Read Tzotzil 2 Crónicas 1 Bible Online

2 Crónicas 1 - Tzotzil bible

2 Crónicas 1

¹Ti coltabil yu'un Dios ta sventa com ta ajvalil ti Salomón xnich'on ti Davide, laj stsac lec yip ti yabtele. Laj sta ti cajal c'ot ta j'ech'ele.

²Va'i un, xi s'elan laj sta ta iq'uel scotol ti Israele: banquilaletic yu'un ti jujuvoc' soldadoe, banquilaletic yu'un ti jujuvoc' j'opisiale, xchi'uc scotol ti banquilal jpas-mantal yu'un ti jujuchop yich'oj yabtelic ta Israele.

³Ti c'u yepal laj stsob sbaic xchi'uc ti jteclume, batic ta Gabaón ta Axibalna ti bu nupel ta be yu'un Dios ti laj smeltsan ti Moisés yajtunel Dios c'alal oy to ox ta sbajtical banomile.

⁴Ja'uc ti David une laj ono'ox yich' loq'uel ti xcaxa Dios ta Quiriat-jearim ti bu to ox sva'anojbe ti snaile, yu'un laj xa sva'an jbej Axibalna ti ta Jerusalene.

⁵Ti c'anal taq'uin altar smeltsanoj ti Bezaleel xnich'on ti Urí smom ti Ure, oy ta yeloval Axibalna yu'un Dios ta Gabaone. Ti bu taje, ti Salomone xchi'uc ti jteclume bat stabeic yoquilal ta sjaq'uel sbaic.

⁶Ti Salomone muy ech'el bu oy ti altar ti meltsanbil ta c'anal taq'uin ti oy ta stojol Dios ta yeloval Axibalna ti bu nupel ta be yu'une. Laj yac' lajuneb ciento (1,000) ta cot chic'bil matanal ta sba ti altare.

⁷Ta yac'ubalil no'ox taj une, laj yac' sba iluc ti Dios ti xi laj yalbe ti Salomone: “C'anbun ti c'usi oy ta avo'ntone, ta xacac'be.”

⁸Ti Salomone xi laj stac'be ti Diose: “Ti David ti ja' jtote, toj ep laj ac'uxubin, ti licom ta xq'uexol ta ajvalilal avu'une.

⁹Tana li' une, Dios ti Ajvalilote, c'otuc ta pasel avu'un ti ac'op ti laj avalbe ya'i ti David ti ja' jtote, ti lic'ot xa ta ajvalil yu'un ti jteclum mu no'ox albajuc yepale, ti co'ol s'elan spucuquil banomile.

¹⁰Ja' yu'un tana li'e, ac'bun jbijil yo' jech ta jna' lec ta snopel c'u s'elan ta jtojobtas ti jteclum li'e. Ti jech le'e, ¿buch'u xa ono'ox la ta sventain ti ateclumal ti mu albajuc yepale?”

¹¹Ti Diose xi laj stac'be ti Salomone: “Ti jech loc' ayan ta avo'nton ta sc'anele, ti ma'uc laj ac'an ti ac'ulejale, ti c'usitic ta xtune, ti avich'el ta muq'ue, mi ja'uc slajel ti avajcontrataque, mu ja'uc natijuc ti acuxlejale, ti ja' no'ox laj ac'an ti abijile, yo' jech xana' lec snopel ti c'u s'elan ta xaventain ti jteclumal ti laj jva'anot ta ajvalile,

¹²ta xcac'bot ti abijile, ti snopobil avu'une. Ta xcac'bot xtoc ti ac'ulejale, ti c'usi x'ayan avu'une, ti avich'el ta muq'ue, ti atuc no'ox jech ta xatae. Mi ja'uc laj staic ti ajvaliletic laj ech'uc ta ba'yele, mi ja'uc ti ta to xtalic ta ts'acale.”

¹³Ta ts'acal to un, sut batel ta Jerusalén ti Salomone. Lic chotiuc ta ajvalilal yu'un ti Israele c'alal laj ech'el yo'nton ta Gabaón ti bu nupel ta be yu'un Dios ta Axibalnae.

¹⁴Ti Salomone laj svol ta tsobel epal carretaetic xchi'uc jcajlejetic ta ca', ti oy yu'un chanlajuneb ciento (1,400) ta cot carretaetic xchi'uc lajcha'mil (12,000) jcajlejetic ta ca', ti laj stunes ta sbainel sq'uelel carretaetic ti chabibil ta jujun lum sventa letoe, xchi'uc c'ot ta yajchabivanej stuc ti ajvalil ta Jerusalene.

¹⁵Ti ajvalile, c'ot ta pasel yu'un ti laj stsob sba ti platae, ti oroe, ti busul ta j'ech'el co'ol s'elan ton ta Jerusalene. C'ot ta pasel xtoc ti busul no'ox ta j'ech'el ti ch'ut te'e jech c'u cha'al ti te'tical icux mu vocoluc ta tael ta stenlejaltique.

¹⁶Ti ca'etic ta stunes ti Salomone, ta xlic talel ta Muzri xchi'uc ta Cilicia. Ta xmanbat talel yu'un yajbolomajeltac ajvalil ti bu taje.

¹⁷Ti jcot carreta ta xlic talel ta Egiptoe, vaquib ciento (600) ta sep plata taq'uin ti stojole, lajuneb xvaxacvinic (150) ta sep plata stojol ti jcot ca'e. Scotol ti ajvalil yu'un ti hititaetique, xchi'uc ti sirioetique, ta yoc ta sc'ob xa yajbolomajeltac Salomón ta smanic loq'uel.