Read Tzotzil 1 Crónicas 28 Bible Online

1 Crónicas 28 - Tzotzil bible

1 Crónicas 28

¹Ti Davide lic stsob scotol ta Jerusalén ti buch'u yich'oj yabtelic ta Israele: ja' ti banquilaletic yu'un ti jujuvoc' israeletique, ti banquilaletic yu'un ti jujuvoc' soldadoetic ti ta xtunic ta stojol ti ajvalile, ti banquilal jpas-mantaletic yu'un jmil (1,000) ta vo' soldadoetique, ti banquilaletic yu'un vo'vinic (100) ta vo' j'ac'-leto soldadoe, ti buch'utic sbainojic ta sq'uelel c'usitic xloc' x'ayan ta scotol banomile, ti buch'utic sbainojic ta sq'uelel xvacaxtac ti ajvalile, ti xnich'nabtaque, ti buch'utic ich'bil ye sti'ique, xchi'uc scotol ti soldadoetic ti cajal c'otem sc'oplalique.

²Va'i ti David une xi laj yal ti laj sva'an sbae: “A'yio ava'iic, jchi'iltac, jteclumaltac: Oy ox ta co'nton ta smeltsanbel jun yavil ti bu ta xcom xcaxail strate ti Diose, ti comuc o bu ta xchoti ta ventainvanej ti Dios cu'untique, ti chapal xa cu'un ti c'usitic ta xtun ta sventa ta xich' meltsanele.

³Ja'uc le' une, xiyutun ti Dios une: ‘Ma'uc vo'ot ta xameltsanbun ma' ti jbej ch'ulnae, yu'un banquilal j'ac'-leto xava'i aba ti mu albajuc amaloj ti ch'ich'e.’

⁴Manchuc mi jech un, ti Ajvalil Dios yu'un ti Israele, laj st'ujun loq'uel ta stojol ti jnitilultaque yo' jech laj sva'anun ta ajvalil yu'un ti Israel sbatel osile. C'ot ta t'ujel yu'un ti ta snitilultac ti Judae, ta xc'ot ta jventainvanej ti snitilule. Ti ta yalab xnich'nab Judae, c'ot ta t'ujel yu'un snitilultac ti jtot jme'e. Ti ta stojol xnich'nabtac ti jtote, lit'uje loq'uel ec yo' jech laj scomtsanun ta ajvalil yu'un scotol ti Israele.

⁵Avi tana une, ta scotol ti jnich'nab ti ep laj yac'bun ti Diose, ja' t'ujbil c'ot ti jnich'on Salomón ti ta xchoti ta sbainel ti Israele, ti ja' slumal ti Diose.

⁶Xi laj yalbun ti Dios xtoque: ‘Ja' ta sva'anbun jch'ulna ti anich'on Salomone. Ta smeltsanbun ti yamaq'uile. Yu'un c'ot ta jnich'on ti laj jt'uje, lic'ot ta totil yu'un ec.

⁷Mi j'ech'el ta xac'be yipal ta spasel ti c'usi ta xal ti jmantaltaque, xchi'uc ti c'usi nopbil cu'un jech c'u cha'al yacal ta spas talel tana li'e, j'ech'el ta jchotan o ta ajvalil sbatel osil.’

⁸“Avi tana li' cha'e, ta sba ta sat scotol ti Israele, ti oyotic ta tsoblej ta stojol ti Ajvalile, xchi'uc ti ts'etel xchiquin ti Dios ta ya'yiel ti jc'optique, j'ech'eluc nablanic ta spasel scotol smantaltac ti Ajvalil Dios avu'unique, yo' jech ta xcom o ta avu'unic ti muc' ta jteclum ti jun yutsile, ti ta jech yepal ta xc'ot ta xrextoic avu'unic sbatel osil ti avalab anich'nabique.

⁹Ti vo'ot ec une, nich'on Salomón, c'otuc me ta Dios avu'un ti Dios yu'un ti atote. Ta sjunuluc avo'nton, tunan ta stojol. Oyuc slequil ti ajol avo'ntone, yu'un ti Diose chajal ta sba ta sat ti c'usi ta xich' pasele, ti c'u s'elan ti snopbenale. Jech ec mi ta xasa'e, jech ti stuque ta xac' sba iluc ta atojol. Mi ta xach'ac aba ta stojole, ta j'ech'el bajbil tenbil ta xac'ot yu'un.

¹⁰Bejbunuc ta ajol, mu xch'ay xava'i ti t'ujbilot yu'un Dios yo' ta xameltsan jbej na ti ta xc'ot ta ch'ulnae. Ja' yu'un un, ¡tsotsan me un, liqueso ti abtele!”

¹¹Ti David une laj yac'be ta sc'ob Salomón ti ja' xnich'one, svunal ti bu loc'tabil ti c'u s'elan ta xcom sti'tac ti ch'ulna ta xich' va'anele, ti c'u s'elan ta xcom snailtac ti oy c'usitic ta xich' q'uejele, ti c'u s'elan ta xcom yut ti xcha'cajal nae, ti ep ta c'ol ti yute, xchi'uc ti Bats'i Cuxul Ch'ul Cuartoe.

¹²Ma'uc no'ox taje, laj yac'be ta sc'ob svunal ti c'u s'elan nopbil yu'un scotol ta xich' meltsanel ti yamaq'uil ch'ulnae, ti ep ta c'ol naetic ta joyobe, ti c'usitic toyol stojole, xchi'uc sq'uejobiltac ti tsots sc'oplal c'otem ta matanale.

¹³Laj yac'be ta sc'ob xtoc svunal ti bu loc'tabil ep ta c'ol yut naetic ta xtun yu'unic sventa sjel stsac sbaic ta abtel ti paleetique, xchi'uc ti levitaetique, xchi'uc scotol ti buch'utic xlic xcaj ti c'usitic ta spasic ta ch'ulnae, xchi'uc scotol ti c'usitic ta stunesic sventa ta spasbeic stoyel xi'el ti Dios ta ch'ulnae.

¹⁴Laj yac'be ta yoc ta sc'ob xtoc ti epal oroe, ti platae, yo' jech ta xloc' o lec ti c'usitic ta xich' meltsanel ta oroe, xchi'uc ta plata ti ta xich' tunesel ti c'alal ta xich' pasbel stoyel xi'el ti Diose,

¹⁵ti ta stunesic o ta spajleb cantila ti ta xich' meltsanele, xchi'uc ta stunesic ta lampara ti ta xich' meltsanele, jech c'u cha'al ti oroe, ti plata ti jech ono'ox yalal bisbil laj yac'be ta sc'ob jech c'u cha'al ta xich' ti jujune.

¹⁶Jech ono'ox laj spas xtoc ta sventa ti jujun mexa ti ta xich' meltsanel mi ta oro, mi ta plata, sventa ti bu ta xich' cholel ti pan ti tsots sc'oplal c'oteme.

¹⁷Ma'uc no'ox taje, laj yac'be ta sc'ob ti oro sventa ta xich' ti luc-luc taq'uinetique, ti muc' ta lech-lech taq'uinetique, xchi'uc ti jarruetique, jech c'u cha'al ti yan taq'uinetique, ti oroe, ti platae, ti c'u yepal yalal xloc' o lec ta xich' meltsanel ti jujun bisetique.

¹⁸Yepal no'ox laj yac'be ta sc'ob xtoc ti oro ti t'ujbil leque, sventa ta xich' meltsanel ti altar sventa xchic'obil ti pome. Laj yac'be ta sc'ob xtoc ti oro sventa ta xich' meltsanel ti carretae, ti lec ta alele, ti ta xich' loc'tael ti c'usi oy xiq'uic ti xlich'ojic ta smaquel xcaxail strate ti Diose.

¹⁹Scotol taje, ts'ibabil ta jlic vun ti ac'bat sna' David yu'un ti Diose, ti bu ta svinajesbe scotol c'u s'elan ta xich' pasel ti abteletique, co'ol jech c'u cha'al loc'tabil ta svunale.

²⁰Va'i ti David une xi laj yalbe ti Salomone: “¡Tsotsan, j'ech'eluc, va'ano aba, liqueso ti avabtele! ¡Mu xatsiq'ues avo'nton, mi ja'uc xaxi'. Ti Ajvalil Dios cu'une ta xchi'inot! Ti c'u sjalil ta xc'ot ta tsutsel scotol ti abteletic ti tsots sc'oplal ta xtun ta ch'ulnae, j'ech'el sva'anoj sba ta atojol, mi ja'uc xayictaot comel.

²¹Li' oy ta atojol ta xac' sbaic ta tunel ti paleetique, xchi'uc ti levitaetic xchapanoj sbaic ta tunel ta ch'ulnae. Ta scoltaoxuc ec ta sventa scotol jaytos abtel ti buch'u loq'uem ayanem ta yo'nton ti sna' spasic ep ta tos abtele, ti xvul no'ox ta sjolic scotol c'u s'elan ta xtunique, xchi'uc ti banquilaletique, xchi'uc scotol ti jteclum ti ta xch'un pasel ta mantale.”