Read Tzotzil 2 Crónicas 15 Bible Online

2 Crónicas 15 - Tzotzil bible

2 Crónicas 15

¹Ti Azarías xnich'on ti Obede ventainbil yo'nton yu'un xcuxlejal ti Diose,

²loc' batel ta sa'el ti Asae yo' jech xi ta xalbe ya'ie: “¡A'yio ava'i, Asa, ts'etanbun achiquin xchi'uc acotolic ti vo'oxuque, Judá, Benjamín! Oy ta atojolic ti Diose mi nabaloxuc ta stojole. Mi ta xasa'ique, ta xataic. Mi ta xaq'uej abaic ta stojole, ta xastenoxuc comel.

³Ti Israele jal xa ta j'ech'el ti mu'yuc chi'inbil yu'un ti Bats'i Diose, mi ja'uc ti paleetic ti ta xchanubtasatic yu'une, mi ja'uc junuc yu'unic ta sbijubtasatic smelol c'u s'elan ta stoyel xi'el ti Diose.

⁴Ja'uc le' une, c'alal oy ti ilbajinel ta stojole, ti jteclum une sutic talel ta stojol ti Ajvalile, Dios yu'un ti Israele. Ochic ta sa'el un. Ti stuc une laj yac' sba iluc ta stojolic.

⁵Ti le' tal ta vo'ne taje, mu'yuc buch'u lamajem ma' ti yo'nton une. C'ajomal no'ox stsic'tsun yo'nton yu'un ilbajinel ta xa'iic ti jnaclejetic ti buyuc no'ox oyic ti jteclumetique.

⁶Ti muc'tiquil lume, xchi'uc ti jteclumetique, ta xilbe sba svocolic. Yu'un ti Diose ta stacbe talel ep ta tos vocoletic yo' ta stic'be xi'el ta yo'ntonic.

⁷Ja'uc ti vo'oxuc une, tsotsanic, mu xatsiq'ues avo'nton. Ti avabtelique ta xavich'beic stojol.”

⁸C'alal laj ya'i ti Asa ti va'i s'elan a'yej yu'un ti j'alc'ope, ayan to yip ti yo'ntone. Lic slilin loq'uel ti loc'obbail diosetic ti oy ta sjunlej sbanomil ti Judae, xchi'uc ti ta Benjamine, xchi'uc ti ta jteclumetic ti laj yu'ninan ta svitsal yosil ti Efraine. Lic xcha'meltsan ti yaltar Dios ti oy ta ochebal sti' xch'ulna ti Diose.

⁹Ts'acal to un, lic stsob scotol svinictac ti Judae, xchi'uc ti Benjamine, ti buch'utic yan o bu talemic ti liquemic talel ta stojol ti Efraine, ti Manasese, xchi'uc ti Simeone. Yepal israeletic laj sts'acliic ti Asa ti laj yilic ti chi'inbil yu'un ti Diose.

¹⁰Lic svol sbaic ta Jerusalén ta yoxibal (3) u ti oy xa ta yo'lajunebal (15) jabil yochel ta ajvalilal ti Asae.

¹¹Ti jech c'ac'al taje, laj yaq'uic matanal ta stojol Dios ti laj yich' svocol yu'unic vucub ciento (700) ta cot vacaxetic, xchi'uc vucmil (7,000) ta cot chijetic ti laj spojbeic talel ti scontraique.

¹²Ta jech yepal un, laj yac' ye sti'ic ti ta sjunul yo'ntonic ta sa'ic ti Ajvalil Dios yu'un ti smolmuc'totic ta vo'nee.

¹³Laj yalic ta jamal, buch'uuc no'ox ti mu sc'an sa'ic ti Ajvalil Dios yu'un ti Israele, mi julem xa xch'ulel, mi biq'uit to, mi vinic, mi ants, chapluj sc'oplal ta xich' milel.

¹⁴C'alal xnic no'ox ti oq'uesetic xulub chijetique, laj sjambeic snuq'uilal ta avlajetel ta muyubajel ti laj sva'an sbaic ta yaq'uel yeic ta stojol ti Diose.

¹⁵Scotol jnaclejetic yu'un ti Judae xmuyubajic xa xchi'uquic ti va'i s'elan laj sva'an sbaic ta yalele, yu'un sjunul yo'ntonic laj sva'an sbaic ta yalel ti j'ech'el loc' ayan ta yo'ntonic ta sa'el ti Diose. Ti stuc une smaloj ono'ox ti sa'ele. Laj staic yu'un un ti lamaj c'op yu'unic xchi'uc scotol ti buch'utic nopol xil sbaic xchi'uque.

¹⁶Ma'uc no'ox taje, ti ajvalil Asae laj stubbe yip ti c'u s'elan liquem yu'un ti Maaca ti ja' syayae, yu'un laj yac' ta meltsanel sloc'obbail ti Aserae. Ti loc'obbail taje, laj stots loq'uel ti Asae. J'ech'el laj slilin. Laj xchic' ta sts'el uc'um Cedrón.

¹⁷Ac'o mi mu'yuc yich' tubbel scotol ti jujun c'opojebaletic ta Israel ti oy ta toyol vitsetique, ti Asa une jbel yo'nton mu'yuc laj syanijes sba.

¹⁸Laj yac' ta xch'ulna Dios scotol ti oroe, ti platae, ti loc' ayan ta yo'ntonic xchi'uc ti stot ti c'otem ta yu'un ti Diose.

¹⁹Ts'ijil c'op yu'un letovajel c'alal loc' vo'lajuneb xcha'vinic (35) jabil yochel ta ajvalilal ti Asae.