Read Tzotzil 1 Crónicas 15 Bible Online

1 Crónicas 15 - Tzotzil bible

1 Crónicas 15

¹Ti Davide laj yac' ta meltsanel naetic ti bu sbiinoj Steclumal Davide, xchi'uc laj yac' ta meltsanel jun Axibalna ti bu ta xich' q'uejel xcaxa ti Diose.

²Va'i un, xi laj yal ti mantale: “Mi junuc buch'u xu' ta xich'be batel xcaxa Dios mi ma'uc ti levitae. Ti stuquique t'ujbilic ta yich'el batel xcaxa ti Diose, ti tey ta xtunic oe.”

³Laj taj une, lic stsob scotol ti israeletic ta Jerusalene yo' ta xich' ich'el batel ti xcaxa Dios ti bu laj xa smeltsanbe ti yavile.

⁴Ja' jech xtoc laj stsob talel snitilultac ti Aarone, xchi'uc snitilultac ti levitaetique:

⁵Ta snitilultac ti Coate laj stsob sba vacvinic (120) ta vo' ti xi s'elane: Ti Uriel ti c'otem ta banquilal jtsobvanej yu'unique, xchi'uc ti yuts' yalaltaque.

⁶Ta snitilultac ti Merarie laj stsob sba buluchvinic (220) ta vo' ti xi s'elane: Ti Asaías ti c'otem ta banquilal jtsobvanej yu'unique, xchi'uc ti yuts' yalaltaque.

⁷Ta snitilultac ti Gersone laj stsob sba lajuneb yucvinic (130) ta vo' ti xi s'elane: Ti Joel ti c'otem ta banquilal jtsobvanej yu'unique, xchi'uc ti yuts' yalaltaque.

⁸Ta snitilultac ti Elizafane laj stsob sba lajunvinic (200) ta vo' ti xi s'elane: Ti Semaías ti c'otem ta banquilal jtsobvanej yu'unique, xchi'uc ti yuts' yalaltaque.

⁹Ta snitilultac ti Hebrone laj stsob sba chanvinic (80) ta vo' ti xi s'elane: Ti Eliel ti c'otem ta banquilal jtsobvanej yu'unique, xchi'uc ti yuts' yalaltaque.

¹⁰Ta snitilultac ti Uziele, lajcheb svacvinic (112) ta vo' ti xi s'elane: Ti Aminadab ti c'otem ta banquilal jtsobvanej yu'unique, xchi'uc ti yuts' yalaltaque.

¹¹Ts'acal to un, ti Davide laj sta ta iq'uel ti Sadoque, xchi'uc ti Abiatar ti ja' paleetique. Taeic ta iq'uel ec yan levitaetic, ja' ti Uriele, ti Asaiase, ti Joele, ti Eliele, xchi'uc ti Aminadabe.

¹²Va'i un, xi laj yalanbee: “Ti banquilaloxuc yu'un ti jujuchop levitaetique, poco tuso abaic xchi'uc jujuchop avuts' avalalique. Jech xapasic jech c'u cha'al liquem cu'untique yo' jech ta xacuchic batel xcaxa ti Ajvalil Dios yu'un ti Israel ta yavil ti bu chapajem cu'une.

¹³Ti sba veltae, mu jech laj apasic. Jech o xal ti Ajvalil Dios cu'untique laj yac' jvocoltic ti laj xtuch'be xcuxlejal jchi'iltic ta scoj ti mu'yuc laj quich'betic ye sti' ti c'usi lec ta pasele.”

¹⁴Va'i un, ti paleetique xchi'uc ti levitaetique, laj smes laj stus sbaic jech c'u cha'al liquem yu'unique yo' jech ta xich'ic batel xcaxa ti Ajvalil Dios yu'un ti Israele.

¹⁵Jech laj spasic ti laj stunesic ti sc'atlomte'altaque, ti laj scajan batel ta snequebic jech c'u cha'al albil mantal yu'un Dios ti Moisese.

¹⁶Ti Davide laj yalbe mantal xtoc ti banquilaletic yu'un ti levitaetique, ti ta snitilulique, sva'anicuc jq'uejimoletic ti xlometuc no'ox ta stijel batel yu'unic ti ep ta tos vobetique, ti jtos o ta vobe, ti arpae, xchi'uc ti set-set taq'uine, ti stijicuc batel ta sjunul yo'ntonic, svinajeb ti xmuyubajic no'ox ta j'ech'ele.

¹⁷Ti levitaetique ja' laj sva'anic ti Hemán xnich'on ti Joele, xchi'uc ti Asaf xnich'on ti Berequiase, yuts' yalal ti Hemane. Ta snitilultac ti Merarie, ti yuts' yalalic ta ba'yele, ja' laj sva'anic ti Etán xnich'on ti Cusaiase.

¹⁸Ma'uc no'ox taje, laj to sva'anic yan yuts' yalal sbaic ta vo'ne, ti c'otemic ta xcha'chopal jtunele, ja'ic ti Zacariase, ti Jaaziele, ti Semiramote, ti Jehiele, ti Unie, ti Eliabe, ti Banaiase, ti Maaseiase, ti Matatiase, ti Elifelehue, ti Micniase, xchi'uc ti jchabiej ti'naetique, ja' ti Obed-edome, xchi'uc ti Jeiele.

¹⁹Ti jq'uejimol Hemane, ti Asafe, ti Etane, ja' sbainojic ta stijel ti set-set c'anal taq'uine.

²⁰Yan ti Zacariase, ti Aziele, ti Semiramote, ti Jehiele, ti Unie, ti Eliabe, ti Maaseiase, xchi'uc ti Benaiae, ja' sbainojic ta stijel ti chop o ta vobetic ti lec chapanbil ta jujutose.

²¹Ti Matatías xtoque, ti Elifelehue, ti Micniase, ti Obed-edome, ti Jeiele, xchi'uc ti Azaziase, ja' sbainojic ta stijel ti arpaetic ta sliquesel ti bu xc'ot o xchi'uc ti q'uejimole.

²²Ti Quenanías banquilal jtsobvanej yu'un ti levitaetique, ja' jtsobvanej yu'unic, yu'un xa'ibe lec xchiquinal c'u s'elan ta xbat snuq'uilal ti q'uejimole.

²³Ti sbainojic ta xcuchel batel ti caxae, ja' ti Berequiase, xchi'uc ti Elcanae.

²⁴Ti Sebaniase, ti Josafate, ti Natanaele, ti Amasaie, ti Zacariase, ti Benaiase, xchi'uc ti Eliezere, ti ja' paleetique, sbainojic ta yoq'uisanel batel ti oq'uesetic ta jba'be bu xloc' batel xcaxa ti Diose. Ti Obed-edom xchi'uc ti Jehiase sbainojic ec xcuchel batel ti caxae.

²⁵Va'i un, ti Davide, ti moletic yu'un ti Israele, xchi'uc ti banquilal jtsobvanejetic yu'un ti jujuvoc' epal soldadoetique, xmuyubajic no'ox batic ta sna ti Obed-edom ta yich'el talel xcaxail strate ti Dios teye.

²⁶C'alal laj yilic coltabil yu'un Dios ti levitaetic ta yich'el batel ti caxae, lic yich' svocol yu'unic ta milel vuc-cot capon vacax sventa matanal, xchi'uc vuc-cot chijetic.

²⁷Ti Davide, sac bitan no'ox batel ta saquil c'u'il, co'ol jech c'u cha'al slapojic batel scotol ti levitaetic ti ta xich'ic batel ti caxae, xchi'uc ti jq'uejimoletique, xchi'uc ti Quenanías ti xtojobtasvan ti c'u s'elan ta xich' oq'uisanel ti oq'uesetique. Ti Davide slapoj ech'el xtoc jc'ol jayal luchbil saquil c'u'il.

²⁸Scotol Israel laj yich'ic ech'el xcaxail strate ti Diose. Xmuyubajic no'ox. X'avanic no'ox. Xvochet no'ox ta yoq'uisanel ti xulub chije, ti oq'uese, ti set-set taq'uine, ti jchop o ta vobe, xchi'uc ti arpae.

²⁹C'alal c'ot ta Steclumal David ti xcaxail strate ti Diose, ti Mical stseb ti Saule, nopaj ech'el ta ventana. Toj c'otel ta sat ti laj yil ti xmuyubaj no'ox x'ac'otaj no'ox ti Davide. Mu xa c'usi x'ech' o laj ya'i ta yo'nton ti mu'yuc stu laj yile.