Read Tzotzil 1 Crónicas 16 Bible Online

1 Crónicas 16 - Tzotzil bible

1 Crónicas 16

¹Laj yich' ech'el batel ti xcaxa Diose, ti c'ot yich' tiq'uel ta yut Axibalna jech c'u cha'al nopbil yu'un David ti laj sva'ane. Ta jech yepal un, laj yich' aq'uel chic'bil matanal xchi'uc milbil matanal sventa lajesobil o'ntonal ta stojol ti Diose.

²C'alal laj yo'nton ti David ta yaq'uel ti matanale, laj sc'ubanbe ta yoc ta sc'ob Dios ti jteclume.

³Ta scotol ti israeletique, c'alal ta vinic ta antsetic, laj yac'anbe jujubej pan, xchi'uc jujubej muc'tic pan ti capbil ta sat ve'lilal te'etique, xchi'uc ti capbil ta taquintasbil sat uvae.

⁴Ti Davide laj st'uj loq'uel ta stojol levitaetic ti buch'utic ta sva'an sbaic ta sq'uelel xcaxa ti Diose yo' ta sbainic ta spasel ti c'usi xlic xcaje, ta yalel ti vocole, ta spasbel stoyel xi'el ti Ajvalil Dios yu'un ti Israele.

⁵C'ot ta banquilal jpas-mantal yu'unic, ja' ti Asafe. Ti its'inal yu'une, ja' ti Zacariase, ti xchi'ilic ta abtele. Tal ec ti Jeiele, ti Semiramote, ti Jehiele, ti Matatiase, ti Eliabe, ti Benaiae, ti Obed-edome, xchi'uc ti Jeiele, ti oy yu'unic ti jaytos vobe, ti jchop o ta vobe, ti arpae. Yan ti Asafe ja' sbainoj ta stijel ti set-set taq'uine.

⁶Ti Benaiae, xchi'uc ti Jahaziel ti ja' paleetique, sbainojic ta yoq'uisanel ech'el ta jba'be ti oq'uesetic ti bu xloc' ech'el xcaxail strate ti Diose.

⁷Ta yorail no'ox ti jech c'ac'al taje, sba to velta ti Davide xi laj yalbe mantal ti Asaf xchi'uc ti xchi'iltac ta abtele, ti xchapchunuc ta xalbeic Dios ti coliyale:

⁸“Colaval, utic ti Diose. Alilanic ti yutsilal slequilale. Albeic ya'i ti jteclumetic ti yabtel laj spas talele.

⁹Q'uejintaic q'uejimol ta sventa stoyel xi'el. Pucbeic sc'oplal ti c'usitic muc'tic ic'ot ta pasel yu'une.

¹⁰“Cajal toyolucoxuc a'yio abaic ta sventa. Muyubajuc no'ox yo'ntonic ti buch'utic ta xnopajic ta stojol ti Diose.

¹¹Ta sventa smuc'ul stsatsal ti Diose, sa'o apojelic; scotoluc c'ac'al, mu xavicta abaic ta sc'anel ti ac'o spojoxuc ti Diose.

¹²Ti vo'oxuc snitiluloxuc ti jtunel Israele, ti vo'oxuc xnich'naboxuc ti Jacob ti t'ujbiloxuc yu'une, vuleso ta ajolic smuc'tiquil ti yabtele, xchi'uc ti c'usitic ch'ayal ta xc'ot o'ntonal yu'une, xchi'uc ti c'usitic nopbil yu'un ti xi laj yalboxuque:

¹⁴“Ti Ajvalile, ja' Dios cu'untic ti stuque, sbainoj ta sventainel sbejel ti banomile.

¹⁵Ac'o mi ta x'ech' to ta jaylajun-chop totil me'iletic, mu xch'ay ta yo'nton ma' ti c'u s'elan yaloj ti stratee,

¹⁶ti trate laj yal ta stojol ti Abrahame, ti c'u s'elan laj sva'an sba ta yalel ta stojol ti Isaaque,

¹⁷ti c'ot ta jbel c'usi tsots albil ta sventa ti Jacobe, ti c'ot ta trate yu'un sbatel osil ti Israele,

¹⁸ti c'alal xi laj yale: ‘Ta xcac'bot ti banomil Canaane, ta xavu'nin ti ta xc'ot ta arextoe.’

¹⁹“Ac'o mi uni jutebic ti stuquic une, ti co'ol s'elan jyanlumetic ta banomil ti yalel muyelique,

²⁰ti xloc' x'ochic batel ta jujun muc'tiquil lume, ti bu smacojic ti jujun ajvalile,

²¹mu'yuc laj yac' ye Dios ti yich'icuc ilbajinel yu'un ti buch'uuc no'oxe, yu'un xi albat ya'i ti ajvaliletique:

²²‘Ch'an utic ti buch'utic t'ujbilic cu'une, mi ja'uc xavilbajinic ti caj'alc'optaque.’

²³“Jnaclejetic ta sjoylej banomil, q'uejintaic ti Diose, alilanic jujun c'ac'al ti pojel coltael yu'une.

²⁴Ta sba ta saticuc scotol ti jteclumetique, ti muc'tiquil lumetique, albeic ya'i ti yutsilal slequilal ta spase.

²⁵Yu'un ti Diose, jelavem ti smuc'ul yutsile, sc'otebal o ti lequil c'optabile, ti xjelav to xi'bal sbae, ja' mu sta scotol ti yan diosetique.

²⁶Ti diosetic yu'unic ti yan jteclumetique, mu'yuc c'usi xu' yu'unic ta j'ech'el; ja'uc ti Diose laj smeltsan ti vinajele.

²⁷Joyobtabil ta yutsil slequilal. Ta xch'ulnae, xlaet no'ox ti banomile, mu albajuc ti smuc'ul stsatsale.

²⁸“Ti yalab xnich'naboxuc ti jteclume, vinajuc avu'unic smuc'ul stsatsal ti Diose, xchi'uc ti yutsil slequilale.

²⁹C'otuc ta pasel avu'unic ti ich'biluc ta muc' ti sc'otebal oe. Ich'o batel matanaletic c'alal ta xabat ta stojole. Nijiletan chimiletan ta stojol Dios ta xch'ulna ti jun yutsile.

³⁰Scotoluc banomil, niquicuc ta xi'el ta stojol. Ti stuque laj yac'be yic ti banomile yo' jech mu xnic.

³¹Muyubajicuc ti vinajele, ti banomile. Xiuc yalic ti jujun muc'tiquil lume: ‘Ajvalil ma' ti Dios une.’

³²Yuq'uetuc no'ox liquel xchi'uc scotol yutsilal ti nabe. Muyubajicuc ti osil banomile xchi'uc scotol ti c'usitic oy yu'une.

³³Muyubajicuc ta avanel ti te'etic ta vitstic ta sba ta sat ti Dios ti ta xtal spas mantal ta banomile.

³⁴“Ti oy yutsil slequil ti Diose, colaval, utic, yu'un sbatel osil oy syail xc'uxul yo'nton.

³⁵Xi xavalbeique: La' coltauncutic, Ch'ul Dios, ti jcoltavanejot cu'uncutique. Tsobuncutic, pojuncutic loq'uel ta yoc ta sc'ob ti jyanlumetique yo' jech ta xilequil-c'opojcutic ta ach'ul venta, ti ximuyubajcutic no'ox ta aq'uejintaele.

³⁶Sbateluc osil, lequil c'optabiluc ti Ajvalil Dios yu'un ti Israele.” Scotol ti jteclume xi laj staq'uique: “¡Jechuc!” Jech tey lequil c'optabil c'ot ti Dios une.

³⁷Ti David une laj yicta comel ta sbainel xcaxail strate Dios ti Asafe, xchi'uc ti xchi'iltac ta abtele yo' jech ta xtunic jujun c'ac'al ti c'u s'elan sc'an pasele.

³⁸Laj yicta comel xtoc ta jchabiej ti'na ti Obed-edom xnich'on ti Jedutune, ti Hosae, ti c'otic ta vaxaquib xchanvinic (68) ta vo' ti j'abtele.

³⁹Ti Sadoque xchi'uc ti xchi'iltac ta paleale, comtsanatic ta tunel ti bu nupel ta be xchi'uc Dios ti oy ta Gabaone.

⁴⁰Sbainojic c'ot ta yaq'uel ti chic'bil matanal ta stojol Dios ti mu'yuc spajeb ta yaq'uel ta jujun sobe, xchi'uc ti ta jujun smalil c'ac'ale, co'ol s'elan jech c'u cha'al ts'ibabil comel ta jbel ti c'usi albil yu'un ti Diose, ti c'ot ta mantal ta stojol ti Israel yu'une.

⁴¹Laj yicta comel ta stojolic xtoc ti Hemane, ti Jedutune, xchi'uc yan ti t'ujbilic ta sq'uejintael ti q'uejimol ti xi ta xale: “Colaval, utic ti Diose, yu'un sbatel osil oy syail xc'uxul yo'nton.”

⁴²Taje, sbainojic ta yoq'uisanel ti oq'uesetique, ta stijel ti set-set taq'uine, ti c'usitic jchop o sc'an tijele, ti xnupij o ta sq'uejimoltac Dios yu'unique. Xnich'nab ti Jedutune sbainojic ta xchabiel ti ti'nae

⁴³Ta ts'acal to un, scotol ti jteclume sutic batel ta snaic ta jujun. Sut batel ec ta sna ti Davide yo' ta xac'be yich' slequilal Dios ti c'u yepal oy yu'une.