Read Tzotzil 1 Crónicas 21 Bible Online

1 Crónicas 21 - Tzotzil bible

1 Crónicas 21

¹Ti jtic'-mulil ánjele lic scontrain ti israeletic ti laj sliquesbe sjol ti David ti sliquesuc tsacob-biil ta stojol ti Israele.

²Va'i un, ti Davide xi lic yalbe ya'i ti Joabe, xchi'uc ti banquilaletic yu'un ti jteclume: —Batanic, liquesic tsacob-biil ta stojol ti israeletic ti licuc talel ta Beerseba, c'otuc to c'alal Dan. Ich'beicun talel ti c'u yepal laj ataique yo' jech ta jna' ti c'u yepal oyique.

³Ti Joabe xi laj staq'ue: —Ti Diose, ac'o sva'an sba ta yepajesel steclumal vo'vinic (100) velta jech c'u cha'al oy avi tanae. ¿Mi oy bu ta xc'ot ta pasel ti ma'uc avajtuneltac scotol, Jcuch abtel? ¿C'u cha'al jech ta xapasbe, Jcuch abtel? ¿C'u cha'al ta xasa'be smul scolo' ti Israele?

⁴Manchuc mi jech un, x'ech' to jelav smantal ti ajvalil ta stojol ti Joabe. Loc' batel, laj xani scotol Israel. Sut ech'el ta Jerusalén xtoc un.

⁵Ti c'u yepal laj sta ta tsacbel sbi jteclum ti Joabe, laj yac'be jelavel ti Davide. Loc' ta chapel jun millon xchi'uc vo'vinic ta mil (1,100,000) viniquetic ti xtojobic lec ta ac'-letoe. Ti ta Judae, loc' ta chapel chanib ciento xchi'uc lajuneb xchanvinic mil (470,000) ta vo'.

⁶Ja'uc le' une, mu'yuc xich' tsacbel sbi snitilulic ti Levie, xchi'uc ti Benjamine. Ti Joabe mu lecuc laj ya'i smantal ti ajvalile.

⁷Ti Diose mu lecuc yil scotol taje. Laj stacbe talel svocolic ti Israeletique.

⁸Ja'uc ti Davide xi jamal laj yal ta stojol ti Diose: —Tsots laj jta jmul ta atojol ti laj jtsac ti biile. Ja'uc le' une, ta jc'anbot vocol ta atojol ti ch'aybo smul scolo' ti avajtunel li'e, ti ta jbolatil no'ox ti jech laj jpase.

⁹Va'i un, ti Diose xi laj yalbe ya'i ti Gade, ti ja' ochem ta yajtunel David ti jamal sba sat yalel ti c'usi ta xc'ot ta pasele:

¹⁰“Batan, ba q'uelo ti Davide. Ta jch'amun ave ati' xavalbe ya'i ti oy oxtos ta xcac'be sna' ti ac'o st'uj jtosuc ti c'usi ta sc'an ta jpas ta stojole.”

¹¹Ti Gade xi laj yalbe ya'i ti David c'alal bat sq'uele: —Ta xal ti Diose ti ja' la jech li' ti sc'an xat'uje:

¹²Mi ja' ti ta xtal oxib jabil vi'nale. Mi ja' ti oxib u nutsbilot ta espada yu'un ti avajcontrae. Mi ja' ti oxib c'ac'al ta xlajic ta yespada Dios ti jteclume, ti mu albajuc ta xlajic scotol slumal Israel ta sventa ti yaj'ánjel Diose. Nopo ca'itic tana un c'usi jtosucal ta xat'uj yo' jech ta xcalbe ya'i ti Buch'u laj stacun talele.

¹³Ti Davide xi laj stac'be ti Gade: —Tiq'uilun ta jun muc'ul vocol. Avie, ja' lec ti ochcun ta yoc ta sc'ob ti Diose. Mu albajuc jelavem ti syail xc'uxul yo'ntone. Ma'uc lec ma' ti tsalbil ta xic'ot yu'un ti viniquetique.

¹⁴Va'i un, ti Dios une laj stac talel jun jmilvanej chamel ta stojol ti Israele, ti cham lajic yu'un lajuneb xchanvinic ta mil (70,000) israeletique.

¹⁵Ti Diose laj stac talel jun ánjel ta stsutsesel ti jnaclejetic ta Jerusalene. Ja'uc le' une, c'alal xyaquet xa ta stsutses ta j'ech'ele, ti Diose c'uxubaj yo'nton. Toj abol sba laj yil ti jech ta xac'be ti svocole, ti xi laj yalbe ti laj spajes ti ánjel yacal ta xmilvane: “¡Xu' xa, pajeso aba!” Ta yorail taje, ta xa xc'ot ti ánjel ta sts'el smajob trigo ti jebuseo vinic ti Ornán sbie.

¹⁶C'alal laj stoy batel sat ti Davide, laj yil ti yaj'ánjel Dios xtuchoj ta sc'ob ti yespada ti sloq'uesoj ta snae. Sye'oj batel ta stuq'uil ti Jerusalene, ti liquem talel ta vinajele, ti c'otem to c'alal banomile. Va'i ti David une, xchi'uc ti moletique, jatantic xa sc'u'ic slapojic, snupilanic xa banomil laj spatan sbaic ta lumtic.

¹⁷Ti Davide xi laj yalbe ti Diose: —¡Vu'un laj cal mantal ti ech'uc ti tsacob-biil yu'un ti jteclume! ¡Vu'un ta jmul xchi'uc ti c'usi chopol laj jpase! Ja'uc le' une, ¿c'usi laj spasic ya'yel ti buch'u muts'ul sba satique? Cajval, Ch'ul Dios, ti tsitsel avu'une, ta jc'anbot vocol, cajanbun ta jba xchi'uc ti calab jnich'nabe. Ictao xa ta syayijesel ti ateclumal une.

¹⁸Va'i ti yaj'ánjel Dios une laj yalbe ya'i ti Gade ti ac'o yalbe ya'i David ti ac'o sva'an junuc altar ta sventa Dios ti bu smajob trigo ti jebuseo vinic ti Ornán sbie.

¹⁹Va'i ti David ec une bat spas ta sventa Dios ti c'usi albat yu'un ti Gade.

²⁰C'alal yacal ta smaj strigo ti Ornane, laj stoy batel ti sat ti laj yil ti ánjele. Ti chanib xnich'nab xchi'inoje, bat xa ox snac' sbaic un.

²¹C'alal nopaj batel David ti bu taje, q'uelvan talel ti Ormane. Loc' batel ti oy ta smaj ti strigoe, snupilan xa banomil ta stojol ti Davide.

²²Va'i ti David une xi laj yalbe ti Ornane: —C'uxubajan cu'un ti yavil smajobil avuni trigoe. Ta jmeltsan junuc altar ta sventa ti Diose. Chonbun ti c'u s'elan arensal ta xavalbe ti stojole, ti c'otuc ta pasel ictavanuc comel ti vocoletic oy ta stojol ti jteclume.

²³Ti Ornane xi laj staq'ue: —Ich'o, Jcuch abtel, paso ti c'usi lec ta xavile. Ta xcac' ec ti tot vacaxetic ti ta xich' chiq'uele. Tunuc ta si' smajobiltac ti trigoe, xchi'uc ti matanal sat trigoe. ¡Ta xcac'bot scotol taje, Jcuch abtel!

²⁴Ja'uc ti ajvalil Davide xi laj staq'ue: —Colaval ti jech avo'ntone. Tsots sc'oplal ta jtoj ti c'u yepal arensal ta xavalbe ti stojole. Mi ja'uc ta jpojbot ti c'usi ja' avu'une, yu'un mu lecuc ti mi mu'yuc ta xca'i c'u s'elan ta tojel ti chic'bil matanal ta xcac'be ti Diose.

²⁵Ti David une laj stojbe vaquib ciento (600) ta sep oro ti bu laj sc'anbe ti Ornane.

²⁶Ti bu taje, lic sva'an jun altar ta sventa ti Diose. Laj yac' chic'bil matanaletic, milbil matanaletic ta sventa lajesobil o'ntonal. Ta jech yepal un, lic sta ta c'oponel ti Diose. Laj stac talel c'oc' ta vinajel ti vul ta sba bu oy ti chic'bil matanal ti oy ta altare.

²⁷Va'i un, ti Diose laj yalbe mantal ti ánjel ti stic'uc ochel ta sna ti yespadae.

²⁸C'alal laj yil ti David ti ta jech to yepal tac'bil c'ot sc'op yu'un Dios ti bu smajobil strigo ti jebuseo vinic ti Ornán sbie, laj yac' ti milbil matanale.

²⁹Manchuc mi oy ta Gabaón ti Axibalna ti laj sva'an talel ti Moisés ta sbajtical banomil ta sventa ti Diose, xchi'uc ti altar sventa xchic'obil matanele,

³⁰mu'yuc xa c'usi yut ti David ti bat ta sjaq'uel sba ta stojol Dios ti bu taje, yu'un ep xi' ta j'ech'el c'alal laj yilbe yespada ti yaj'ánjel Diose.