Read Tzotzil 1 Crónicas 22 Bible Online

1 Crónicas 22 - Tzotzil bible

1 Crónicas 22

¹Jech o xal xi laj yal ti Davide: “Li' oy ti bu ta xich' va'anel xch'ulna ti Ajvalil Diose, xchi'uc ti altar sventa xchic'obil matanal yu'un ti Israele.”

²Ta ts'acal to ti David une, laj yal mantal ti yich'uc tsobel ti jyanlumetic ti nacalic ta Israele, xchi'uc lic sva'anan j'an-tonetic ta yanel tonetic sventa xch'ulna ti Dios ta xich' meltsanele.

³Lic xchapan epal taq'uinetic ta xtun ta xlauxal ti ti'naetique, xchi'uc ti lucajtic taq'uin ti oy sni' xcha'jotale, xchi'uc epal c'anal taq'uinetic.

⁴Busul no'ox yepal naca ch'ut te' lic xchapan, yu'un yepal no'ox ch'ut te' laj yich'ic talel ti jnaclejetic ta Sidone, xchi'uc ti ta Tiroe.

⁵Xi ta snopilan ti Davide: “Ti jnich'on Salomone, biq'uit querem to. Mu to jaluc ti xch'iele. Ti ch'ulna ta xich' meltsanbel ti Diose, tsots sc'oplal spajebaluc ti yutsile, ti tabiluc ta alel ta sbejel banomil ti stuc no'ox ti c'upil sba ta j'ech'ele, ti chapaluc ta xquicta comele.” Jech o xal ti David une, mu albajuc yepal ti c'usitic laj xchapanan comel ti c'alal mu to ta xchame.

⁶Ta jech yepal un, laj sta ta iq'uel ti Salomón ti ja' xnich'one, ti laj sc'ubanbe ta sbainel sva'anbel xch'ulna ti Ajvalil Dios yu'un ti Israele,

⁷ti xi laj yalbee: “Cuni nich'on, oy ox ta co'nton ta jmeltsan ca'i junuc ch'ulna ta sventa ti Ajvalil Dios cu'une.

⁸Ja'uc le' une, xi laj yalbun ti Diose: ‘Quiloj ti ep amaloj ch'ich'e, ti ep letovajemote. Jech o xal ma'uc c'otem ta aventa ta sva'anel ti ch'ulnae.

⁹Ja'uc le' une, ta xavilbe sat jun anich'on jun vinic ti sna' spajesan ti c'ope, ti ta xc'ot ta stojol cu'un ti ch'an x'utat liquel yu'un ti yajcontra ti buyuc no'oxe. Jech o xal ta sbiin Salomón. Ti jayib c'ac'al ta x'ech'e, ta xc'ot ta pasel cu'un ti mu'yuc c'usi sna'ic ti jun no'ox yo'ntonic liquel ti Israele.

¹⁰Ja' ta xisva'anbun jch'ulna. Ta xc'ot ta jun jnich'on. Ta xic'ot ta totil yu'un ec. J'ech'el ta xcac' que ti mu xtub sc'oplal snitilultac ta sventainel ti Israele.’

¹¹Avi tana une, nich'on, sva'anojuc sba ti Dios ta atojole yo' jech xu' avu'un ta sva'anbel xch'ulna ti Ajvalil Dios avu'une jech c'u cha'al albil ac'oplal yu'une.

¹²Ac'o yac'bot Dios ti abijile, ti snopbenal avu'une yo' jech ta xc'ot ta pasel ti ta xac'bot abain ti israeletic ti c'alal ta xa'och ta ajvalile. C'otuc ta pasel avu'un ti jbel c'usi tsots albil yu'un ti Ajvalil Dios avu'une.

¹³Scotol lec ta xc'ot ta pasel avu'un, mi oy ta avo'nton ta spasel ti jbel c'usi tsots albil sc'oplale, xchi'uc ti c'usi albat ti Moisés yu'un ti Dios ta sventa ti Israele. ¡Oyuc yip avo'nton, j'ech'eluc, va'ano aba! ¡Mu xatsiq'ues avo'nton, mi ja'uc xatic' xi'el ta avo'nton!

¹⁴A'yio ava'i, ti bu xa c'alal xac' ti yipal cu'une, laj xa jchapan ti c'usitic ta xtun ta sventa ti ta xich' meltsanel xch'ulna ti Diose. Jtsoboj xa oxmil xchi'uc vo'lajunvinic (3,300) ta tonelada ti oroe, oxlajuneb xcha'vinic ta mil (33,000) tonelada ti platae, xchi'uc mu no'ox albajuc yepal ti c'anal taq'uinetique, xchi'uc tsatsaquil taq'uinetic ti mu xa ono'ox bisbiluque. Ja' jech xtoc chapal xa cu'un ti te'etique, xchi'uc ti tonetique, ti ta to xats'acubtas ti vo'ote.

¹⁵Ja' jech xtoc oy ta atojol epal j'abteletic, j'an-tonetic, albanyiletic, jch'ul-te'etic, mu no'ox albajuc sna'ic ta yabtelanel ep ta tos ti abtele.

¹⁶Taje, xtojobic ta yabtelanel ti oroe, ti platae, ti c'anal taq'uine, ti tsatsal taq'uine. Ja' yu'un un cha'e, liqueso ti abtel, Dios xascoltaot ta sva'anel.”

¹⁷Yo' ta stic' sbaic ta scoltael ti Salomón xnich'on ti Davide, ti Davide xi laj yalbe mantal scotol banquilaletic yu'un Israele:

¹⁸“Ti Ajvalil Dios avu'unique sva'anoj sba ta atojolic. Buyuc no'ox laj slamajes ti c'op ta atojolique. Yac'ojbun ta coc ta jc'ob scotol ti jnaclejetic yu'un ti muc' ta jteclume, ti ventainbil c'otic yu'un Dios xchi'uc ti jteclume.

¹⁹Ja'uc avi tana le' une, ac'beic yipal nablanic ta stojol ti Ajvalil Dios avu'unique. Ti jech taj une, ta xc'ot ta meltsanel xch'ulna ti Dios ti ja' Ajvalile, ti tey ta xjelav batel xcaxail strate ti Diose, xchi'uc ti c'usitic c'otem ta yu'untac ti Dios ti bu ta xmeltsaj ti xch'ulnae.”