Read Tzotzil 2 Crónicas 13 Bible Online

2 Crónicas 13 - Tzotzil bible

2 Crónicas 13

¹Lic ochuc ta ajvalilal yu'un Judá ti Abiam c'alal xvaxaclajunebal (18) jabil yochel ta ajvalil ti Jeroboame.

²Oxib jabil och ta ajvalilal ta Jerusalén. Micaías sbi ti sme'e yantsil nich'on ti Uriel ti liquem talel ta Gabaae. Lic letovajicuc ti Jeroboam xchi'uc ti Abiame.

³Ti Abiam ti laj sliques ti letoe, c'ajomal no'ox oy yu'un chanib ciento ta mil (400,000) t'ujbil soldadoetic. Ja'uc ti Jeroboame, oy yu'un vaxaquib ciento ta mil (800,000) t'ujbil soldadoetic ti tal volvanicuc ta letoe.

⁴Va'i un, ti Abiame xi lic avanuc ti va'al ta vits yu'un Zemaraim ti oy ta svitsal yosilal ti Efraine: “¡Jeroboam xchi'uc acotolic israeletic, a'yibeicun ava'iic lec li'e!

⁵¿Mi yu'un mu xana'ic ya'yel ti mu sutes ye sti' ti Ajvalil Dios yu'un ti Israele? Laj spas jun trate ta stojol ti Davide, ti xquechcun ta x'ech'ic ta ajvalil sbatel osil ti snitilultaque.

⁶Ja'uc le' une, lic scontrain yajval ti Jeroboam xnich'on ti Nabate, yajtunel to ox ti Salomón xnich'on ti Davide.

⁷Lic voliatuc yu'un jchopol jol jti'oval viniquetic, ti cajal ye sti'ic ta stojol ti Roboam xnich'on ti Salomone. Jch'iel vinic to, ma'uc to cajal ye sti' xa'i sba. Mu to sna' spaquel sc'oplal.

⁸Avi tana ti vo'oxuc une, cajal xa ave ati'ic ta scontrainel ti ajvalil yu'un Dios ti c'alal ac'bil ta sba snitilultac ti Davide. Tsots xa xava'i abaic ta sventa ti epoxuque, xchi'uc ti oy ta avoc ta ac'obic yepal sloc'tabil ti ch'inic vacax meltsanbil ta oro ti laj yac' ta meltsanel ti Jeroboam yo' ta xc'ot ta avajdiosique.

⁹¿Mi mu lajuc xa atenic loq'uel ti levitaetique, xchi'uc yajpaletac Dios snitilultac ti Aarone? Laj xa ava'anic yan avajpaleic jech c'u s'elan ta spasic ti jyanlum jnaclejetic ti yan yajvalique. ¡Bal ta xava'iic yu'un ti buch'utic ta xaq'uic jcot ch'in vacax xchi'uc vuc-cot chij c'alal ta xtal yac' sbaic ta ventainele! Le'e, utsuc xa ta xava'anic ta pale yu'un avajdiosic ti c'alal ma'uc Diose.

¹⁰Ja'uc ti vu'uncutique, mu'yuc jtenojcutic comel ti Ajvalil Dios cu'uncutique. Ti yajpaletac Diose, ja'ic snitilultac ti Aarone. Ti buch'u sbainojic ta spasel ti c'usi sc'an pasele, ja'ic ti levitaetique.

¹¹Ti stuquique sbainojic xmal sacub ta yac'bel chic'bil matanal ti Diose, ta yaq'uel ti pome, ta yaq'uel ta mexa ti lequil pan ti tsots sc'oplal c'oteme, ta stsanel jujun mal c'ac'al ti lamparaetic ti co'ol s'elan pajleb cantila ti meltsanbil ta oroe. Yu'un ti vu'uncutique ta xc'ot ta pasel c'usi ta sc'an ti Ajvalil Dios cu'untique, ti atenoj ajipoj xa comel ti vo'oxuque.

¹²Mu xch'ay xava'i ti vo'oxuque, jba'be ech'el cu'uncutic ti Diose xchi'uc ti yajpaletaque, ti chapalic xa ta yoq'uisanel ti oq'uese, svinajeb ti licuc ti letovajel ta atojolique. Le' une, israeletic, mu stsal avu'unic ta scontrainel ti Ajvalil Dios yu'unic ti amolmuc'totic ta vo'nee. Laj to sc'oplal ma' ti xu' xatsalvanic une.”

¹³Ti yajchabivanej soldado stuc ti Jeroboame, yalojbe xa mantal ti mucul tsacvanicuc ta leto ti xvoletic batel ta patile. Ti yepal yajsoldadotac ti Jeroboame va'alic ta stuq'uil ti yajsoldadotac ti Judae, ti ta patil ta stsacvanic ta leto ti yane.

¹⁴C'alal laj sq'uel batel spatic ti Judae, laj yilic ti xc'anobaj no'ox talel ti leto ta yeloval ti bu oyique, xchi'uc ta spatic un. Va'i un, lic sc'anbeic vocol ti Diose. Laj yoq'uisanic oq'ues ti paleetique.

¹⁵C'alal lic avanicuc ta sventa sliquesel ta leto ti Judae, yiloj ta sba ta satic ti Abiam xchi'uc scotol ti yan Judae, ti tsalbil c'otic ta sventa Dios ti Jeroboam xchi'uc scotol ti yan israeletique.

¹⁶Ti israeletique jatbil loq'uic ta stojol ti yan Judae, yu'un aq'ueic ta c'abal yu'un Dios ti jvoq'ue.

¹⁷Ti Abiame, xchi'uc ti c'u yepal xchi'ucanojane, muc' ta milvanej laj spasic ta j'ech'el. Laj smilic vo'ob ciento mil (500,000) ta vo' soldadoetic ti t'ujbilic loq'uel ta stojol ti israeletique.

¹⁸Ti jech c'ac'al taje, aq'ueic ta lo'il maxil ti israeletique. Ti Judá une tsatsajic ta j'ech'el. Laj sc'anic pojel ta stojol ti Ajvalil Dios yu'unic ti smolmuc'totic ta vo'nee.

¹⁹Ti Abiame laj snuts ta j'ech'el ti Jeroboame. Laj spojbe ti jteclumetic Betele, ti Jesanae, ti Efraine, xchi'uc ti bic'tal lumetic yu'une.

²⁰Mu'yuc xa c'usi yut laj xcha'tsac sba xchi'uc yip yabtel ti Jeroboam ti c'alal cuxul to ti Abiame. Ta slajebal un, cham ti Jeroboame, yu'un yayijesat yu'un ti Diose.

²¹Ti Abiam une laj stsac lec yip xchi'uc ti yabtele. Chanlajunvo' (14) yajniltac laj yic'. Laj yil chib xcha'vinic (22) ta vo' squeremtac, vaclajunvo' (16) yantsiquil nich'nabtac.

²²Ti slo'il ya'yejale, xchi'uc scotol c'usi laj spas ti c'alal cuxul to ox ti Abiame, ts'ibabil com ta slo'il ya'yej ti j'alc'op Iddoe.