Read Tzotzil 2 Crónicas 14 Bible Online

2 Crónicas 14 - Tzotzil bible

2 Crónicas 14

¹C'alal cham ti Abiame, laj smuquic ta Steclumal ti Davide. Ta ts'acal to un, och ta xq'uexol ta ajvalilal ti xnich'on ti Asa sbie. Ti jech tiq'uil ta ajvalile, lajuneb (10) jabil sjalil lamajem c'op ta sjunul ti jteclume.

²Ti c'usitic laj spas ti Asae, tuc', lec laj yil ta sba ta sat ti Ajvalil Dios yu'une.

³Laj sten loq'uel yaltartac sdiosic ti jyanlumetique, jech c'u cha'al ti c'opojebaletic liquem yu'unique. Laj slilin loq'uel ti c'usitic bisbil ta ch'ul tone. Laj slilin ta voq'uel xq'uexol sloc'obbail ti Aserae.

⁴Laj spas ta mantal xtoc ti Judá une, ti suticuc talel ta stojol ti Ajvalile Dios yu'unic ti smolmuc'totic ta vo'nee, ti c'otuc ta pasel yu'unic ti oy jbel c'usi tsots albil yu'une xchi'uc ti smantaltaque.

⁵Scotol ti c'opojebaletic ti oy ta jteclumetic yu'un ti Judae, xchi'uc ti altaretic liquem yu'unique, laj sten loq'uel scotol. Lamajem c'op un ti c'u sjalil ochem ta ajvalile.

⁶Ti jabil ech' taje, lec xa laj ya'i ti Asa ta sva'anel nac'obbailetic ta jteclum Judá c'alal lamajem c'op ta sjunul ti muc' ta lume. Mu junuc oy buch'u ta xletovaj xchi'uc. C'ot ta nopel yu'un Dios ti pajesbil ti leto ta stojole.

⁷Xi laj yalbe ya'i ti jnaclejetic ta Judae: “Cac'betic lec yip ti jteclumetic li'e. Joyobtaic lec ta latsbil ton. Jpasbetic luchlebal, xchi'uc sti'tac, xchi'uc smactac ta taq'uinetic, yo' to oy ta coc ta jc'obtic ti cabtele. Yu'un nabalotic ta stojol ti Ajvalil Dios cu'untique, lamajem ti letovajel yu'un xchi'uc scotol ti cuts' calaltique.” Lec c'ot ta loq'uel yu'unic ti tsuts ti abtele.

⁸Ti Asae, oy yu'un vo'lajunvinic mil (300,000) ta vo' soldado svinquilel Judá ti chapalic lec xchi'uc smacobbailic xchi'uc slanzaique. Oy yu'un chanlajunvinic mil (280,000) ta vo' soldado svinquilel ti Benjamine, ti chapalic lec xchi'uc smacobbailic xchi'uc syolobique. Scotolic naca soldado ti mu sna' xi'ic une.

⁹Lic contrainatuc yu'un ti Zera ti liquel talel ta Etiope, ti yic'oj talel jun millon (1,000,000) ta vo' svinictac, xchi'uc vo'lajunvinic mil (300,000) ta cot carreta sventa ac'ob-leto ti c'ot ta Maresae.

¹⁰Ti Asa xchi'uc ti svinictac une loq'uic batel ta snupel ta be. Laj sa' yavilic ta stsaquel ta leto ta stenlejal Sefata ta nopol Maresá.

¹¹Ti Asa une xi lic sta ta c'oponel ti Ajvalil Dios yu'une: “Ch'ul Dios, co'ol no'ox sba ta xavil xchi'uc ti buch'u tsots xa'i sbae, xchi'uc ti buch'u ch'abal ti yipal yu'une. Avi tana une, la' coltauncutic, Ch'ul Ajvalil Diosot cu'uncutic. Jpatoj co'ntoncutic ta atojol, litalcutic ta scontrainel ta aventa ti epal soldadoetic le'e. Ti vo'ote, Ajvalilot, Diosot cu'uncutic. ¡Ac'o ta q'uelel ti mu'yuc buch'u xjelav ta atojole!”

¹²Ti Diose laj yac'be stsal yajcontra ti Asa xchi'uc ti svinquileltac Judá ta stojol ti etiopeetique, ti jatvil loq'uic ta stojolique.

¹³Ja'uc ti Asa une xchi'uc ti svinictaque snutsojic batel c'alal to Gerar. Lajic scotolic ti etiopeetic ti mu junuc cuxul come. Stuc slilijemal com ta sba ta sat ti Diose xchi'uc scotol ti yajsoldadotaque. Laj yu'ninbe ta j'ech'el scotol ti c'usitic x'ayan yu'un ti yajcontrataque.

¹⁴Ts'acal to un, laj stsaquic ta leto ti jteclumetic ti joyol ta spat ta xocon ti Gerare. Scotolic och ma' ti xi'el ta stojol ti Dios une. Ti soldadoetic svinquilel ti Judae laj xch'ajic ta sa'el ti c'ulejal ti jelavem stojole.

¹⁵Ba stsaquic ta leto xtoc ti nacalic ta axibal nae. Oy vacaxetic ma' ti bu taje. Yepal no'ox laj smaquic ech'el ti chije xchi'uc ti camelloe. Laj un, sutic batel ta Jerusalén.