Read Tzotzil 1 Crónicas 18 Bible Online

1 Crónicas 18 - Tzotzil bible

1 Crónicas 18

¹Ts'acal to un, ti David une laj stsal ti filisteoetique, ti mu'yuc xa c'usi xut sbaic c'ot yu'une, ti sq'uelic xa no'ox pojbat ta yoc ta sc'obic ti jteclum Gate, xchi'uc ti bic'tal jteclumetic ti c'u yepal joyol ta spat ta xocone.

²Tsalbil c'ot yu'un xtoc ti moabitaetique. Mu'yuc xa c'usi xut sbaic yu'un ti Davide, lic stojic patan ta stojol.

³Ti Davide laj stsal xtoc ti Hadad-ezer ajvalil yu'un Soba ti oy ta stuq'uil yeloval Hamate, ti oy xa ox ta yo'nton ta yu'ninel ya'i yosilal ti uc'um Eufratese.

⁴Pojbatic yu'un David lajuneb ciento (1,000) ta cot carreta sventa ac'ob leto. Ic'bil batic ta chuquel vucmil (7,000) ta vo' soldadoetic ti cajalic ta ca'e, jtob ta mil (20,000) soldadoetic ti ta xanav ta yoquique. Laj sc'asanbe yacan xtoc scotol ca'etic ti sjochojic scarretail ti ac'ob letoe. C'ajomal xa no'ox laj scomtsan ti ta xtunic ta sjochel vo'vinic (100) ta cot carretae.

⁵Ta jech yepal, c'otic ti sirioetic ti oyic ta Damascoe ta scoltael ti Hadad-ezer ajvalil yu'un ti Sobae. Tsalatic ta j'ech'el yu'un ti Davide. Lajic ta milel chib xcha'vinic ta mil (22,000) ti sirioetique.

⁶Ts'acal to un, ti David une laj sva'anan jq'uelvanejetic ta Siria ti oy yu'un ti Damascoe. Mu'yuc xa c'usi xut sbaic ti sirioetic ta stojol ti Davide. Lic stojic ti patan ta stojole. Ja' yu'un un cha'e, buyuc no'ox ta xbat ti Davide, ac'bil yip ta spasel canal yu'un ti Diose.

⁷Ts'acal to un, ti David une laj yu'ninan ti smacobbailic ti meltsanbil ta oro ti laj stunesic yaj'opisialtac ti Hadad-ezere. Laj yich' batel ta Jerusalén.

⁸Mu no'ox albajuc xtoc laj yu'ninan c'anal taq'uinetic ti oy ta Tibhate, ti oy ta Cune, ti jteclumetic ti smacoj ti Hadad-ezere. Ta sventa ti c'anal taq'uinetic taje, lic smeltsan muc'ul pila yavil vo' ti Salomón ta ts'acal to une, xchi'uc ti c'usi balajtic laj yich' va'anel muyele, xchi'uc ti c'usitic ta xtun ta ch'ulna ti meltsanbil ta c'anal taq'uine.

⁹Ti Toi ajvalil yu'un ti Hamate, c'alal laj ya'ibe sc'oplal David ti laj xa stsalbe scotol yajsoldadotac Hadad-ezer ajvalil yu'un ti Sobae,

¹⁰laj stac batel ta stojol David ti Adoram ti ja' xnich'one. Xlic ta lum ti c'usitic meltsanbil ta oro, ta plata, ta c'anal taq'uin, yich'oj batel ti c'alal bat sc'opon ta yac'bel yip yo'nton ti ajvalil David ti laj stsal ti Hadad-ezer ti laj stsac sbaic ta letoe. Ti Toi eque laj to ox stsac sbaic ta leto xchi'uc ti Hadad-ezere.

¹¹Scotol taje, laj yac'be sventain Dios ti Davide, jmoj xchi'uc ti oroe, ti plata ti laj spojbe talel ta scotol ti muc'tiquil lumetic yu'unic ti Edome, ti Moabe, ti amonitaetique, ti filisteoetique, xchi'uc ti amalecitaetique.

¹²Ti Abisai xnich'on ti Sarviae laj stsal ta j'ech'el ec vaxaclajunmil (18,000) ta vo' edomitaetic ta stenlej ti sbiinoj Ats'ame.

¹³Ts'acal to un, ti David une laj stac batel jq'uelvanejetic ta Edome, ti mu'yuc xa c'usi xut sbaic scotol ti edomitaetic ta stojol ti Davide. Ti buyuc no'ox ta xbate, ac'bil yip yu'un Dios ta tsalvanej.

¹⁴Ti Davide c'ot ta ajvalil yu'un scotol Israel. Oy smelol stuq'uil laj xchapan scotol ti steclumale.

¹⁵Ti banquilal jtsobvanej yu'un ti soldadoetique, ja' ti Joab xnich'on ti Sarviae. Ti Josafat xnich'on ti Ahilude, ja' jts'ibajom yu'un ti ajvalile.

¹⁶Ti Sadoc xnich'on ti Ahitobe, xchi'uc ti Ahimelec xnich'on ti Abiatare, ja' paleetic ma' taje. Ti Savsae sbainoj ta sts'ibael ti c'usitic ta xc'ot ta pasele.

¹⁷Ti Benaías xnich'on ti Joiadae sbainoj ta spasel ta mantal ti jtsobvanejetic yu'un ti cereteoetique, xchi'uc ti peleteoetique. Xnich'nab ti Davide, c'otemic ta banquilal yajcoltaobbatac.