Read Tzotzil 1 Crónicas 17 Bible Online

1 Crónicas 17 - Tzotzil bible

1 Crónicas 17

¹C'alal choti xa ta spasob mantal ti Davide, xi laj yalbe ya'i ti j'alc'op Natane: —A'yio ava'i, nacalun ta jun na ti meltsanbil ta naca ch'ut te'e, c'alal naca no'ox ta uni axibalna ti bu tiq'uil xcaxail strate ti Diose.

²Ti Natane xi laj staq'ue: —Paso scotol un cha'e ti c'u s'elan anopoje, yu'un sva'anoj sba ti Dios ta atojole.

³Ta yac'ubalil no'ox taj une, xi tal c'oponatuc yu'un Dios ti Natane:

⁴“Batan, ba c'opono ti cajtunel Davide. Albo ya'i ti xichi ta xcalbe ya'i ti vu'un Diosune. Ma'uc vo'ot ma' ti ta xameltsanbun jun ch'ulna ti bu ta xinaquie.

⁵Ti sc'ac'alil laj jloq'ues talel ta Egipto ti Israele, mi ja'uc linaqui ta ch'ulna. Jech to xinaquet talel ta Axibalna ti xijoyet talel ta jujujote.

⁶Ti c'u xa sjalil lixanav talel xchi'uquique, mi junuc laj jc'anbe ti jpas-mantal yu'unique ti spasbeicun junuc ch'ulna ti meltsanbil ta ch'ut te' ti buch'utic laj jva'anan ta sventainel ti jteclumale.

⁷Ja' yu'un un cha'e, ti Ajvalilun ti scotol xu' cu'une, xi xavalbe ya'i ti cajtunel Davide: Vu'un laj quic'ot loq'uel ti laj avicta comel ta xchabiel ti corrale, ta sq'uelel ti chije yo' jech ta xac'ot ta banquilal yu'un ti jteclumal Israele.

⁸Ti buyuc no'ox xajoyet ta jujujote, laj jchi'inot. Laj jtsutses ta j'ech'el ti avajcontra ti laj stsacot ta c'ope. Laj cac' ti pucuc ech'el ti ac'oplal co'ol jech c'u cha'al junuc vinic ti cajal sc'oplalic li' ta banomile.

⁹Ma'uc no'ox taje, jchapanoj xa jun yavilic bu ta xcomic ti jteclumal Israele. Ta xcomic ta naclej cu'un ta yosil stuquic ti bu taje, ti mu'yuc c'usi x'albatique. Mu ja'uc ta x'ilbajinatic yu'un ti jchopol-joletic jech c'u cha'al ta sliquebale

¹⁰ti c'alal laj jva'anan ti jpojvanejetic ta sventainel ti jteclumal Israele. C'otic ta j'ac'-lo'il-maxil cu'un ti scontraique. Ta xcac' ana' xtoc un ti ta jboles ti anitilultaque.

¹¹C'alal mi c'ot ta tsutsel ti ach'iel ac'opojele, ta xacham. Ta xcac' que jti' ta x'och ta abtelal junuc anitilultac ti ta xc'ot ta ajvalile

¹²Taje, ja' ta smeltsan ti jch'ulnae. Ta xcac' que jti' ti naca snitilultac ta x'ech' ti ta spasob mantale.

¹³Ta xic'ot ta totil yu'un. Ta xc'ot ta jnich'on ec. Mu jtub ti yutsil co'nton ta stojole jech c'u cha'al laj jtub yutsil co'nton ta stojol ti buch'u ba'yel ech'e.

¹⁴J'ech'el ta xcac' que jti' ta sbainel ti jnae, xchi'uc ti ventainel cu'une, ti naca snitilultac ta x'ech' ti ta spasob mantale.”

¹⁵Ti c'u s'elan laj yil laj ya'i ti Natane, sbejleb bejleb lec xcholet laj yalbe ya'i scotol ti Davide.

¹⁶Va'i un, ti ajvalil Davide xi laj yal ti och batel ta c'opojel ti'inel ta stojol ti Diose: “Cajval Dios, ¿buch'uun ya'yel, buch'uic ya'yel ti jtot jme' ti vi to bu livul avu'une?

¹⁷¡Le'e, Cajval, yamal ono'ox sc'oplal ti laj jta avu'une, ja' x'ech' to sc'oplal ti laj xa avalbe sc'oplal ti c'usi ta xc'ot ta stojol snitilultac ti avajtunele, ti cajal c'ot jc'oplal avu'une!

¹⁸¿Mi yu'un stac' to la c'usi ta xcal ti laj avac' ta ich'el ta muc' ti avajtunele, ti xavojtiquin lec c'u s'elan ti avajtunel li'e?

¹⁹Cajval, scotol ti c'usitic ch'ayal ta xc'ot o'ntonal yu'un ti c'usi ta xapase, ti c'usi oy ta avo'nton ta xavac'be yile, ja' ta sventa ti ts'etel lec ani' achiquin yu'un ti avajtunele.

²⁰Cajval, mu'yuc xa yan jech c'u cha'al ti vo'ote. Mu'yuc xa ta tael yan dios jech c'u cha'al ti ac'oplal ca'binojcutique.

²¹Ti alumal Israele, ¡mu'yuc xa yan jech c'u cha'al ti stuquique! C'ajomal no'ox stuc muc' ta lum li' ta banomile Yu'un laj apoj, Dios, yo' jech c'ot ta ateclumal, ti cajal c'ot ac'oplal ti laj avac'an ta ilel ti c'usitic muc'tic ch'ayal ta xc'ot o'ntonal avu'une. Ti ateclumal ti laj apoj talel ta Egiptoe, ta sba ta satic, laj yil ti laj aten loq'uel ti yan jteclumetique.

²²Yu'un vo'ot laj atsob loq'uel ti Israele yo' jech ta xc'ot ta ateclumal sbatel osil. Ti vo'ote, Cajval, ta xac'ot ta Dios yu'unic.

²³“Ja' yu'un un cha'e, Cajval, jbeluc sc'oplal c'otuc ta pasel ti c'u s'elan avac'oj atrate ta stojol ti avajtunele, xchi'uc ti snitilultaque, ti c'otuc ta pasel un ti c'usi avaloje.

²⁴Xquechet c'otuc ta pasel ti atrate avaloj ta jamale. Cajal c'otuc ti ac'oplale. Ac'o albatan ti Dios ti scotol xu' avu'une, bats'i Ajvalil yu'un ti Israele. Ta snitilultac ti avajtunel Davide, j'ech'eluc staojuc o yav va'lan ti chabibiluc avu'une.

²⁵Ti vo'ote, Dios, laj avac'bun jna' ti oy sc'oplal ta xtunic ti jnitilultaque. Manchuc mi avajtunelun un, ta jc'an ti vocol ta atojole.

²⁶Cajval, vo'ot Diosot, laj avalbe ya'i ti avajtunel ti mu albajuc yutsil avo'nton ta stojole.

²⁷Avi tana une, loc' ayan ta avo'nton ta xava'an aba ta stojol ti snitilultac ti avajtunele yo' j'ech'el staoj yav chabibil ta xcom o avu'un. Laj ava'an aba un, Cajval. J'ech'el lequil c'optabil ta xc'ot avu'un.”