Read Tzotzil 2 Crónicas 22 Bible Online

2 Crónicas 22 - Tzotzil bible

2 Crónicas 22

¹Sventa xq'uexol ta ajvalilal ti Jorame, ti jnaclejetic ta Jerusalene ja' lic yotesic ta ajvalil ti Ocozías yits'inal nich'on ti Jorame. Yu'un ti c'alal laj yu'ninic axibalna ti voletel j'eleq'uetic ti jmoj xvoletic xchi'uc ti árabeetique, c'ot ta pasel ti laj smilbeic scotol sbanquilal nich'nab ti Joram ajvalil to ox ta Judae. Lic ochuc ta ajvalilal ti Ocozías une, xnich'on ti Joram ajvalil to ox yu'un ti Judae.

²Yich'oj xa chib xcha'vinic (22) jabil c'alal lic ochuc ta ajvalilale, ti c'ajomal no'ox jun jabil ech' ta ajvalilal ta Jerusalén. Atalía sbi ti sme'e, ti liquem talel sts'unubal ta snitilul ti Omrie.

³Ti Ocozías une jech lic stam ta spasel jech c'u cha'al laj spas ti Acab ti ja' snitilule. Chopol ti c'u s'elan ta sbijubtasat yu'un ti sme'e.

⁴Ti c'usitic lic spas ti Ocoziase, mu lecuc laj yil ta sba ta sat ti Diose. C'alal chamem xa ox ti stote, lec laj ya'i c'u s'elan ta sbijubtasat yu'un yuts' yalal ti Acab ti ta xc'ot ta ch'ayel xchi'uque.

⁵Ti jech laj xch'am bijubtasele, ti Ocozías une laj snupin sba sjolic xchi'uc ti Joram ajvalil yu'un ti Israele yo' jech ta stsaquic ta contra ti Hazael ajvalil yu'un ti Siria ta jteclum Ramot ti oy ta Galaade. Yayijesat yu'un sirioetic ti Joram une.

⁶Ti stuc une sut ech'el ta Jezreel ta xpoxtael sba ti yayijesat ta Ramot c'alal xyaquetic ta scontrainel ti Hazael ajvalil yu'un ti Siriae. Va'i un, ti ip ta xa'i ti Jorame, bat ti Ocozías ta Jezreel ta svu'lanele.

⁷Ti Diose, chapal xa ono'ox yu'un ti ta xcham ti Ocozías c'alal ta xbat svu'lan ti Jorame. Naca to ta xc'ot c'alal loq'uic batel xchi'uc ti Joram ta snupel ta be ti Jehú xnich'on ti Nimsie. Ja'uc ti Dios une st'ujoj xa ti Jehue yo' ta stubbe sc'oplal snitilultac ti Acabe

⁸C'alal yacal ta xchapan sc'oplal snitilultac Acab ti Jehue, capalic laj sta ti buch'utic banquilaletic yu'un ti Judae, xchi'uc yuts' yalaltac ti Ocozías ti c'otemic jtuneletic ta yu'une, laj smil.

⁹Laj yal mantal xtoc ti yich'uc sa'el ti Ocozías ti snac'oj sba ta Samariae. Laj staic talel ta stsaquel un, yic'ojic batel ta stojol ti Jehue, laj smilic un. Laj to smuquic un, yu'un vul ta sjolic ti ja' xnich'on ti Josafate ti buch'u laj sa' ta sjunul yo'nton ti Diose. C'ot ta pasel un ti tub sc'oplal ti mu xa junuc snitilultac ti Ocozías ti x'och ta ajvalilale.

¹⁰Ti Atalía sme' ti Ocoziase, c'alal ya'i chamem xa ti yole, bat smil scotol yuts' yalaltac ti ajvalil oy ta Judae.

¹¹Ti Joseba une, yantsil nich'on ti ajvalil Jorame, laj sbev loq'uel ti Joás xnich'on ti Ocozías c'alal yacal ta xmilatic yan xnich'nabtac ti ajvalile. Laj snac' ech'el ta jbej na jmoj xchi'uc ti jts'itesvaneje yo' jech mu xtaat ta milel yu'un ti Ataliae. Mu'yuc xlajic ta milel un. Ja' jech laj spas ti Josaba yantsil nich'on ti ajvalil Jorame, xchi'il ta voq'uel ti Ocoziase, yajnil ti pale Joiada une.

¹²Xnaq'uetic xchi'uc Joás ta xch'ulna Dios c'alal ochem ta ajvalilal yu'un jteclum ti Ataliae.