Read Tzotzil 2 Crónicas 12 Bible Online

2 Crónicas 12 - Tzotzil bible

2 Crónicas 12

¹C'alal yich'oj xa lec yip yabtel ta ajvalilal ti Roboame, ti oy xa lec yip ti yo'nton xa'i sba ta j'ech'ele, lic yicta sba ta xch'unel ti oy c'usi jbel albil yu'un ti Diose. Jech lic spasic scotol ti israeletic eque.

²Ja'uc le' une, ti mu'yuc xa slequilic ta stojol ti Diose, ti ta yo'obal jabil yochel ta ajvalilal ti Roboame, ti Sisac ajvalil yu'un ti Egiptoe, bat stsac ta leto ti Jerusalene.

³Yic'oj ech'el lajcha'mil (12,000) ta cot carreta sventa ac'ob-leto, oxvinic ta mil (60,000) soldadoetic ti cajalic ta ca'e, xchi'uc yan xchi'iltac ti jun yepalic liquemic talel ta Egiptoe, ja'ic ti libioetique, ti suquienoetique, xchi'uc ti etiopeetique.

⁴Laj yu'ninan ti nac'obbail jteclumetic oy ta Judae, ti c'ot c'alal to Jerusalene.

⁵Va'i un, ti j'alc'op Semaiase bat ta stojol ti Roboame, xchi'uc ta stojol ti banquilaletic yu'un ti Judae, ti stsoboj sbaic ta Jerusalén ti xvolet xa batel ti Sisaque, ti xi laj yalbe ya'iique: —Ti Diose ta xal ti laj xa avictaic comele. Ch'abal xa c'usi ta alel. Jech o xal tana li' une, sq'uelojoxuc xa no'ox ta xayac'oxuc ta yoc ta sc'ob ti Sisaque.

⁶Ti banquilaletic yu'un ti israeletique, xchi'uc ti ajvalil yu'unique, laj yilic ti jech laj spasique. Lic sbic'tajes sbaic ta sjunul yo'ntonic ti xi laj yalique: —¡Melel cac'tic, jech ono'ox xal ma' ti Dios une!

⁷C'alal laj yil Dios ti biq'uit laj yac' sbaique, xi laj yalbe ya'i ti Semaiase: “Ti jech laj sbic'tajes sbaique, mu'yuc ta jtsutsesic. Ta xc'ot no'ox ta pasel ti ta jpoj ta jcolta liquele. Ma'uc ta jtunes ti Sisac yo' jech ta jloq'ues ti sc'ac'al co'nton ta stojol ti Jerusalene.

⁸Ja'uc le' une, ta xcac' que jti' ti pasbilic ta mantal ta xcomic yu'une, ti licuc yilic stuquic ti mu xco'olaj xchi'uc ti c'u s'elan ta yich'elun ta muq'ue xchi'uc ta yich'el ta muc' ti ajvaliletic ta yan jteclume.”

⁹Ti Sisac ajvalil yu'un ti Egiptoe laj stsac ta leto ti Jerusalene. Laj yu'ninan ti c'usitic tsots sc'oplal stunel ta xch'ulna ti Diose, xchi'uc ti na ti bu ta spas mantal stuc ti ajvalile. Scotol laj xchaj ta q'uelel. Laj yich' batel ti macobbailetic meltsanbil ta oro ti laj yac' ta meltsanel ti Salomone.

¹⁰Ti ajvalil Roboam une, naca xa ta c'anal taq'uin laj yac' ta meltsanel xq'uexol ti macobbail oroe, ti laj xchabi yu'un ti j'opisialetic ti sbainojic ta xchabiel ti ochebal yu'un ti pasob mantale.

¹¹C'alal jujun velta ta xbat ta xch'ulna Dios ti ajvalile, ta xbatic ec ti jchabivanejetique, ti ta xich'ic batel ti macobbaile. Mi laj stu une, ta xaq'uic ta na bu oy ti jchabivaneje.

¹²Ti jech laj sbic'tajes sba ti Roboam une, lamaj sc'ac'al yo'nton ti Dios ta stojole. Mu'yuc xtubbat sc'oplal ta j'ech'el. Manchuc mi jech un, ta Judá une, oy c'usitic lec ta xc'ot ta pasel ta j'ech'el.

¹³Ti ajvalil Roboam une lic to xcha'ich' yip ti yabtele. Staoj yav lic ventainvanuc. C'alal lic ochuc ta ajvalilal ti Roboame, yich'oj xa ox jun yoxvinic (41) jabil, ti vuclajuneb (17) no'ox jabil laj spas mantal ta jteclum Jerusalén, jun jteclum ti laj st'uj ti Dios ta sventa scotol ti snitilultac ti Israele ti ta xc'ot ta yich'obil ta muq'ue. Naamá sbi sme' ti Roboam ti liquem talel ta jteclum Amone.

¹⁴Mu lecuc ti c'usitic laj spase. Mu ta sjunuluc yo'nton laj stam batel c'usi ta sc'an ti Diose.

¹⁵Sc'oplal slo'il ya'yejal yabtel ti Roboam ti c'alal lic talele, xchi'uc c'alal to slajebale, ts'ibabil com ta jpoc svunal slo'il ya'yej ti j'alc'op Semaiase, xchi'uc ti j'alc'op Iddoe, xchi'uc ti bu tsacajtic sbiic ti jujuchope. Xlic xcaj no'ox letovajel yu'unic ti Roboam xchi'uc ti Jeroboame.

¹⁶C'alal cham xtoc ti Roboame, laj smuquic ta Steclumal David. Ta ts'acal to un, och ta xq'uexol ta ajvalilal ti xnich'on ti Abiam sbie.