Read Tzotzil 1 Crónicas 26 Bible Online

1 Crónicas 26 - Tzotzil bible

1 Crónicas 26

¹C'alal laj yich'ic ac'bel ti bu ta sbainic ti jchabiej ti'naetique, xi s'elane: Ta sventa ti coreitaetique, ja' ti Meselemías xnich'on ti Coree, ti ja' xnich'on ti Ebiasafe.

²Xnich'nab ti Meselemiase, xi s'elane: Ti Zacarías ti ja' banquilale. Ti xchibale, ja' ti Jediaele. Ti yoxibale, ja' ti Zebadiase. Ti xchanibale, ja' ti Jatniele.

³Ti yo'obale, ja' ti Elame. Ti svaquibale, ja' ti Johanane. Ti yucubale, ja' ti Elioenaie.

⁴Xnich'nab ti Obed-edome, xi s'elane: Ti Semaías ti ja' banquilale. Ti xchibale, ja' ti Jozabade. Ti yoxibale, ja' ti Joae. Ti xchanibale, ja' ti Sacare. Ti yo'obale, ja' ti Natanaele.

⁵Ti svaquibale, ja' ti Amiele. Ti yucubale, ja' ti Isacare. Ti xvaxaquibale, ja' ti Peultaie. Ti Diose ep laj sva'an sba ta stojolal ti Obed-edome, jech ep ti xnich'nabe.

⁶Ti Semaías xnich'on ti Obed-edome, oy chib squerem ta spasic ta mantal ti jujuchop snitilultaque.

⁷Xnich'nab ti Semaiase, ja' ti Otnie, ti Rafaele, ti Obede, ti Elzabade, ti Elihue, xchi'uc ti Samaquiase, viniquetic ti cajal sc'oplalique.

⁸Scotolic taje, ja' snitilultac ti Obed-edome. Ti xnich'nabe, xchi'uc ti xchi'iltac ta voq'uele, viniquetic ti xjoybij xtojobic ta yaq'uel iluc ta sbainel ti yabtelique. Oy chib xchanvinic (62) ta vo' scotolic ti snitilultac ti Obed-edome.

⁹Xnich'nab xchi'uc xchi'iltac ta voq'uel ti Meselemiase, xi s'elan oye: oyic vaxaclajunvo' (18) viniquetic ti mu sna' xi'ique.

¹⁰Xnich'nab ti Hosae, snitilultac ti Merarie: ti Simri ti c'ot ta banquilal yu'unique. Manchucuc mi ma'uc ti banquilal nich'onile, comtsanat ta banquilal yu'un ti stote.

¹¹Ti xchibale, ja' ti Hilciase. Ti yoxibale, ja' ti Tebaliase. Ti xchanibale, ja' ti Zacariase. C'ot ta scotol xchi'uc ti xchi'iltac ta voq'uele, xchi'uc xnich'nab ti Hosae, oxlajunvo' (13) ta scotol.

¹²Taje, ja' laj sbainic ta xchabiel ti ti'naetique, ti co'ol sbainojic c'ot ta sq'uelel yabtelic jmoj xchi'uc ti banquilaletique, xchi'uc ti its'inal jtuneletic ta ch'ulnae.

¹³Ta jujuchop xchi'uc xnich'nabic laj sq'uelic ti yorail ti bu ta xc'ot ta sq'uelel ti ti'nae. Ochic ta tunel ec ti buch'u cajal yabtel yich'oje, xchi'uc buch'u mu sta cajal yabtel yich'oje.

¹⁴C'ot yorail yu'un ti Selemías ta xchabiel ti ti'na ti oy ta yeloval sloq'ueb c'ac'ale. Ti Zacarías ti ja' xnich'one, ti oy sbijil ta tojobtasvaneje, c'ot yorail yu'un ta sbainel ti ti'na ti oy ta stuq'uil yolon ti yolon xocon sloq'ueb c'ac'ale.

¹⁵Ti Obed-edome, c'ot yorail yu'un ta sbainel ti'na ti oy ta stuq'uil yolon ti yac'ol xocon sloq'ueb c'ac'ale. Ti xnich'nabtaque, com ta sbaic ta xchabiel yaviltac ti c'usitic ta xich' aq'uel ta ch'ulnae.

¹⁶Ti Hosae, c'ot yorail yu'un ta sbainel ti'na ti oy ta yeloval smaleb c'ac'al ti sbiinoj ti'na Saléquet ti ta xlic ech'el ta muyebaltic yu'un ti bee. Xi s'elan ma' ti bu ta sventain ti abteletic ti ta xich'ic ch'acbele:

¹⁷Ta yeloval sloq'ueb c'ac'ale, oy vaquib jchabiej ti'naetic ta x'ech'ic jujun c'ac'al. Oy chanib ta stuq'uil yolon ti yolon xocon sloq'ueb c'ac'ale. Oy chanib xtoc ta stuq'uil yolon ti yac'ol xocon sloq'ueb c'ac'ale. Oy chib jchabiej ti'na xtoc ta jujun yaviltac ti c'usitic q'uejbile.

¹⁸Ta amac' ti bu ta x'ech' ti jbeinel ta yelov smaleb c'ac'ale, oy chanib xchabiel, chib xchabiel ta yut ti amaq'ue.

¹⁹Ja' jech s'elan ch'acbil c'ot stunelic ti jchabiej ti'naetic ti ja' snitilulic ti Coree, xchi'uc ti Merarie.

²⁰Oy yan levitaetic laj sbainic ta xchabiel yaviltac ti c'usitic toyol stojol oy ta ch'ulnae, xchi'uc ti yaviltac matanaletic ti tsots sc'oplal c'oteme.

²¹Ti xnich'nab ti Ladán ti lic talel sts'unubalic ta stojol ti Gersone, xchi'uc ti Jehiele,

²²xchi'uc xnich'nab ti Jehiele, xchi'uc xnich'nab ti xchi'ilic ta voq'uel ti ja' Zetam xchi'uc ti Joele, laj sbainic ta xchabiel ti c'usitic toyol stojol oy ta ch'ulnae.

²³Ta snitilultac ti Amrame, ti Izhare, ti Hebrone, xchi'uc ti Uziele,

²⁴ti buch'u c'ot ta banquilal yu'unic ti yich'oj lec ta venta ti c'usitic toyol stojole, ja' ti Sebuele, snitilul ti Gersón ti ayan talel ta stojol ti Moisese.

²⁵Ti yuts' yalal sbaic ta sventa ti Eliezere, ja' ti Rehabías xnich'on ti Eliezere; ti Jesahías xnich'on ti Rehabiase; ti Joram xnich'on ti Jesahiase; ti Zicri xnich'on ti Jorame; ti Selomit xnich'on ti Zicrie.

²⁶Ti Selomite, xchi'uc ti xchi'iltac ta voq'uele, sbainojic c'ot ta xchabiel yaviltac ti c'usitic jtunel laj yac' ta sventa Dios ti Davide, xchi'uc ti banquilaletic yu'un ta jujuchope, ti banquilaletic yu'un ti epal soldadoetique, xchi'uc ti cajal yabtel yich'ojic ta sventainel ti ep ta voc' soldadoetique.

²⁷Taje, ja' ti c'usitic laj staic talel ti c'alal oyic ta letoe, ti laj yaq'uic tunuc ti ta ch'ulnae.

²⁸Tsacbil c'ot ta venta yu'unic xtoc, ti c'usitic laj yac'beic sventain Dios ti Samuel ti jamal sba sat ta yalel ti c'usitic ta xc'ot ta pasele, xchi'uc ti c'usi yac'oj ti Saúl xnich'on ti Cise, ti c'usi yac'oj ti Abner xnich'on ti Nere, xchi'uc ti c'usi yac'oj ti Joab xnich'on ti Sarviae. Scotol ti c'usitic tsots stunel taje, xchabioj c'ot ti Selomit xchi'uc ti xchi'iltac ta voq'uele.

²⁹Ta snitilultac ti Izhare, ti Quenaniase xchi'uc ti xnich'nabe, c'otic ta j'opisialetic ta jchapanvanejetic ti sbainojic ta sq'uelel ti c'usitic sc'an chapanel yu'un ti c'u yepal smacoj ti jteclum Israele.

³⁰Ta snitilultac ti Hebrone, ti Hasabiase, xchi'uc ti yuts' yalaltaque, oyic vuclajuneb ciento (1,700) ta vo' viniquetic ti tsots stunelique. Taje, sbainojic c'ot ta yalbel mantal ti Israel ti oyic ta yelov smalebal c'ac'al yu'un ti uc'um Jordane, jech c'u cha'al c'usitic oy yu'un Dios ti sc'an q'uelbele, xchi'uc ta xtunic ta yajtuneltac ti ajvalile.

³¹Ti ta xcha'vinical (40) xa ox jabil yochel ta ajvalilal ti Davide, laj yich' sa'el t'unel bu tsacajtic sbiic ti jujuchop snitilultac ti Hebrone. Vinaj ti oy viniquetic ti tsots stunelic ti nacalic ta jteclum Jazer ti oy ta Galaade. Ti banquilal jvolvanej yu'un snitilultac ti Hebrone, ja' ti Jeriase.

³²Ti laj svol sbaic ta jmoj xchi'uc ti yuts' yalaltaque, viniquetic ti tsots stunelique, loc' ta chapel cha'mil xchi'uc vucub ciento (2,700) ta vo' ta scotolic ti jvolvanej yu'unique. Ti ajvalil David une laj yac'anbe sbainan ta sventainel snitilultac ti Rubene, ti Gade, xchi'uc ti o'lol jvoc' snitilultac ti Manasese, xchi'uc scotol ti c'usi xlic xcaj sc'an pasbel ti Diose, mi ja' ti c'usi sc'an pasbel ti ajvalile.