Read Tzotzil 1 Crónicas 19 Bible Online

1 Crónicas 19 - Tzotzil bible

1 Crónicas 19

¹Ech' xa ox c'uc sjaliluc un, cham ti Nahas ajvalil yu'un ti amonitaetique. Och ta xq'uexol ta ajvalilal ti xnich'one.

²Va'i ti David une, c'ot ta nopel yu'un ti ta xac' ta ilel xc'uxulil ta stojol ti Hanún xnich'on Nahase jech c'u cha'al laj yac' ta ilel xc'uxulil ta stojol ti stote. Jech o xal laj stac ech'el jun chibuc yajtuneltac ta stojol ta spatbel yo'nton ti cham ti stote. Ja'uc le' une, c'alal c'otic ta slumal amonitaetic yajtuneltac ti Davide,

³ti banquilaletic yu'un ti amonitaetique, xi laj yalbeic ti Hanune: “¿Mi ta xach'un xana', Jcuch abtel, ti tacbilic talel yu'un David ti viniquetic ta spatbelot avo'nton ti ich'bil ta muc' c'u s'elan ech' ti atote, Jcuch abtel? ¡Le'e, ta jbel sc'oplal tal stuc'ulan, tal sq'uel lec, tal spa'i ti muc' ta lume!”

⁴Va'i ti Hanun une laj yal mantal ti ac'o stiq'uic ta chuquel yaj'opisialtac ti Davide, ti scurpintabeicuc ta ch'ulbel ti yisimique, ti xch'i'beicuc yalel ta jatbel ti sc'u'ic c'alaluc to yolon scubic ti licajticuc c'otuc yu'unique. Ts'acal to un, laj stac sutel un.

⁵C'alal bat yalbeic ya'i David ti va'i s'elan c'ot ta stojol ti viniquetic taje, laj yal mantal ti batuc yich'ic nupel ta bee, ti mu x'ech' xjelav ta xa'i ti xq'uexlal c'ot ta stojolique, ti yalbeicuc ya'iic ti comicuc ta Jericó ja' to mi ch'i ti yisimique, xu' xa sutic batel unbi.

⁶Laj sna'ic ti amonitaetique ti mu x'ilbat sat ti Davide. Jech o xal ti Hanun une, xchi'uc ti amonitaetique, laj staquic ech'el oxlajuneb xcha'vinic ta mil (33,000) kilo plata ta Mesopotamia, ta Siria, ta Maaca, xchi'uc ta Soba sventa sloc'obil carretaetic yu'un ac'ob-leto xchi'uc soldadoetic ti ta xcajiic ta ca'e.

⁷Va'i un, laj yich'ic sloc'obil ti lajcheb xcha'vinic ta mil (32,000) ta cot carreta sventa ti ac'ob-letoe, xchi'uc ti ajvalil yu'un Maacae, xchi'uc ti yajsoldadotaque. Scotolic taje, c'ot slaman sbaic xchi'uc yaxibal naic ta yeloval Medeba. Ti amonitaetic eque loq'uic batel ta slumalic ti laj svol sbaic ta jmoj yo' ta x'ochic ta ac'-letoe.

⁸Ja'uc ti David une laj ya'i. Laj stac ech'el ti Joab xchi'uc scotol ti epal soldadoetique.

⁹Xvoletic no'ox batel ti amonitaetic ti chapalic ta yaq'uel ti leto ti ta ochebal sti' ti jteclum Medebae. Ti ajvaliletic ti yan o bu liquemic talele, comic ta osiltic.

¹⁰C'alal laj yil Joab ti macbil ta bee, ti volibil ta xc'ot ta patile, lic st'uj ti soldado israeletic ti lec xtojobique. Lic xchapan sbaic ta stsaquel ta leto ti sirioetique.

¹¹Jech xtoc un, yo' ta spac sc'oplal ta stojol ti amonitaetique, laj yac'be sbain ta spasel mantal c'u to yepal oy soldadoetic ti Abisai ti ja' xchi'il ta voq'uele.

¹²Xi laj yalbe ya'ie: “Mi ta xavil ta stsalun ti sirioetique, ta xtal acoltaun. Mi ta xquil ta stsalot ti amonitaetique, ta xtal jcoltaot ec.

¹³Mu xatsiq'ues avo'nton. Tsatsajcutic ta spojel ti muc'ul lum cu'untique, xchi'uc ti jteclumetic yu'un ti Dios cu'untique. ¡C'otuc ta pasel yu'un ti Dios ti c'usi lec ta xile!”

¹⁴Ti Joabe xvolet batel xchi'uc yajsoldadotac ta stsaquel ta leto ti sirioetique. Jatbil loc' ech'el ti sirioetic ta stojolique.

¹⁵C'alal laj yilic ec ti amonitaetic ti jatavic xa ti sirioetique, jech ti stuquique jatbil loq'uic ta stojol ti Abisai xchi'il ta voq'uel ti Joabe. Bat stic' sbaic ta jteclum. Va'i un, ti Joabe sut ech'el ta Jerusalén.

¹⁶C'alal laj yilic ti sirioetic ti tsalbil c'otic yu'un ti Israele, laj staquic batel j'al-mantal j'ich'-c'opetic yo' ta staic talel ta iq'uel ti jvoc' sirioetic ti oyic ta jot uc'um Eufratese. Ti jpas-mantal yu'unique, ja' ti Sofac banquilal jtsobvanej yu'un yajsoldadotac ti Hadad-ezere.

¹⁷Ja'uc taj une, bat xchapbeic ya'i ti Davide. Ti stuc une lic stsob ta anil scotol Israel ti ech' xtuch'ic ti uc'um Jordán ti xvoletic no'ox c'otel ti laj sa' yavilic ta spojel sbaique. Ti David une laj xchapan yajsoldadotac ta stsaquel ta leto ti sirioetic ti xc'anobaj no'ox liquel ti leto yu'unique.

¹⁸Ja'uc le' une, jatavic ech'el ti sirioetic ta stojol ti israeletic ta slajeb une. Lajic ta milel yu'un David cha'vinic mil (40,000) ta vo' soldadoetic ta xanavic ta yoquique, xchi'uc vucmil (7,000) ta vo' ti cajajtic ta carreta yu'un ti ac'ob-letoe. Ti Davide laj smil ti Sofac banquilal jtsobvanej yu'un yajsoldadotac ti sirioetique.

¹⁹C'alal laj yilic ti c'u yepal svoloj sbaic ta stojol ti Hadad-ezer ti tsalvanic ta j'ech'el ti israeletique, bat slajesbeic yo'nton ti Davide, ti mu'yuc xa c'usi xut spoj sbaique. C'ot ta pasel un, ti sirioetique j'ech'el mu xa stic' sbaic ta spojel ti amonitaetique.