Read Tzotzil 2 Crónicas 18 Bible Online

2 Crónicas 18 - Tzotzil bible

2 Crónicas 18

¹C'alal jc'ulej c'ot ta j'ech'ele, ti ich'bil ta muc' ic'ot ti Josafate, lic yuts' yalalin sbaic xchi'uc ti Acabe.

²Ech' jun chibuc jabil ti Josafate bat svu'lan ti Acab ti oy ta Samariae. Ta sventa ti oy ta yo'nton ta spasel jun q'uin ta stojol ti Josafate xchi'uc ti xchi'iltaque, laj smil epal chij xchi'uc vacaxetic. Lic stic'be ta sjol ti licuc stsac ta leto ti Ramot ti oy ta Galaade.

³C'ot ta pasel un, ti Acab ajvalil yu'un ti Israele, xi laj sjac'be ti Josafat ajvalil yu'un ti Judae: —¿Mi xac'an xachi'inun ta xanobal ta stsaquel ta leto ti jteclum Ramot ti oy ta Galaade? Xi tac'bat yu'un ti Josafate: —Batic un cha'e, yu'un jech ono'ox yac'oj jolcutic xchi'uc ti cajsoldadotaque jech c'u cha'al yac'oj ajol xchi'uc ti avinictaque.

⁴Ja' no'ox un, jac'bo ba'yuc c'usi oy ta yo'nton ti Dios une.

⁵Ti ajvalil yu'un ti Israele laj stsob talel ti j'alc'opetique, ti nopol van chanibuc ciento (400) ta vo' ta scotol ti xi laj sjac'bee: —¿Mi ta xba jtsaccutic ta leto ti Ramot oy ta Galaade, mi mo'oj? Ti stuquique xi laj staq'uique: —Tsaquic ta leto, yu'un ta xayac'bot ta avoc ta ac'ob ti Diose.

⁶Ja'uc ti Josafat une xi lic sjaq'ue: —¿Mi mu'yuc xa yan yaj'alc'op Dios ti xu' ta jac'betique?

⁷Ti ajvalil yu'un Israele xi laj stac'be ti Josafate: —Oy xa no'ox jun ti buch'u xu' ta jac' jbatic yu'un ta stojol ti Diose, ja' ti Micaías xnich'on ti Imlae. Ja' no'ox le' une, mu xquilbe sat. Mu'yuc c'usi lec jtaoj yu'un. C'ajomal naca chopol ta xc'ot ta jtojol yu'un ti c'usi ta xale. Ja'uc le' une, xi albat yu'un ti Josafate: —Mu xaval jech taje.

⁸Ta jech yepal un, ti ajvalil yu'un Israele laj stac ta iq'uel jun yaj'opisial ti xi laj yalbee: —¡Ta anil no'ox, ac'o taluc ti Micaías xnich'on ti Imlae!

⁹Ti Josafat ajvalil yu'un ti Israele, xchi'uc ti ajvalil yu'un ti Judae, slapoj sc'u'ic sventa ti ajvalilale, chotolic ta chotlebal sventa ajvalil ta stenlejal ochebal yu'un jteclum Samaria. Ta sba ta satic, batem xch'ulelic ta yalel c'opetic scotol ti j'alc'opetique.

¹⁰Ti Sedequías xnich'on ti Quenaanae ti sloc'taoj ta meltsanel ta taq'uin xulubiletique, xi lic avanuque: “¡Xi laj yal ti Diose: ‘Ta sventa ti xulubiletic li'e, ja' jech s'elan ta xaluch ech'el ti sirioetique, ja' to ti c'uxi ta stsuts avu'une!’ ”

¹¹Co'ol sc'opic ta xalic scotol ti j'alc'opetique, ti xi ta xalolanbeic ti ajvalile: “Ba tsaco ta leto ti jteclum Ramot ti oy ta Galaade. Tsalbil xa avu'un xcaltic. Ti jteclume ta xac'bot ta avoc ta ac'ob ti Diose.”

¹²Ti j'al-mantal j'ich'-c'op ti batem ta yiq'uel ti Micaiase, xi c'ot yalbe ya'ie: —Scotol ti j'alc'opetique, mu yanuc sc'opic ti c'usi ta xalic ti laj stac'beic sutel ti ajvalile. Ja' yu'un un cha'e, ta jc'anbot vocol ti jechuc xaval ec jech c'u cha'al laj yalic scotolique, ti albo ya'i jutebuc sc'oplal ti c'usi leque.

¹³Ti Micaiase xi laj staq'ue: —¡Ta jva'an ta rextico ti Diose, ti ja' no'ox ta xcal ti c'u s'elan ta xac'bun jna' ti Diose!

¹⁴Ta jech yepal un, bat sva'an sba ta stojol ti ajvalile, ti xi jac'bat yu'un ti ajvalile: —Micaías, ¿mi ta xbat jtsaccutic ta leto ti jteclum Ramot ti oy ta Galaade, mi mo'oj? Ti Micaiase xi laj staq'ue: —Ba tsaco ta leto, tsalbil xa avu'un xcaltic. Ta xac'bot ta ac'ob ti Diose.

¹⁵Ja'uc le' une, xi laj stac' ti ajvalile: —¿Jayib velta calojbot ava'i ti c'ajomaluc xavalbun ti melel ta sventa ti Diose?

¹⁶Va'i ti Micaías une xi lic yale: “Quiloj ti scotol israeletique tanijemic ta vitstic co'ol s'elan chij ti ch'abal sq'uelele. Ti Diose xi laj yale: ‘Le'e, ch'abal yajval; ta jujunicuc, lamajemuc yo'ntonic suticuc ech'el ta snaic.’ ”

¹⁷Ti ajvalil yu'un Israel une xi laj yalbe ya'i ti ajvalil Josafate: —¿Mi mu lajuc ono'ox calbot ava'i ti mu'yuc c'usi lec ta xac' ta a'yiel ti vinic le'e, ti c'ajomal no'ox ta xac' ta a'yiel ti c'usi chopole?

¹⁸Ti Micaiase xi to lic yalilane: —Ti va'i s'elan laj aval taje, jech o xal a'yio ava'iic ti xi ta xal sc'op ti Diose: Laj quil ti chotol ta jun muc' ta chotlebal ti Diose. Scotol ti yajtuneltac ti oy ta vinajele, va'ajtic ta stuq'uil xocon sbats'i c'ob, xchi'uc ta stuq'uil xocon sts'et c'ob.

¹⁹Va'i ti Dios une laj sjac' buch'u ta sliquesbe sjol ti Acab ajvalil yu'un ti Israele yo' jech ta stsac ta leto ti jteclum Ramot ti oy ta Galaade, yo' ta xc'ot yac'oj sjol sbaquil ti bu taje. Yalel toyol ti sc'opic ta xalic jun chibuque.

²⁰Ja'uc le' une, oy jun ch'ulelal tal sva'an sba ta stojol ti Diose, ti laj yal ti sbainoj ta spasele. Jac'bat yu'un ti Diose c'u s'elan ta spas.

²¹Ti ch'ulelale laj yal ti ta stic'be jutbil c'op ta sjol scotol ti j'alc'opetic yu'un ti ajvalile. Va'i un, albat yu'un ti Diose ti ta xc'ot ta pasel ti ta xlaj ta lo'lael yu'unique, ti batuc ta spasele.

²²Avi tana une, xana' xa, ti Diose laj xa yac' ye sti' ti bainbil xa ye sti'ic yu'un jutc'op ch'ulelal ti avaj'alc'optaque, ti ta xac'ot ta tsutsele.

²³Va'i ti Sedequías une, xnich'on ti Quenaanae, nopaj ech'el ta sts'el ti Micaiase ti xi laj yalbe c'alal laj slec' ta majele: —¿Bu laj yictaun comel ya'yel xcuxlejal Dios yo' jech tal sc'oponote?

²⁴Xi laj stac' ti Micaiase: —Le'e, ja' to ta xana' c'alal ta sta sc'ac'alil xanaq'uet ta jujun naetique.

²⁵Va'i ti ajvalil yu'un ti Israel une xi laj yal mantale: —¡Tsaquic ya'i ti Micaiase! ¡Tiq'uic ochel ta chuquel ti bu oy ti Amón ti its'inal ajvalil yu'un ti jteclume, xchi'uc ta stojol ti Joás ti ja' jnich'one!

²⁶Albo ya'iic, vu'un laj cal mantal ti stiq'uicuc ochel ta chuquele, ti jaltabiluc ti sve'el yuch'ome, ja' to me ca'tic ti c'uxi mu'yuc c'usi jnuptanoj ti lec cuxul lisut talele.

²⁷Xi lic yalilan ti Micaiase: “Ti mi mu'yuc c'usi apasoj anuptanoj lasut talele, yu'un ma'uc c'opoj ti Dios ta jtojol unbi.”

²⁸Ti ajvalil yu'un ti Israel une, xchi'uc ti Josafat ajvalil yu'un ti Judae, stam batel sbeic ta stsaquel ta leto ti jteclum Ramot oy ta Galaade.

²⁹Ti ajvalil yu'un Israele xi laj yalbe ti Josafate: —Ta jelta jba ochel ta ac'-leto. Lapo jc'u' sventa ajvalilal ti vo'ote. Ti ajvalil yu'un Israel une sjeltaoj sba. Ti xchibalique jmoj lic ochicuc ta ac'-leto.

³⁰Ja'uc ti ajvalil yu'un Siria une yalojbe mantal ti banquilal soldadoetic ti oyic ta carretaetic sventa letoe, ti mu stsaquic ta leto mi ma'uc ti ajvalil yu'un Israele.

³¹C'alal laj yilic Josafat ti banquilal soldadoetic ti oyic ta carretae, laj snopic ti ja' ajvalil yu'un Israele. Bat svoliic yo' ta stsaquic ta leto. Va'i ti Josafat une xviquet xa liquel ta sc'anel spojel ti coltaatuc yu'un ti Diose. Ch'aque loq'uel yu'un ti Diose.

³²Laj yilic ti ma'uc ajvalil yu'un ti Israele, laj yicta sbaic ta stsaquel ta leto.

³³Ja'uc le' une, oy jun soldado laj sjip ta toyol ti sni' syolobe, ti lec laj sts'apbe ochel bu jamal juteb ti smac slapoje. Xcham o xa xchi'uc syayijemal c'ot. Va'i un, xi laj yalbe mantal ti jbainej carreta yu'une: —Joybijan ta anil, tamun loq'uel li' ta letovajele, tsots xa liyayij.

³⁴Tsots letovajic ti jech c'ac'al taje. Ti ajvalil yu'un ti Israel une yac'ojbe to yipal va'al ta scarreta ti yich'oj mal c'ac'al ta stsaquel ta leto ti sirioetique. C'alal ch'ay xa batel ti c'ac'al une, cham.