Read Tzotzil 2 Crónicas 16 Bible Online

2 Crónicas 16 - Tzotzil bible

2 Crónicas 16

¹Ta svaclajunebal xcha'vinic (36) jabil yochel ta ajvalilal ti Asa une, ti Baasae ajvalil yu'un ti Israele, bat stsac ta leto ti Judae. Laj svol lec ta maquel ti jteclum Ramae yo' jech mu'yuc xa buch'u xu' ta sc'anbe c'op ti ajvalil yu'un ti Judae.

²Va'i ti Asa une laj stam loq'uel ti oroe, ti plata ti oy ta yavil ta xch'ulna Diose, xchi'uc ti oy ta snae. Laj stac batel ta stojol ti Ben-adad ajvalil yu'un ti jteclum Siria ti oy sna ta jteclum Damascoe. Xchi'uc xi laj yalbe ech'el ti a'yeje:

³“Ti vu'un xchi'uc ti vo'ote, la' jpastic junuc trate jech c'u cha'al laj spasic ti jtotique. Q'uelo avil, li' ta jtacbot talel ti oroe, ti platae. Ch'aybo sc'oplal ti trate apasoj xchi'uc ti Baasa ajvalil yu'un ti Israele, ja' to jech ch'an xiyut un.”

⁴Ti Ben-adade c'ot ta yo'nton ti va'i s'elan albat yu'un ti Asae. Laj stac ech'el banquilaletic yu'un ti yajsoldadotaque, ti stsaquicuc ta leto jteclumetic yu'un ti Israele. Ja' jech lic yu'ninan ti jteclum Iione, ti Dane, ti Abel-maime, xchi'uc scotol jteclumetic yu'un ti Neftalie, ti bu q'uejbil ti c'usitic ta xtun yu'unique.

⁵C'alal laj ya'i ti Baasae, laj yicta sba sjoyel ta maquel ti jteclum Ramae.

⁶Va'i ti ajvalil Asa une laj stsob ta volel ti Judae. Laj stam loq'uel ta Rama ti tone, ti te'e, ti ta smac o jteclum ti Baasae. Ja' lic smaquic o ti jteclum Gebae, xchi'uc ti Mizpae.

⁷Ti jech yorail ta vo'ne taje, ja' o xi bat yalbe Asa ajvalil yu'un Judá ti j'alc'op Hananie: “Ti soldadoetic yu'un ti ajvalil Siriae col xa ech'el ta avoc ta ac'ob, ja' ti laj anaban aba ta stojol ti ajvalil yu'un ti Siriae. Ma'uc laj anaban aba ta stojol ti Ajvalil Dios avu'une.

⁸¿Mi mu x'ech'uc to yepalic cha'e ti soldado etiopeetique xchi'uc ti libioetic ti jelavem xu' yu'unic ti ep ta j'ech'el ti jcajlejetic ta ca' yu'une, xchi'uc ti carretaetic ta sventa ti ac'ob-leto yic'ojic talele? Manchuc mi jech un, ti Diose laj yac'bot ta avoc ta ac'ob, yu'un laj anaban aba ta stojol.

⁹Ti Diose chajal ta sba ta sat ti c'usitic ta xc'ot ta pasel ta sjoylej banomile yo' jech ta xac'be yipal yu'un ti buch'utic spatoj yo'nton ta stojole. ¡Li'e, ch'ayemot ta j'ech'el ti c'usi ta xapase! Tana li' une, ta xlic ech'el ti xlic xcaj ti letovajele.”

¹⁰Va'i ti Asa une ep soc sjol ta j'ech'el yu'un ti j'alc'ope. C'ot ta pasel yu'un ti laj stic' ta chuquele. Ti jech yorail ta vo'ne taje, oy jlom tsots lic yilbajin ti steclumale.

¹¹Ti sliquebal stsutsebal slo'il ya'yejal ti Asae, ts'ibabil com ta jpoc svunal slo'il ya'yejal ti ajvaliletic yu'un ti Judae xchi'uc ti Israele.

¹²C'alal sbalunlajunebal xa ox xcha'vinic (39) jabil yochel ta ajvalil une, tsots lic xchamel xchibal yoc ti Asa une. Ma'uc bat yo'nton ta sa'el xpoxtael ta stojol ti Diose. C'ajomal no'ox xloc' x'och ta stojol ti jpoxtavanejetique.

¹³Ta jun yoxvinic (41) jabil yochel ta ajvalilal une, cham.

¹⁴Laj smuquic ta Steclumal David, ti laj yal mantal ti meltsanbatuc ti smuquinal ti bu taje. Laj yaq'uic ta stuts'leb ti putsul ta muil poxiletique, xchi'uc ti c'usitic oy smuil ti chapanbil lec ta j'ech'ele. Ta jech yepal un, lic stsanic jun muc' ta c'oc jech c'u cha'al na'bil yu'unique.