Read Tzotzil 2 Crónicas 10 Bible Online

2 Crónicas 10 - Tzotzil bible

2 Crónicas 10

¹Ti Roboame bat ta Siquem, yu'un batem scotol ti israeletic yo' jech ta xva'anat ta ajvalil.

²Ja'uc le' une, laj ya'i ti Jeroboam xnich'on ti Nabat ti oy ta Egipto ti c'alal jatav batel yu'un ti ajvalil Salomone. Sut talel xtoc un ti oy ta Egiptoe.

³C'alal laj staic ta iq'uel ti Jeroboame, xi laj yalic scotolic ti israeletic ti c'alal bat sc'oponic ti Roboame:

⁴—Ti atote, toj tsots laj yilbun jvolcutic. Baino cu'uncutic avi tana li' une ta xchapanel jc'oplalcutic ti tsots ilbajinel laj yac' comele. Ta xcac' jbacutic ta tunel ta atojol un —xiic.

⁵—Xatalic ca'itic c'alal li' ta oxib c'ac'ale —xi laj stac' ti Roboame. Va'i un, scotolic sutic ech'el.

⁶Ti ajvalil Roboam une xi bat sjac' bijubtasel ta stojol ti moletic yajtuneltac to ox c'alal ech' ti Salomón ti ja' stote: —¿C'u s'elan xu' xabijubtasicun yo' oy c'usi ta jtac'be ti jchi'lactique?

⁷Xi laj staq'uic ti stuquique: —Mi ta xac'an ti lec xavil aba xchi'uc ti jchi'lactique, tsotsan ta spasbel ti c'usi lec xa'iique, lecuc ave ati' ti c'u s'elan ta xatac'be sutele. Ta xac' sbaic ta tunel ta atojolal unbi.

⁸Ja'uc ti Roboam une mu'yuc xac' ta venta c'u s'elan tojobtasat yu'un ti moletique. C'ajomal no'ox bat sjac' a'yej ta stojol querem viniquetic ti co'ol xch'ielique, ti ochemic ta yajtuneltaque.

⁹Xi lic sjaq'uilane: —¿C'u s'elan xu' xabijubtasicun yo' oy c'usi ta jtac'be ti jchi'lactic ti laj sc'anbeicun ti ac'o jchapanbeic ti svocolic ti ac'batic comel yu'un ti jtote?

¹⁰Ti querem viniquetic ti jmoj xch'ielic xchi'uque, xi laj staq'uique: —Ti jchi'lactic laj sc'anbot ti ac'o achapanbe ti svocolic ti ac'batic comel yu'un ti atote, jech sc'an ta xatac'be jech c'u cha'al li'e: ‘Mi tsots laj yilboxuc avocolic ti jtote, x'ech' to ta xcac' ma' ti vu'un une.

¹¹Ti bu c'alal c'ot avilbajinel ta abtel yu'un ti jtote, x'ech' to me ta jpas ta atojolic ma' ti vu'un une. Mi ta leax no'ox laj stsitsoxuc ti jtote, ti vu'une, yich'oj lec staq'uinal sba sni'tac ma' ti nucul ta xcac'boxuc ava'iique.

¹²Ta yoxibal xa c'ac'al un, bat ti Jeroboam xchi'uc scotol ti jteclum ta stojol ti Roboame jech c'u cha'al yaloj ti ajvalile.

¹³Ja'uc le' une, ti ajvalil Roboame, tsots ye sti' laj stac' ti mu ja'uc laj yac' ta venta c'u s'elan bijubtasvan ti moletique.

¹⁴Ja' lic yal ti xi s'elan bijubtasat yu'un ti querem viniquetique: ti mi tsots ilbat svocolic yu'un ti stote, ti stuque, x'ech' to ta xilbe ti svocolique. Mi tsots jisvan ta nucul ti stote, ti stuque, x'ech' to ta sjisvan ta nucul ti yich'oj staq'uinal sba sni'taque.

¹⁵Ti mu'yuc xac' ta venta jteclum ti ajvalile, nopbil yu'un Dios ti jech ta xc'ot ta pasele yo' mu stselbuj ti c'u s'elan albil yu'un Dios ti Jeroboam xnich'on ti Nabate, ti ac'bat sna' ti Ahías ti liquel talel ta Siloe.

¹⁶C'alal laj yilic scotol ti jteclum Israel ti mu'yuc x'ac'van ta venta ti ajvalile, xi s'elan laj staq'uic sutele: “Xlajet to ma' ti ta x'otesvan ta be yuni nitilul ti David une. Laj to sc'oplal ma' ti ta jch'acbe jrextocutic xnich'on ma' ti Isai une. Batic xch'a ta jnatic ta jujun, israeletic. Tey sq'uel sba ca'tic stuquic ti yuni nitilultac ti David une.” Ta jliquel no'ox un, scotol israeletic batic c'alal to snaic.

¹⁷Ti israeletic nacalic ta jteclumetic yu'un ti Juda une, staoj yav ventainbil comic yu'un ti Roboame.

¹⁸Ti Roboam une c'alal laj stac batel ti Adoram ti sbainoj sujvanej ta abtele, milat ta ton yu'un ti israeletique. Va'i un, ti ajvalil Roboame muy ta scarreta ta anil, c'alal to Jerusalén jatav batel.

¹⁹Ja' c'ot ta pasel lic scontrainic snitilul David ti israeletique, ti jech to oyic avi tana le'e.