Read Tzotzil 2 Crónicas 21 Bible Online

2 Crónicas 21 - Tzotzil bible

2 Crónicas 21

¹Cham ti Josafat une, laj yich' muquel ta Steclumal David ti smolmuc'tot ta vo'nee. Ts'acal to un, ja' lic ochuc ta ajvalilal ti Joram ti ja' xnich'on ti Josafate.

²Xchi'iltac ta voq'uel ti Joram xnich'nab ti Josafate, ja'ic li'e: Ti Azariase, ti Jehiele, ti Zacariase, ti Micaele, xchi'uc ti Sefatiase. Scotolic taje, ja' xnich'nabtac ti Josafat ajvalil to ox yu'un ti Judae.

³Epal matanal ac'bat yu'un ti stotique, ja' ti c'usitic meltsanbil ta oro, ti platae, xchi'uc yan ti c'usitic toyol stojole. Ac'bat sventainic ti nac'obbail jteclumetique, ja'uc ti buch'u ta x'och ta ajvalilale, laj yac'be comel sbain ti Joram ta sventa ti banquilal nich'onile.

⁴C'alal stsacoj xa lec yip ti chotol xa ta spasob mantal ti stote, lic smil ta espada scotol ti xchi'iltac ta voq'uele, xchi'uc jayibuc banquilal jtsobvanej yu'un ti Israele.

⁵Yich'oj xa lajcheb xcha'vinic (32) jabil c'alal lic ochuc ta ajvalile, ti c'ajomal no'ox vaxaquib (8) jabil och ta ajvalil ta Jerusalene.

⁶Jech lic spas jech c'u cha'al laj ech'icuc ti ajvaliletic yu'un Israele, xchi'uc ti c'u s'elan laj spas snitilultac ti Acabe. Yu'un ti yajnile liquem talel ta snitilul ti Acabe. Ti c'usitic laj spase, mu lecuc laj yil ta sba ta sat ti Diose.

⁷Ja'uc ti Dios une mu'yuc xloc' ta yo'nton ta stsutsesel snitilultac ti David ta sventa ti yac'oj strate xchi'uc ti Davide, ti jech ono'ox yalojbe ti xnich'nabe ti staojuc yav tiletuc o ti lampara ta sventa ti xnich'nabe.

⁸Ti c'u sjalil ochem ta ajvalilal ti Jorame, ti Edome lic stoy sba ti pasbil ta mantal yu'un ti Judae. Tey lic sva'anan ajvalil yu'un stuc.

⁹Ti Jorame, xchi'uc ti jpas-mantaletic yu'un ti yajsoldadotaque, lic stam batel sbeic xchi'uc scotol ti scarretatac sventa ti ac'ob letoe. Ti stuc une, xchi'uc ti jpas-mantaletic yu'un ti soldadoetic ti oy ta yoc ta sc'obic ti carretaetique, ta ac'ubaltic lic stsaquic ta leto ti edomitaetic ti joyobtasbil xa yu'unique.

¹⁰Ti le' une, cuch yu'un sventainel sba stuc ti Edome, ti jech to oy avi tana le' une. Ma'uc pasbilic ta mantal yu'un ti Judae. Ti jech yorail ta vo'ne taje, lic sventain sba stuc ti jteclum Libnae, yu'un ti Jorame laj xa svalopatin comel ti Ajvalile, Dios yu'un ti smolmuc'totac ta vo'nee.

¹¹Ma'uc no'ox taje, laj sva'anan c'opojebaletic ta vitstic ta Judá, ti ja' ta scoj yanij yo'ntonic ta stojol Dios ti jnaclejetic ta Jerusalene. Yan laj stamic batel yu'un ti Judae.

¹²Va'i le' une, ti Jorame laj yich' jlic vun ti meltsanbil yu'un ti j'alc'op Elías ti xi ta xale: “Ti Dios yu'un ti David ti ja' amolmuc'tot ta vo'nee, xi ta xalbote: ‘Mi ja'uc laj atam ta spasel jech c'u cha'al laj spas ti Josafat ti atote. Mi ja'uc laj atam ta spasel jech c'u cha'al laj spas ti Asa ech' ta ajvalil yu'un ti Judae.

¹³Le'e, ja' no'ox laj atam ta spasel jech c'u cha'al laj spas ti ajvaliletic yu'un ti Israele, ti ja' ta acoj yanij yo'ntonic ta stojol Dios ti jnaclejetic yu'un ti Judae, ti Jerusalene, jech c'u cha'al laj spasic sts'unubaltac ti Acabe. Ma'uc no'ox un, laj amil ti achi'iltac ta voq'uel ti c'alal ja' oy stuq'uilic ti stuquique, ti mu sta ti vo'ote.

¹⁴Jech o xal ti Diose ta xac'be svocol ti alumale, ti anich'nabtaque, ti avajniltaque, xchi'uc scotol ti c'usitic x'ayan avu'une.

¹⁵Mu no'ox albajuc yepal ti chamel lamal ta xvul ta atojol yu'une. Ta xlic ipajuc ach'ut ta jun siquil chamel ti mu xcol ta colesele, ja' to c'uxi sbusq'uij loq'uel ti abiquile.’ ”

¹⁶Va'i un, c'ot ta pasel yu'un ti Diose ti laj sliquesbe sjol ti filisteoetique, ti árabeetic ti slac'nainoj sbaic xchi'uc ti jnaclejetic yu'un ti Cus ti ta xlic sjolic ta scontrainel ti Jorame.

¹⁷Laj stam batel sbeic ta Judá, ti laj yu'ninic ti jteclume, ti laj yich'ic batel scotol ti c'usitic laj staic ta spasob mantal ti ajvalile, xchi'uc laj yic'beic ech'el ti xnich'nabtaque, ti yantsilelique. Ti buch'u xa no'ox come, c'ajomal no'ox ti Joacaz ti yits'inal nich'one.

¹⁸C'alal ech' scotol ti va'i s'elan taj une, ac'bat talel tsitsel yu'un ti Dios ta jun chamel ta xch'ut ti mu poxtabaje.

¹⁹Ech' c'uc sjaliluc un, nopol xa chibuc jabile, sbusq'uij loq'uel sbiquil ta scoj ti xchamele. Xbalet no'ox xchi'uc xc'uxul cham. Ti steclumale, mi ja'uc oy bu laj svulesic ta o'ntonal jutebuc ti lajuc to stsanic c'oc' sventa sna'el yich'el ta muc' jech c'u cha'al laj spasbeic ti smolmuc'totic ta vo'nee.

²⁰Ti lic ochuc ta ajvalile, yich'oj xa lajcheb xcha'vinic (32) jabil, ti c'ajomal no'ox vaxaquib (8) jabil och ta ajvalilal ta Jerusalene. Mu'yuc buch'u xme'inaj xa yu'un ma' ti cham une. Laj smuquic ta Steclumal David, ti bu ma'uc ta smucobbail ti ajvaliletique.