Read Tzotzil 2 Crónicas 11 Bible Online

2 Crónicas 11 - Tzotzil bible

2 Crónicas 11

¹C'alal c'ot ta Jerusalén ti Roboame, lic stsob balunvinic ta mil (180,000) soldado ti laj st'uj loq'uel ta stojol snitilultac ti Judae, xchi'uc ta stojol snitilultac ti Benjamine yo' jech ta stsac ta c'op ti israeletique, xchi'uc ta yich'el ti yabtele.

²Ja'uc le' une, c'oponat yu'un Dios ti Semaiase, ti ja' jun yajtunel Dios ti xi albat ya'i mantale:

³“Albo ya'i ti Roboam xnich'on ti Salomone, ajvalil yu'un ti Judae, xchi'uc scotol ti israeletic yu'un ti Judae xchi'uc ti Benjamine,

⁴ti ta xcalbeic ya'iic ti mu stsac sbaic ta leto ti jmoj svinquilel sbaique. Suticuc ech'el ta snaic scotolic, yu'un c'ot ta chapel cu'un.” C'alal laj ya'iic ti va'i s'elan albatic yu'un ti Diose, sutic ech'el. Laj spajes sbaic ta scontrainel ti Jeroboame.

⁵Ti Roboame och ta ajvalilal ta Jerusalén, ti lic smeltsanan nac'obbail jteclumetic ta Judae. Taje, laj stsac lec yip yu'un ti Belene, ti Etame, ti Tecoae, ti Bet-sure, ti Socoe, ti Adulame, ti Gate, ti Maresae, ti Zife, ti Adoraime, ti Laquise, ti Azecae, ti Zorae, ti Ajalone, xchi'uc ti Hebrone, nac'obbail jteclumetic yu'un ti Judae, xchi'uc ti Benjamine.

¹¹Lec chabibil yu'un ti nac'obbailetique, lic sva'anan banquilal soldado ti ac'bil sve'elique, yaceiteic, xchi'uc ti svinoique.

¹²Ma'uc no'ox taje, laj yac'anbe smacobbailic xchi'uc slanzaic ta scotol ti oyic ta jujun jteclumetique, ti lec chabibil yu'un ta j'ech'ele. Ti Roboam une och ta yoc ta sc'ob ti Judá xchi'uc ti Benjamine.

¹³Ti paleetic une, xchi'uc ti levitaetic ti buyuc no'ox tanijemic ta sjunlej Israele, tal stsob sbaic xchi'uc.

¹⁴Yu'un ti levitaetique laj yictaic comel yosil sbanomilic ti bu ta sq'uel ti xchijique, xchi'uc ti c'usitic x'ayan yu'unique yo' jech ta xbatic ta Jerusalén, yu'un buyuc xa no'ox ta yosilal ti Judae, pajesatic ti ta xtunic ta yajpaletac Dios yu'un ti Jeroboam xchi'uc ti yajtuneltaque.

¹⁵Lic sva'anan yajpaletac stuc ti Jeroboam ti ta x'abtejic ta ch'ulna ti ma'uc sventa ti Diose, ta sventa stoyel xi'el ti pucujetique, xchi'uc ti loc'tabil vacaxetic ti laj yac' ta meltsanele.

¹⁶Jech ec ti buch'utic ayanem loq'uem ta yo'nton ta sa'ilan ti Ajvalil Dios yu'unic ti Israele, jech laj spasic ec jech c'u cha'al laj spasic ti paleetique, xchi'uc ti levitaetique, batic ta Jerusalén yo' jech ta xac'beic milbil matanal ti Ajvalil Dios yu'unic ti smolmuc'totic ta vo'nee.

¹⁷Laj stsac yip yu'unic ti ajvalil ti oy ta Judá une, co'ol sjol yo'ntonic xchi'uc ti Roboam xnich'on ti Salomone, ti svoloj sbaic oxib jabil sjalil ta stojole. Oxib no'ox jabil bat ti laj spas jech c'u cha'al ech' ti David xchi'uc ti Salomone.

¹⁸Ti Roboam une laj yic' ti Mahalat yantsil nich'on ti Jerimote, ti ayan talel ta stojol ti David xchi'uc ti Abihail yantsil nich'on ti Eliabe, smom xtoc ti Isaie.

¹⁹Xnich'on ti Roboam xchi'uc ti Mahalate, ja' ti Jehuse, ti Semariase, xchi'uc ti Záhame.

²⁰Ts'acal to un, lic yic' xtoc ti Maacae, yantsil nich'on ti Absalone. Ti xnich'nabtac laj yile, ja'ic ti Abiame, ti Ataie, ti Zizae, xchi'uc ti Selomite.

²¹Vaxaclajunvo' (18) yajniltac ti Roboame. Oy oxvinic (60) ta vo' ti sts'acal ajniltaque. Ta scotol ti antsetic yu'un une, ja' tuch'baj ta yo'nton ta xa'i ti Maacae. Laj yil vaxaquib xcha'vinic (28) ta vo' squeremtac, oxvinic (60) ta vo' stsebtac.

²²Ti Roboame laj stic' ta jtsobvanej yu'un yits'inabtac ti Abiam yol ti Maacae. Oy ta yo'nton ta stic' ya'i ochel ta ajvalil.

²³C'ot ta nopel yu'un ta j'ech'el ti laj xch'acan batel ti xnich'nab ta sventainel scotol yosilal ti Judae, xchi'uc yosilal ti Benjamine, xchi'uc ti nac'obbail jteclumetique, ti laj yac'anbe ti c'usitic ta xtun yu'unique, xchi'uc laj sa'anbe ep yajniltac.