Read Tzotzil 1 Crónicas 4 Bible Online

1 Crónicas 4 - Tzotzil bible

1 Crónicas 4

¹Xnich'nabtac ti Judae, ja' ti Farese, ti Hezrone, ti Carmie, ti Hure, xchi'uc ti Sobale.

²Nich'naj ti Reaías xnich'on ti Sobale, Jahat laj yac'be sbi. Nich'naj ti Jahate, Ahumai laj yac'be sbi ti june. Lahad laj yac'be sbi ti yane. Ti jujuchop taje, lic ayanuc talel yu'unic sts'unubal ti zoratitaetique.

³Xnich'nabtac ti Hure, ja' ti Etane, ti Jezreele, ti Ismae, ti Idbase, ti Penuel totil yu'un ti Gedore, xchi'uc ti Ezer totil yu'un ti Husae. Taje, oy jun xchi'ilic ta voq'uel ti Haslelponi sbie.

⁴Nich'naj ti Penuele, Gedor laj yac'be sbi. Nich'naj ti Ezere, Husa laj yac'be sbi. Taje, ja' xnich'nabtac ti Hur ta sba yol ti Efratae, smolmuc'tot ti Belene.

⁵Ti Asur stot ti Tecoae, xi s'elan laj yic' chib antse: Hela sbi ti june. Naara sbi ti yane.

⁶Ti Naarae, ja' sme'ic ti Ahuzame, ti Hefere, ti Temenie, xchi'uc ti Ahastarie. Taje, ja' yalab ti Naarae.

⁷Yalabtac ti Helae, ja' ti Zerete, ti Jesohare, xchi'uc ti Etnane.

⁸Nich'naj ti Cose, Anub laj yac'be sbi ti june. Zobebá laj yac'be sbi ti yane, ti totil me'il yu'unic ti jujuchop yu'un ti Aharhel xnich'on ti Harume.

⁹Ti Jabese, stuc no'ox ti cajal sc'oplale, mu sta ti xchi'iltac ta voq'uele. Biiltasat Jabes yu'un ti sme'e, yu'un xi laj yale: “Melel xcal, ep laj quich' jvocol yu'un xc'uxul c'alal laj jvoq'uese.”

¹⁰Ti Jabese lic c'opoj ti'inuc ta stojol Dios yu'un Israel ti xi laj yalbee: “Avocoluc, c'uxubajan cu'un yu'un ti avutsilal alequilale, ti jtauc jamaluc ti cosilale, ti pojun coltaun yu'un ti jti' o'ntone, yo' jech mu jta ti jvocole.” Ac'bat yu'un Dios ti c'usi laj sc'ane.

¹¹Ti Quelub xchi'il ta voq'uel ti Suae, nich'naj, Mehir laj yac'be sbi. Nich'naj ti Mehire, Eston laj yac'be sbi.

¹²Nich'naj ti Estone, Bet-rafá laj yac'be sbi ti june. Paséah laj yac'be sbi ti xchibale. Tehiná laj yac'be sbi ti yan ti buch'u laj sliques ti jteclum Nahase. Taje, ja'ic ti jnaclejetic ta Recae.

¹³Xnich'nabtac ti Quenaze, ja' ti Otoniele, xchi'uc ti Seraiase. Xnich'nabtac ti Otoniele, ja' ti Hatate,

¹⁴xchi'uc ti Meonotaie. Nich'naj ti Meonotaie, Ofrá laj yac'be sbi. Nich'naj ti Seraiase, Joab laj yac'be sbi, smolmuc'totic ti jnaclejetic ti oyic ta stenlej Harasime, ti sna'ic yabtelanel ep ta tos abtele.

¹⁵Xnich'nabtac ti Caleb xnich'on ti Jefonee, ja'ic ti Ire, ti Elae, xchi'uc ti Naame. Nich'naj ti Elae, Quenaz laj yac'be sbi.

¹⁶Xnich'nabtac ti Jahaleele, ja' ti Zife, ti Zifae, ti Tiriase, xchi'uc ti Asarele.

¹⁷Xnich'nabtac ti Esdrase, ja' ti Jetere, ti Merede, ti Efere, xchi'uc ti Jalone. Ti Merede laj yic'be stseb ti faraón ti sbiinoj Bitiae, ti yalab xnich'nab laj yilic xchi'uque, ja' ti Mariae, ti Samaie, xchi'uc ti Isbah stot ti Estemoae. Ti Merede laj yic' yan yajnil ti liquel ta stojol snitilul ti Judae, sme' ti Jerede, ti Hebere, xchi'uc ti Jecutiele. Nich'naj ti Jerede, Gedor laj yac'be sbi. Nich'naj ti Hebere, Soco laj yac'be sbi. Nich'naj ti Jecutiele, Zanoa laj yac'be sbi.

¹⁹Yalabtac yajnil ti Hodías xchi'il ta voq'uel ti Nahame, totil yu'un ti Keilae, ja' ti Daliá ti ja' garmitae, xchi'uc ti Estemoa ti ja' maacateoe.

²⁰Xnich'nabtac ti Simone, ja' ti Amnone, ti Rinae, ti Ben-hanane, xchi'uc ti Tilone. Xnich'nab ti Isie, ja' ti Zohete, xchi'uc ti Ben-zohete.

²¹Snitilultac ti Sela xnich'on ti Judae, ja' ti Er stot ti Lecae, ti Ladá stot ti Maresae, ti sna' xabtelanic xela poc' jujuchop ti oyic ta Bet-asbeae.

²²Ja'uc ti Joacime, ti jnaclejetic ta Cozebae, ti Joase xchi'uc ti Sarafe, bat yiq'uic ti moabita antsetique, ti sutic ta Belén ti xi slo'il ya'yejal ti laj sts'ibaic comel ta vo'nee.

²³Taje, naca jpotobetic ti nacalic ta Netaime, xchi'uc ta Guederae, ti ochemic ta yajtuneltac ti ajvalile.

²⁴Xnich'nabtac ti Simeone, ja' ti Nemuele, ti Jamine, ti Jaribe, ti Zerae, xchi'uc ti Saule.

²⁵Nich'naj ti Saule, Salum laj yac'be sbi. Nich'naj ti Salume, Mibsam laj yac'be sbi. Nich'naj ti Mibsame, Mismá laj yac'be sbi.

²⁶Nich'naj ti Mismae, Hamuel laj yac'be sbi. Nich'naj ti Hamuele, Zacur laj yac'be sbi. Nich'naj ti Zacure, Simei laj yac'be sbi.

²⁷Ti Simeie laj yil vaclajunvo' (16) squeremtac, xchi'uc vaquib stsebetic. Ja'uc ti xchi'iltac ta voq'uele mu'yuc xil ep xnich'nabic. Ti jujuchopic une mu'yuc x'epajic jech c'u cha'al epaj snitilultac ti Judae.

²⁸Nacalic ta Beerseba, ta Molada, ta Hasar-sual, ta Bilha, ta Ésem, ta Tolad, ta Betuel, ta Horma, ta Siclag, ta Bet-marcabot, ta Hasar-susim, ta Bet-birai, xchi'uc ta Saaraim. Ja' jech yepal slumal smacojic ti c'alal lic ochuc ta ajvalilal ti Davide.

³²Ma'uc no'ox taje, xi s'elan sbi smacojic yan vo'ob jteclume: ti Etame, ti Aine, ti Rimone, ti Toquene, xchi'uc ti Asane.

³³Smacojic xtoc ti bic'tal lumetic ti joyol ta spat ta xocon ti muc'tiquil lum ti c'ot c'alal to Baalate. Ja' jech ma' ti bu naquiic une, ti vinaj c'u yepal oyic ta jujuchope.

³⁴Ti Mesobabe, ti Jamleque, ti Josías xnich'on ti Amasiase,

³⁵ti Joele, ti Jehú xnich'on ti Josibías ti ayan talel ta stojol ti Seraiase, ti ayan talel ta stojol ti Asiele,

³⁶ti Elioenaie, ti Jaacobae, ti Jesohaiase, ti Asaiase, ti Adiele, ti Jesimiele, ti Benaiase,

³⁷ti Ziza xnich'on ti Sifie, ti ayan talel ta stojol ti Alone, ti ayan talel ta stojol ti Jedaiase, ti ayan talel ta stojol ti Simrie, ti ayan talel ta stojol ti Semaiase,

³⁸ti va'i s'elan xcholet laj yich' albel sc'oplalic taje, banquilaletic c'otemic yu'un ti jujuchop nitiluletique, ti epajic ta j'ech'el xchi'uc ti yalab xnich'nabique.

³⁹Xvoletic c'otel xchi'uc xchon sbolomic ta sa'el yaxal ta ochebal yosilal ti Gerare, ta stenlej ti oy ta yeloval sloq'ueb c'ac'ale.

⁴⁰Ti bu taje, spajeb xa no'ox yutsil pulem ti yaxal laj staique. Lec jamal ta j'ech'el ti banomile, toj nopelotic yu'un, mu'yuc xi'el. Ti bu taje, naquiic to ox ta ba'yel snitilultac ti Came.

⁴¹Ja'uc ti c'alal yorail tiq'uil ta ajvalil yu'un Judá ti Ezequiase, c'otic ti viniquetic ti laj xa yich' albel sc'oplalique. Ta j'ech'el laj xch'aybeic sc'oplal. Laj slomesic ta j'ech'el ti axibal naetique. Ti bu lamalic ta naclej c'ot staique, lic ochicuc ta naclej ti stuquic ti c'alal loc' ech'el yu'unique. Yepal sve'el ti xchon sbolomic laj staique.

⁴²Ma'uc no'ox taje, vo'ob ciento (500) ta vo' xchi'ilic snitilultac ti Simeone, muyic ech'el ta vitstic yu'un ti Seire, ti tsobbilic ech'el yu'un ti Pelatiase, ti Neariase, ti Refaiase, xchi'uc ti Uziele, xnich'nabtac ti Isie.

⁴³Ta j'ech'el laj stsutsesbeic sts'unubal ti amalecitaetic ti c'u xa no'ox yepal nacalique. Ja' jech liquic talel ta naclej avi tana le' une.