox un, vinaj ti mu'yuc sut talele. Xaval yilel ti buch'u yic'oj talel ti carretae, ja' ti Jehue, smom ti Nimsie. Yu'un chuvajibem sjol yilel ti c'u s'elan yic'oj talele. Ja' no'ox ta spas ti c'usi lec ta xa'i yilele.

²¹Va'i un, ti Jorame xi laj yal ti mantale: —¡Tsacanbeic scarretail sventa pasob-leto ti jca'e! Laj stsacanbeic ti spasob leto carretae. Jech ti Joram ajvalil yu'un ti Israele, xchi'uc ti Ocozías ajvalil yu'un ti Judae, jujucot scarretaic sventa pasob-leto, loq'uic batel ti bat snupic ta be ti Jehue. Laj snupic ta be ta yosil Nabot ti liquel talel ta Jezreele.

²²C'alal ti Joram laj yil ti Jehue, xi laj yalbee: —¿Mi lequilal c'op ti avich'oj talele, Jehue? Ti Jehue xi laj staq'ue: —¿C'u ono'ox xachi lequilal to ti c'op quich'oj talele, c'alal ti ame' Jezabele yac'ojbe yipal ti mulivajele, xchi'uc ta yaq'uel ti chamele?

²³Ta jech no'ox yepal joybij sutel ti Jorame. Jatav batel ti c'alal xi ta xavta ti Ocoziase: —¡Jmileltic xa, Ocozías!

²⁴Ti Jehue laj xach' ti syolobe. Laj yac'be ech'el ti Jorame. Lec laj sts'apbe ta spat ti toj jelavel ta yo'ntone. Ti Jorame j'ech'el ac'bat ti xpujlij yalel ta yut scarretae.

²⁵Ti Jehue xi laj yalbe mantal ti Bidcar ti ja' yajcoltaobbae: —Jocho loq'uel talel ya'i teye. Bat jipo ta yosil Nabot ti oy ta Jezreele. Yu'un mu'yuc to ch'ayem ta jol, ti c'alal yacalotic ta xanvil ta ac'ob-leto carreta yu'un ti Acab ti ja' stote, ti xi caj'albat sc'oplal yu'un Dios ti Jorame:

²⁶‘Jech c'u cha'al laj quil volje, ti mal xch'ich'el ti Nabot xchi'uc ti xnich'nabe, jech ta xavich' cu'un ec ta banomil ti bu taje. Ti vu'un Diosune, mu me lo'iluc no'ox ta xcal.’ Ja' yu'un un, poyo batel, ba ac'o ta yosil Nabote jech c'u cha'al scaj'aloj ti Diose.

²⁷C'alal laj yil ti Ocozías ajvalil yu'un ti Judá ti jech c'ot ta pasele, jatav ech'el ta Bet-hagan. Ja'uc le' une, nutsbil batel yu'un ti Jehue, ti xi laj yal ti mantale: —¡Milic ya'i le' eque! Laj staic ta yayijesel ta yut scarreta ta stselej Gur, ta nopol Ibleam ti xcham o xa xchi'uque, ti cuch to batel yu'un jatobal c'alal to Meguido. C'ot ta chamel ti bu taje.

²⁸Ts'acal to un, cuchbil bat ta carreta yu'un smosovtac ta Jerusalén. Laj smuquic ta smuquinal yuts' yalal ta Steclumal ti Davide.

²⁹C'alal lic ochuc ta ajvalilal ti Ocozías ta Judae, xbuluchibal (11) xa jabil yochel ta ajvalilal ti Jorame, xnich'on ti Acabe.

³⁰Ti Jehue sut talel ta Jezreel. C'alal laj ya'i ti Jezabele, ic' joyanic xa lic sbon ti sate. Laj yac'be lec xnichimal ti sjole. Ts'acal to un, xcujet batel, bat q'uelvanuc ta ventana.

³¹C'alal c'ot ta ochebal sti' jteclum ti Jehue, xi albat yu'un ti antse: —¿C'uxi a'elan un, Zimri, uni jmil ajvalil?

³²Ti Jehue laj sq'uel ech'el ti ventana ti xi laj yalbe ya'ie: —¿Buch'u ti co'ol jol co'nton xchi'uque? Chib oxibuc j'opisialetic ti laj yac' sbaic ta ilel ta nae.

³³Va'i un, xi albatic mantal yu'un ti Jehue: —¡Jipic yalel talel ya'i ti ants le'e! Ti stuquique laj sjipic yalel. Ch'itomtic c'ot jlom ti xch'ich'el ta yibel nae, ta ca'etic ti ech' balatuc ta teq'uel ti Jezabele.

³⁴Laj taj une, ti Jehue bat ve'uc uch'bajuc. Ta sjalil xa un, xi laj yal mantal ti Jehue: —Bainic ti j'ac'-ti'ol ants le'e. Muquic yu'un yantsil nich'on jun ajvalil.

³⁵Ja'uc le' une, ti c'alal batic ta smuquele, c'ajomal xa no'ox laj stabeic ti sbaquil sjole, ti yacane, xchi'uc ti xpach'omaltac sc'obe.

³⁶Va'i un, sutic ech'el ta yalbel ya'i ti Jehue, ti xi tac'batic yu'une: —Ti Diose xi ono'ox laj yal ta sventa ti Elías yajtunel ti liquem talel ta Tisbee: ‘Sbec'tal ti Jezabele, ta xlaj ta ts'i' ta osil yu'un ti Jezreele.

³⁷Co'ol s'elan c'a'ep tanijem ta xcom sbec'tal ta osil yu'un ti Jezreele, ti ta xc'ot ta pasel ti mu xa x'ojtiquinaj ti buch'ue.’