Read Tzotzil 1 Crónicas 12 Bible Online

1 Crónicas 12 - Tzotzil bible

1 Crónicas 12

¹C'alal jipbil tenbil loq'uel ta osil ti David ta scoj ti Saúl xnich'on ti Cise, oy jvoc' j'ac'-letoetic ti mu sna' xi'ique, ti lic svol sbaic ta letovajel xchi'uc David ta Siclage.

²Ti j'ac'-letoetic taje, xi s'elan ti jel ts'aquic xchi'uc yabtejebic ti chapalic lec xchi'uc ti syolobique, ta sjipel ton xchi'uc ti sjimich'ique, ta xach' no'ox syolobic ta sbats'i c'obic ta sts'et c'obic. Naca yuts' yalal sbaic xchi'uc Saúl ti liquem talel sts'unubal ta stojol Benjamín ti xi sbiique:

³Ti banquilal jtsobvanej yu'unique, ja' ti Ahiezere, xchi'uc ti Joase, xnich'nab ti Sema ti liquel talel ta jteclum Gabaae: Ti Jeziele xchi'uc ti Pelete, xnich'nab ti Azmavete. Ti Beracae xchi'uc ti Jehue, ti liquel talel ta jteclum Anatote. Ti Ismaías ti gabaonitae, ti c'otem ta jun banquilal yu'unic ti lajuneb xcha'vinic (30) ta vo' ti mu sna' xi'ique. Ti Jeremiase. ti Jahaziele, ti Johanane, ti Jozabade, ti Guederae, ti liquel talel ta Guederae. Ti Eluzaie, ti Jerimote, ti Bealiase, ti Semariase. Ti Sefatías ti harufitae. Ti Elcanae, ti Isiase, ti Azarele, ti Joezere, xchi'uc ti Jasobeame, ja'ic ti coreitaetique. Ti Joelae, xchi'uc ti Zebadiase, xnich'nab ti Jeroham ti liquel talel ta Gedore.

⁸Oy jlom xtoc snitilultac ti Gade laj snaban sbaic ta stojol David ti c'alal tiq'uil ta nac'obbail ta sbajtical banomile. Naca banquilal j'ac'-leto ti mu sna' xi'ique, ti xchanojic lec ti letoe, ti chapalic lec xchi'uc ti smacobbailique, xchi'uc ti slanzaique. Co'ol s'elan jti'vanej león ta q'uelel ti xbitic no'ox ta te'tic jech c'u cha'al ti te'tical chije.

⁹Xi xcholet ti sbiique: Ti sliquebale, Ezer. Ti xchibale, Obadías. Ti yoxibale, Eliab. Ti xchanibale, Mismaná. Ti yo'obale, Jeremías. Ti svaquibale, Atai. Ti yucubale, Eliel. Ti xvaxaquibale, Johanán. Ti sbalunebale, Elzabad. Ti slajunebale, Jeremías. Ti sbuluchibale, Macbanai.

¹⁴Snitilultac ti Gad taje, naca banquilaletic yu'un ti jujuvoc' soldadoetique. Ti jun ti buch'u c'otem ta uni its'inal yu'unique, sbainoj vo'vinic (100) ta vo' svinictac. Ti buch'u c'otem ta banquilal yu'unique, sbainoj lajuneb ciento (1,000) ta vo' svinictac.

¹⁵Ja'ic ma' taj une, laj xtuch'ic jelavel uc'um Jordán ta yorail chaquilo' c'alal nojem ti uc'um c'alal sti'ile. Jatav loq'uel scotol yu'unic ti jnaclejetic ti oyic ta yelov sloq'ueb c'ac'ale, ti oyic ta yelov smaleb c'ac'al ti oy ta stenleje.

¹⁶Ma'uc no'ox taje, oy jlom snitilultac ti Benjamine, xchi'uc snitilultac ti Judae, bat svol sbaic xchi'uc ti David ta nac'obbaile.

¹⁷Xi albatic yu'un David ti bat nupaticuc ta bee: “Ti mi ta lequilal latalic ta scoltaelune, ta sjunul co'nton ta xcac' que ti jvol jbatic ta jmoje. Ti mi ja' no'ox tal apaybeicun jc'oplal ta xavaq'uicun ech'el ta yoc ta sc'ob ti cajcontra ti c'alal mu'yuc yalem coc jc'ob ta stojol junuque, ti Dios yu'un ti jtot jme'tic ta vo'nee, ¡ac'o yich' ta venta ta stsitseloxuc unbi!”

¹⁸Va'i un, ti Amasai ti c'otem ta banquilal yu'un ti lajuneb xcha'vinic (30) ta vo'e, lic ventainatuc yu'un xcuxlej Dios ti xi tsots lic avanuque: “Alequilal cu'uncutic, David, xnich'on Isaí. C'otuc ta atojol ti mu'yuc c'usi xana'e. C'otuc ta stojolic ti mu'yuc c'usi sna'ic ti buch'u ta xa scoltaote, yu'un ta xa scoltaot ti Dios avu'une.” Ti David une lic svol ta stojol, lic yac'anbe yabtel ta stojolic ti banquilaletic yu'un ti jujuvoc' soldadoetique.

¹⁹Oy jlom snitilultac ti Manasés xtoque jelavic batel ta stojol David c'alal bat xchi'in ta naclej filisteoetic ta scontrainel ti Saule. Ta jbel sc'oplal ti Davide, mu'yuc c'usi laj yut ta scoltael ti filisteoetique. C'alal tsobolic xa ti jpas-mantaletic yu'unic ta ts'acal une, xi laj yalbeic ya'iic ti c'alal laj snop ti sc'opique: “¡Li' no'ox c'alal ta xchi'ineluncutique, yu'un xu' ta jtoj ta jolcutic yu'un ti avajval Saule!”

²⁰Ti viniquetic snitilultac ti Manasés ti jelavic ta stojol David c'alal bat ta Siclage, ja' ti Adnae, ti Jozabade, ti Jediaele, ti Micaele, ti Jozabade, ti Elihue, xchi'uc ti Ziletaie, banquilal jtsobvanejetic yu'un epal soldadoetic yu'un ti Manasese.

²¹Taje, ja'ic ti banquilal jvolvanejetic yu'un ti jujuvoc' soldadoetic ti laj scoltaic ti Davide, scotolic naca tsatsaquil j'ac'-letoetic ti mu sna' xi'ique, c'otic ta banquilaletic yu'un ti jujuvoc' soldadoetique.

²²Jujun c'ac'al, yantic stsob sbaic talel yajcoltaobba ti Davide, ja' to ti c'uxi c'ot ta jvoc' epal soldadoe. Stuc no'ox spajebal o ta q'uelel ti yepalique.

²³Xi yepal ma' ti soldadoetic ti chapalic xchi'uc yabtejebic ta letovajel ti laj svol sbaic xchi'uc David ta Hebrón yo' ta xich'be yabtel Saúl ti laj yac' ye sti' ti Diose:

²⁴Ta snitilultac ti Judae, vacmil xchi'uc vaxaquib ciento (6,800) ta vo' viniquetic ti oy lec smacobbailique, xchi'uc ti slanzaique, ti chapalic lec ta sventa ti ac'-letoe.

²⁵Ta snitilultac ti Simeone, vucmil xchi'uc vo'vinic (7,100) ta vo' j'ac'-letoetic ti mu sna' xi'ique, ti oy lec yabtejebic ta sventa ti ac'-letoe.

²⁶Ta snitilultac ti Levie, chanmil xchi'uc vaquib ciento (4,600) ta vo'.

²⁷Oy to oxmil xchi'uc vucub ciento (3,700) ta vo' ti xchapalul ti Aarone, xchi'uc ti Joiada ti banquilal yu'unique.

²⁸Oy chib xcha'vinic (22) ta vo' xtoc banquilaletic yu'un ti jujuvoc' yuts' yalal sbaic svoloj ti banquilal j'ac'-leto querem vinic Sadoc ti mu sna' xi'e.

²⁹Ta snitilultac ti Benjamine, xchapalul ti Saule, oxmil no'ox (3,000) ta vo' viniquetic, ti yepalic vinaj ta ts'acal ti co'ol sjol yo'ntonic xchi'uc ti Saule.

³⁰Ta snitilultac ti Efraine, jtob ta mil xchi'uc vaxaquib ciento (20,800) ta vo' j'ac'-letoetic ti mu sna' xi'ique, ti vinajem sc'oplalic ti xchapalul sbaique.

³¹Ta o'lol jvoc' snitilultac ti Manasese, vaxaclajunmil (18,000) ta vo' viniquetic ti laj yich'ic va'anel yo' ta xac'beic yich' yabtel ta ajvalilal ti Davide.

³²Ta snitilultac ti Isacare, lajunvinic (200) ta vo' banquilaletic sbainojic ta spasel mantal ta scotol ti jujuchop nitiluletique, viniquetic ti xa'i ta sjolic ti c'usi xu' stac' spas ti Israele.

³³Ta snitilultac ti Zabulone, lajuneb yoxvinic mil (50,000) ta vo' soldadoetic smalaojic ta xlic ti letoe, ti oy ep ta tos yabtejebique, ti sjunul yo'ntonique, ti mu'yuc xi'el yu'unic ta scoltael ti Davide.

³⁴Ta snitilultac ti Neftalie, jmil (1,000) ta vo' banquilaletic, ti oy vuclajuneb xcha'vinic mil (37,000) ta vo' viniquetic yu'unic ti chapalic lec xchi'uc ti slanzaique, xchi'uc ti smacobbailique.

³⁵Ta snitilultac ti Dane, vaxaclajuneb xcha'vinic ta mil xchi'uc vaquib ciento (28,600) ta vo' soldadoetic.

³⁶Ta snitilultac ti Asere, cha'vinic mil (40,000) ta vo' soldadoetic ti chapalic smalaojic ta xlic ti ac'-letoe.

³⁷Ma'uc no'ox taje, ta jot uc'um Jordane, talemic yan vacvinic mil (120,000) ta vo' viniquetic ti chapalic lec xchi'uc ep ta tos abtejebal yu'unique, ti ja' snitilulic ti Rubene, ti Gade, xchi'uc ti o'lol jvoc' snitilultac ti Manasese.

³⁸Scotol ti j'ac'-letoetic ti va'i yepalic svoloj sbaic lec ta yaq'uel letoe, sjunul yo'ntonic mu'yuc xi'el batic ta Hebrón ta xchotanel ta ajvalil yu'un sjunul Israel ti Davide. Scotol ti yan israeletique c'ot ta yo'ntonic ec ti jech sc'an pasele.

³⁹Oxib c'ac'al sjalil, vololic ta stojol ti Davide, ti xve'ic xuch'ic no'ox vo'e, ti chapal lec yu'un ti svinquilelic ti c'usitic ta stun ta slajesique.

⁴⁰Ma'uc no'ox taje, ti yan yuts' yalal sbaic ti nopol nacalique, jech laj spasic ec. Jech xtoc ti jlom snitilultac ti Isacare, ti Zabulone, xchi'uc ti Neftalie, jech laj spasic ti laj yich'ic batel ve'lil ti xcuchoj batel ti burroetique, ti camelloetique, ti ca'etique, ti xjochojic batel ta carreta ti vacaxetique, ti xi s'elan xlic ta lum ti c'usiticuc no'ox ve'lil laj yich'ic batele: ti juch'bil trigoe, ti pan meltsanbil ta icuxe, ti taquintasbil sat uvae, ti vinoe, ti aceitee, ti tot vacaxetique, xchi'uc ti chijetique, ti busul no'ox scotol ta jyalele, ti spajebal xa no'ox muyubajel ta Israele.