Read Tzotzil 2 Crónicas 19 Bible Online

2 Crónicas 19 - Tzotzil bible

2 Crónicas 19

¹C'alal sut talel ta spasob mantal ta Jerusalén ti Josafat ajvalil yu'un ti Judae, mu'yuc c'usi laj snuptan syain talel.

²Ja'uc le' une, bat nupatuc ta be yu'un ti j'alc'op Jehú xnich'on ti Hananie, ti xi jac'bat yu'une: ¿C'u cha'al ta xatic' aba ta scoltael ti chopol vinique, ti lec xavil abaic xchi'uc ti yajcontra Diose? Ti jech laj apas le'e, ilin xa ti Dios ta atojole.

³Manchuc mi jech un, oy to yajtosuc oy ta atojol ti lec apasoje. Le'e, laj alilin loq'uel sloc'obbailtac Asera ti oy ta muc' ta jteclume, xchi'uc loc' ayan ta avo'nton ta sa'el ti Diose.

⁴Ti Josafate nacal ta Jerusalén. Ta ono'ox xc'ot ta svu'lanel steclumal ti c'u yepal oy ta xlic ech'el ta Beersebae, ti ta xc'ot c'alal to ta vitstic yu'un ti Efraine, yo' ta xlic snaban sbaic yu'un ta stojol ti Ajvalil Dios yu'unic ti smolmuc'totic ta vo'nee.

⁵Ma'uc no'ox taje, laj sva'anan jchapanvanejetic ta scotol nac'obbail jteclumetic ti oy ta slumal Judae, ti buyuc xa no'ox sc'an va'anel ta xile.

⁶Xi laj yalbe ya'i ti jchapanvanejetique: “Q'uelo me abaic lec yu'un ti c'usi ta xapasique. Ma'uc ta xachapanvanic ta sventa viniquetic no'ox. Scotol ta xachapanvanic yu'un ti Dios ti oy ta atojolic c'alal ta xavalic ti ma'uc smelol ti bu stamojic batele.

⁷Xi'taic ti Dios un cha'e, bijanic xchi'uc ti c'usi ta xapasique. Ti Ajvalil Dios cu'untique, mu ts'icbaj ta xa'i ti bu ma'uc tuq'uil chapanele, ti ta xapasic ti co'ol xa sba ta a'yiel ya'yel ti c'alal ma'uque, xchi'uc ti mich'ob c'abale.”

⁸Ja' jech xtoc ti ta Jerusalene, ti Josafate laj yac'anbe yabteltac ti levitaetique, ti paleetique, xchi'uc ti banquilaletic yu'unic ti jujuchop israeletique yo' jech ta xtunic ta jchapanvanejetic ta sventa ta xch'unel ti Diose, xchi'uc ti letovajel yu'un ti jnaclejetic ta Jerusalene.

⁹Xi xcholet laj sbijubtasane: “Ich'biluc c'otuc ta muc' Dios yu'un ti c'usi ta xapasique. Tuc'uc ti snopobil avu'unique. Junuc ti ajol avo'ntonique.

¹⁰C'usiuc no'ox c'opal ti tsots xa sc'oplal xal o yu'un ti avinquilele, xchi'uc ti jnaclejetic ti oyic ta jteclumetic ta xtalic ta atojolic sventa ta xac' anopic mi milel laj ya'ie, mi ma'uc, mi cajal ta xc'ot ta sba ti oy c'usi jbel tsots albile, ti c'usi nopbile, ti mantaletique, mi ja' ti tsots sc'oplal sc'an pasele, c'ubanbeic ya'i ti mu sa' smulic ta stojol ti Diose, yo' jech mu x'ilin ti Dios ta atojolic xchi'uc ta stojolic ec. Ma'uc xa amulic mi jech ta xapasic taj une.

¹¹Ti banquilal pale Amarías une cajal yabtel yich'oj c'ot ta sventa ti c'u s'elan liquem ta xch'unele. Ti Zebadías xnich'on ti Ismaele, ti c'ot ta banquilal yu'un snitilultac ti Judae, sbainoj ta xchapel c'usi sc'an pasbel ti ajvalile. Ti levitaetic une xc'ot ta avajcoltaobbaic. ¡Tsotsanic un cha'e, ac'beic yipal ti abtele! ¡Chi'inbiluc yu'un Dios ti buch'u lec ta xbat yu'un ti c'usi ta spase!”