Read Tzotzil 1 Crónicas 23 Bible Online

1 Crónicas 23 - Tzotzil bible

1 Crónicas 23

¹C'alal molibem xa ti Davide, ti oy xa sjabilal ti xch'iel sc'opojele, ti Salomón ti ja' xnich'one, lic stic' ta ajvalilal yu'un ti Israele.

²Laj stsob talel scotol ti banquilaletic yu'un ti Israele, ti paleetique, ti levitaetic xtoque.

³Yochelic ta xchapel c'u yepal oy ti levitaetic ti yich'ojic xa lajuneb xcha'vinic (30) jabile, xchi'uc ti buch'utic x'ech' xa batele. C'alal laj xchapic une, vinaj ti oyic vaxaclajuneb xcha'vinic mil (38,000) ta vo' ti viniquetique.

⁴Ti va'i yepalic taj une, chanib xcha'vinic mil (24,000) ta vo' ochic ta tojobtasvanejetic ta abtel ta sventa ti ch'ulnae, vacmil (6,000) ta vo' c'otic ta j'opisialetic, xchi'uc ta jchapanvanejetic.

⁵Chanmil (4,000) ta vo' ac'bat sbainic ta sq'uelel ti ti'naetique, chanmil (4,000) ta vo' xtoc sbainojic c'ot ta spasbeic stoyel xi'el Dios xchi'uc ti ep ta tos svobic ti jech ono'ox oy ta yo'nton David ti laj yac' ta meltsanele.

⁶Ti David une, ta jujuchop, laj xch'ac loq'uel ti c'u yepal oy xnich'nab ti Levi ti xi s'elan oye: ti Gersone, ti Coate, xchi'uc ti Merarie.

⁷Xnich'nab ti Gersone, xi s'elan oye: ti Ladane, xchi'uc ti Simeie.

⁸Xnich'nab ti Ladane, ja' oxibic ti xi s'elan oye: ti banquilale, ja' ti Jehiele. Ti its'inale, ja' ti Zetame, xchi'uc ti Joele.

⁹Xnich'nab ti Simeie, ja' oxibic ec ti xi s'elan oye: ti Selomite, ti Haziele, xchi'uc ti Harane. Taje, c'otemic ta banquilaletic yu'un jujuchop snitilultac ti Ladane.

¹⁰Xnich'nabtac ti Simeie, ja' chanibic ti xi s'elan oye: ti Jahate, ti Zizae, ti Jeuse, xchi'uc ti Beriae.

¹¹Ti banquilale, ja' ti Jahate. Ti xchibale, ja' ti Zizae. Ti mu'yuc xil xnich'nab ti Jeús xchi'uc ti Bería yo' ta xtunique, c'otic ta jchop no'ox jnaclej c'alal laj yich'ic tsobel ta xcha'chopalique.

¹²Xnich'nab ti Coate, ja' oy chanibic ti xi s'elan oye: ti Amrame, ti Izhare, ti Hebrone, xchi'uc ti Uziele.

¹³Xnich'nab ti Amrame, ja' ti Aarone, xchi'uc ti Moisese. Ti Aarone, t'ujbil c'ot yu'un Dios yo' ta sbain ta yaq'uel ti matanaletic ti tsots sc'oplal c'otemique, xchi'uc ta xchiq'uel ti pom ta stojol ti Diose, ti yac'uc sba ta tunele, xchi'uc ta yalel ti xch'ul lequilale, ti j'ech'el com ta sbaic ti Aarón xchi'uc ti xnich'nabe.

¹⁴Ti Moisés ti c'ot ta yajtunel Diose, jmoj laj svol sbaic xchi'uc snitilultac ti Levi c'alal laj yich'ic chapele.

¹⁵Xnich'nabtac ti Moisese, ja' ti Gersone, xchi'uc ti Eliezere.

¹⁶Sba xnich'on ti Gersone, ja' ti Sebuele.

¹⁷Ti Rehabiase, ja' sba xnich'on ti Eliezere. Mi ja'uc xa laj yil yan xnich'nab. Ja'uc ti Rehabiase laj yil ep xnich'nab.

¹⁸Sba xnich'on ti Izhare, ja' ti Selomite.

¹⁹Xnich'nab ti Hebrone, xi s'elan oye: Jeraías ti banquilale, Amarías ti xchibale, Jahaziel ti yoxibale, Jecamán ti xchanibale.

²⁰Xnich'nab ti Uziele, xi s'elan oye: Micaías ti banquilale, Isías ti xchibale.

²¹Xnich'nab ti Merarie, ja' ti Mahlie, xchi'uc ti Musie. Xnich'nab ti Mahlie, ja' ti Eleazare, xchi'uc ti Cise.

²²C'alal cham ti Eleazare, xi s'elan c'ot ta stojole: mu'yuc laj yil squeremtac. C'ajomal no'ox laj yil stsebtac ti laj yic' sbaic squerem nich'nab ti Cis ti ja' sjuntotique.

²³Xnich'nabtac ti Musie, oy oxibic ti xi s'elan oye: ja' ti Mahlie, ti Edare, xchi'uc ti Jeremote.

²⁴Taje, ja' snitilultac ti Levi ti c'u yepalic oyic ta jujuchop ti tsacbat sbiic c'alal ech' ti tsacob-biile, ti c'otemic ta totiletic yu'un jujuchop ti yich'ojic jtob jabile, xchi'uc ti x'ech' xa batele, ti ochemic ta tunel ta ch'ulnae.

²⁵Xi ono'ox yaloj ma' ti David une: “Ti Ajvalil Dios yu'un ti Israele laj xa yac'be sta jun yo'nton ti steclumale, ti j'ech'el laj xchotan o ti sna stuc ta Jerusalene.

²⁶Jech o xal ti levitaetic une, mu'yuc xa ta xcuchilanic ta jujujot Yaxibalna ti Diose, xchi'uc ti c'usitic jtunel meltsanbil sventa yich'obil ta muq'ue.”

²⁷Ja' yu'un un cha'e, mu'yuc stselbuj yu'un David jech c'u cha'al snopoj ono'ox ta yo'ntone. Laj yich' tsacbel sbiic snitilultac Levi ti lic ta jtob (20) jabile, xchi'uc ti x'ech' xa batele.

²⁸Pasbilic ta mantal yu'un ti paleetic snitilultac ti Aarone yo' jech ta xtunic ta ch'ulna, ti sbainojic ta sq'uelel ti yamaq'uiltaque, ti ep ta c'ol naetique, ta spoquel ta suq'uel ti c'usitic jtuneletique, co'ol jech c'u cha'al sc'an pasel yan abtel ta ch'ulnae.

²⁹Sbainojic ta sq'uelel ti jtunel pan ta xich' cholele, ti juch'bil trigo matanal sat ts'unubale, ti jayaquil bacubtasbil ascalil pane, ti pan ch'abal ac'bil ti spajubtasobile, ti matanaletic ti c'usitic ta'ajesbil ta xalteme, ti c'usitic vots'bile, xchi'uc scotol ti c'usitic bisbil yalale, ti bisbil no'ox ta sbisoltaque.

³⁰Tsots sc'oplal xtoc ti oyicuc ta ch'ulna xmal sacube yo' jech ta xq'uejinic ta xalbeic coliyal Dios

³¹c'alal yorail ta xaq'uic scotol chic'bil matanal ta stojol ti Dios ta sc'ac'alil cuxob o'ntonale, ti jujun q'uin yu'un ach' ue, xchi'uc ti q'uinetic ti tsots sc'oplale, ti j'ech'el tunicuc yu'un Dios c'u yepal tsacbil ti sbiique.

³²Sbainojic ta stuc'ulanel xtoc ti Axibalnae, xchi'uc ti bu nupel ta be xchi'uc ti Diose, ti yac'ojuc no'ox sbaic ta tunel ta ch'ulna ti pasbilic ta mantal yu'un snitilultac ti Aarón ti jmoj svinquilel sbaique.