Read Tzotzil 2 Crónicas 17 Bible Online

2 Crónicas 17 - Tzotzil bible

2 Crónicas 17

¹Ti Asae och ta xquexol ta ajvalilal ti Josafat ti ja' xnich'one, ti tsots laj sva'an sba ta stojol ti Israele.

²Ta scotol ti nac'obbail jteclumetic yu'un Judae, laj sva'anan yajsoldadotac, xchi'uc svoc'ol-voc' soldadoetic ta scotol yosilal ti Judae, xchi'uc ta jteclumetic yu'un Efraín ti laj yu'ninan ti Asa ti ja' stote.

³Ti Josafate chi'inbil yu'un ti Diose, yu'un ta sliquebal no'ox jech lic spas jech c'u cha'al laj spas ti David ti smolmuc'tote. Yu'un mu'yuc laj sbic'tajes sba ta yich'el ta muc' sloc'obbailtac ti Baale.

⁴C'ajomal no'ox laj sbic'tajes sba ta yich'el ta muc' ti Dios yu'un ti stote, ti laj c'otuc ta pasel yu'un ti smantaltaque. Mu ja'uc laj sts'acli ta spasel jech c'u cha'al ta spasic ti jnaclejetic ta Israele.

⁵Jech o xal ac'bat lec yip yabtel yu'un ti Dios ti ochem ta ajvalile. Scotol Judá ta x'ac'bat matanal yu'un ti c'ot ta banquilal jc'uleje, xchi'uc ti ich'bil ta muc' c'ot yu'unique.

⁶Mu'yuc xa buch'u jech c'otem xchi'uc ta xa'i ta xch'unel ti c'u s'elan nopbil yu'un ti Diose. C'ot to ta pasel yu'un ti laj slilin loq'uel c'opojebaletic ta toyol vitsetic ti oy ta Judae, xchi'uc sloc'obbailtac ti Aserae.

⁷C'alal yoxibal xa ox jabil yochel ta ajvalilale, laj stac ech'el ta Judá ti yaj'opisialtaque, ja'ic ti Ben-haile, ti Abdiase, ti Zacariase, ti Natanaele, xchi'uc ti Micaiase, yo' jech ta xchanubtasvanic jujun jteclumetic ti bu taje.

⁸Batic jmoj xchi'uc ti levitaetique, ja'ic ti Semaiase, ti Netaniase, ti Zebadiase, ti Asaele, ti Semiramote, ti Jonatane, ti Adoniase, ti Tobiase, xchi'uc ti Tobadoniase. Laj xchi'inic batel xtoc ti Elisamae, ti Jorame, ti ja' paleetique.

⁹Laj stacanan batel ta stojol jnaclejetic yu'un ti Judae yo' ac'o yich'ic chanubtasel ti oy c'usi jbel tsots albil yu'un ti Diose. Jech ti stuquic une xanavic ta xchanubtasel ti jnaclejetic ta scotol yu'un ti Judae.

¹⁰Ja'uc le' une, scotol ti jpas-mantal ajvaliletic ti joyol ta spat ta xocon ti Judae, ech'em no'ox xi'elal ta xa'iic ti Diose. Mu ja'uc xa sc'an ta xletovajic xchi'uc ti Josafate.

¹¹Oy jun chibuc filisteoetic ta xich'beic batel matanaletic xchi'uc plata ti co'ol to s'elan patanil ta xc'ot ta stojol ti Josafate. Jech ti árabeetic eque ta xich'beic batel vucmil xchi'uc vucub ciento (7,700) ta cot chij xchi'uc jech yepal ti tentsunetic xtoque.

¹²Ti Josafate laj stsac lec yip ma' ti yabtel une. Ti ta Judae, lic smeltsanan nac'obbailetic xchi'uc snailtac ti c'usitic ta xtun yu'un ti jteclume.

¹³Ja' jech xtoc ayan ep yosiltac ta jteclumetic yu'un ti Judae. Oy yajsoldadotac ta Jerusalén ti mu sna' xi'ique,

¹⁴ti xi s'elan ta xvinaj sbiic ta svunal ti ich'bil ta venta ti jujuchope: Ti banquilal soldado yu'unic ti liquem talel ta sventa ti Judae, ja' ti Adná ti sbainoj ta spasel ta mantal vo'lajunvinic mil (300,000) ta vo' ti soldadoetique.

¹⁵Taje, nabal talel ec un ti Johanán ti c'otem ta banquilal jvolvanej yu'unic chanlajunvinic mil (280,000) ta vo' ti soldadoetique.

¹⁶Nabal talel ec ti Amasías xnich'on ti Zicrie, ti loc' ayan ta yo'nton stuc ta xac' sba ta tunel ta stojol ti Diose, ti sbainoj lajunvinic mil (200,000) ta vo' soldadoetic ti mu sna' xi'ique.

¹⁷Ta sventa ti Benjamine, c'otem ta jvolvanej yu'unic ti j'ac'-leto Eliada ti mu sna' xi' ti sbainoj lajunvinic ta mil (200,000) soldadoetic ti chapalic xchi'uc ti syolobique, ti smacobbailique.

¹⁸Nabal talel ec ti Jozabade ti sbainoj balunvinic mil (180,000) ta vo' soldadoetic ta yoquic ta xanavic ta sventa ti letovajele.

¹⁹Oyic ta yajtunel ajvalil ma' taje. Mu'yuc xa tsacbil ta chapel ti c'u yepal ch'acbil xa yu'un ti ajvalil ti oyic ta pojobbail jteclumetic ti oy ta sjunlej ti Judae.