Read Tzotzil 1 Crónicas 13 Bible Online

1 Crónicas 13 - Tzotzil bible

1 Crónicas 13

¹Ti Davide laj yich'be ye sti' ti jpas-mantaletic yu'un ti jvoc' epal soldadoetique, xchi'uc ti banquilal soldadoetique, ti xcaltique, scotolic ti buch'u cajal yabtel yich'ojique.

²Ts'acal to un, xi laj yalbe scotol ti jteclum Israele: “Mi ta xac' ye sti' ti Dios cu'untic ti jech jpastique, mi lec ta xava'iique, la' jtactic batel mantal ta stojol ti jvinquileltic ti buyuc no'ox nacajtic ta yosilal ti Israele, xchi'uc ta stojol scotol ti paleetique, xchi'uc ti levitaetic ti oyic ta steclumalic yosilic ta sq'uelob chijique, yo' jech ta jtsob jbatic ta jmoj xchi'uquique.

³Ts'acal to un, ba quich'tic talel ti xcaxa Dios cu'untique, ti ta yorail to ox tiq'uil ta yabtel Saúl lic ch'ayuc talel ta co'ntontique.”

⁴Scotol jteclum laj yac' sjolic ti jech ac'o yich' pasele. Scotolic lec laj ya'iic ti jech c'ot ta nopele.

⁵Lic talel ta Sihor, ech' ta ts'ac yu'un Egipto, c'ot c'alal to ochebal yu'un Hamat, ti sjunul Israel laj stsob talel ti Davide yo' jech xbatic ta yich'el talel ti xcaxa Dios ti oy ta Quiriat-jearime.

⁶C'alal muy batel ta Quiriat-jearim ti sbiinoj to ox Baalá ti oy ta yosilal ti Judae, xvoletic no'ox batel scotol ti Israel ta xchi'inele, yo' jech ta xich'ic loq'uel ti xcaxa Dios teye, ti staobil ta c'oponele, ti chotol ta ventainvanej ti bu va'al ti c'usi oy xiq'uique.

⁷Ti caxae, laj sloq'uesic talel ti oy ta sna ti Abinadabe. Laj scajanic muyel ta jun ach' carreta, laj yich'ic batel un. Ti Uzae, xchi'uc ti Ahioe ta sq'uelic ech'el ti nitbil batel ti carretae.

⁸Xlomet no'ox batel scotol ti musicaetique, ti arpaetique, ti jchop o ta vobe, ti chij-chij taq'uine, ti set-set taq'uine, ti oq'uesetique. Ti Davide, xchi'uc scotol ti israeletique, xq'uejinic x'ac'otajic no'ox batel ta sba ta sat ti Dios ti bu xa c'alal xu' yu'unique.

⁹C'alal c'otic ti bu na'bil yu'unic sbiinoj Smajob trigo ti Quidone, c'alal macal c'ot yacan ti vacaxetique, ti Uzae laj xach' batel sc'ob ta yiquel ti caxae.

¹⁰Ja'uc le' une, ilin ti Dios ta stojol ti Uza ti laj xach' batel ti sc'ob ta yiquel ti caxae. Ta jliquel no'ox laj xtuch'be xcuxlejal ta sba ta sat ti bu taje.

¹¹Ti tuch'bat xcuxlejal yu'un Dios ti Uzae, mu x'ech' xjelav laj ya'i ti Davide. Jech o xal ti bu taje, laj yac'be sbiin Peres-uzá ti jech sbiinoj avi tana le'e.

¹²Ti c'ac'al taj une, xi' ta j'ech'el ti David ta stojol ti Diose, ti xi lic avanuque: “¡Laj to me c'op ta yich'el batel ma' ti xcaxa Dios une!”

¹³Mu'yuc xich'ic batel ti caxa ta Steclumal ti Davide. Laj yal mantal ti yich'icuc batel ta sna ti Obed-edom jun vinic ti nacal ta jteclum Gate.

¹⁴Oxib u sjalil com ti xcaxa Dios ta sna ti Obed-edome. Laj sva'an sba ti Dios ta stojol scotol ti c'usitic x'ayan yu'une, xchi'uc ti c'u yepal oy ta sna ti Obed-edome.