Read Tzotzil 1 Crónicas 14 Bible Online

1 Crónicas 14 - Tzotzil bible

1 Crónicas 14

¹Ti Hiram ajvalil yu'un ti Tiroe laj stac batel yajtuneltac ta stojol ti Davide, ti albanyiletique, xchi'uc jch'ul-te'etic ti laj yich'ic talel ti ch'ut te'etique yo' jech ta xich' sva'anel sna ti bu ta spas mantale.

²Va'i un, ti Davide lic sna' ti ja' Dios stuc laj yac' ye ti c'ot ta ajvalil yu'un ti Israele, yu'un yantic stsac yip yabtel, ta x'a'yibat sc'op yu'un ti slumal Israel ti c'u s'elan ta spas mantale.

³Ti ta Jerusalene, laj yic' yan yajniltac ti Davide. Laj to yil squerem stsebtac.

⁴Ti squeremtac laj voc'uc ta Jerusalene, ja' jech ti sbiique: ti Samuae, ti Sobabe, ti Natane, ti Salomone,

⁵ti Ibhare, ti Elisuae, ti Elpelete,

⁶ti Nógahe, ti Nefege, ti Jafiae,

⁷ti Elisamae, ti Eliadae, xchi'uc ti Elifelete.

⁸C'alal laj ya'iic ti filisteoetic ti ac'bat xa snup yabtel ta ajvalil yu'un scotol Israel ti Davide, xc'uletic no'ox liquel scotolic ta sa'el. Ja'uc le'e, laj ya'i ti Davide, bat snup ta be.

⁹Va'i un, ti filisteoetique xvoletic no'ox ta xaniel ti stenlej Refaime.

¹⁰Ti jech taje, ti Davide xi laj yal ti laj yich'be ye sti' ti Diose: —¿Mi xu' xba jtsac ta leto ti filisteoetique? ¿Mi ta xavac'bun quip ti tsalbil xc'otic cu'une? Xi tac'bat yu'un ti Diose: —Ba tsaco ta leto, ta xcac'bot avip ti tsalbil ta xc'otic avu'une.

¹¹Ti Davide muy ech'el ta Baal-perazim, ti tsalbil c'ot yu'un ti bu taje. Jech o xal xi laj yale: “Co'ol s'elan jbec'vanej uc'um laj sjam be ti Dios ta stojol ti cajcontrae.” Laj yac'beic sbiin Baal-perazim ti bu taje.

¹²Ma'uc no'ox un, ti filisteoetique, stuc laj sjipic comel ti sdiosique. Ti David une laj yal mantal ti ac'o yich' chiq'uele.

¹³Ja'uc ti filisteoetique xvoletic no'ox liquel xtoc ta xaniel ti stenlej Refaime.

¹⁴Ti David ec une lic xcha'jac'be ti Diose, ti xi tac'bat yu'un ti Diose: —Mu ta yelovaluc xatsac ta leto. Joyobtao ta stsaquel ta leto ti c'u yepal xvoletic batel ta patil c'alal mi lac'ot ta balsamo te'etique.

¹⁵C'alal ta xava'i ti oy buch'u xchajajet ta xanav ta ba'bani' te'tique, ta jech yepal, jipetan batel ta yaq'uel ti letoe, ja' svinajeb ti jba'beun batel avu'un ti j'ech'el ta jmil ta yayijesel ti soldado filisteoetique.

¹⁶Ti Davide jech laj spas jech c'u cha'al albat yu'un ti Diose. Tsal yu'un ti soldado filisteoetic ti lic talel ta Gabaone, ti c'ot c'alal to Gezere.

¹⁷Vinaj batel ta scotol muc'tiquil lum ti sc'oplale. C'ot ta pasel yu'un Dios ti xi'bil c'ot ti David ta scotol ti muc'tiquil lume.