Read Tzotzil 2 Crónicas 23 Bible Online

2 Crónicas 23 - Tzotzil bible

2 Crónicas 23

¹Ta yucubal (7) jabil une, xi s'elan laj staan ta iq'uel banquilal soldadoetic ti Joiadae: ti Azarías xnich'on ti Jerohame, ti Ismael xnich'on ti Johanane, ti Azarías xnich'on ti Obede, ti Maaseías xnich'on ti Adaiase, xchi'uc ti Elisafat xnich'on ti Zicrie, ti junuc sjolic c'oticuc xchi'uque.

²Ja'ic lic xaniic ti Judae, ti laj stsobic ti levitaetic ti oyic ta scotol jteclumetic yu'un ti Judae, xchi'uc ti jujuchop banquilaletic yu'un ti Israele, ti scotolic batic ta Jerusalén une.

³Scotolic laj stsob sbaic ti bu taje. Laj spasic jun strateic xchi'uc ti ajvalil ta xch'ulna ti Diose. Xi albatic yu'un ti Joiada une: “Li' oy ta atojolic xnich'on ma' ti ajvalil une, ti buch'u tsots albil sc'oplal ta x'och ta ajvalil jech c'u cha'al yaloj ta strate Dios ta sventa snitilultac ti Davide.

⁴Xi s'elan ma' ti sc'an xapasic une: Ti jch'ac ta oxch'ac ti vo'oxuque, ti paleetique, xchi'uc ti levitaetic ti oyic ta tunel ta cuxob o'ntonale, ta xchabiic sti'tac ti ch'ulnae.

⁵Ti yan jch'ac ta oxch'aque, ta sc'an ti oyicuc ta sna ti ajvalile. Ti jch'ac ta oxch'aque, oyicuc ta ti' moc ta ochebal yu'un ti jteclume. Yepal ti jteclum une, ta svol sbaic ec ta yamaq'uil ti ch'ulnae.

⁶Ja'uc le' une, mu'yucuc buch'u ta x'och ta ch'ulna mi ma'uc ti paleetique, ti levitaetic ti oyic ta tunele. C'ajomal no'ox xu' ta x'ochic yu'un yabtelic. Ti jteclum ch'abal sta ti stunelique, svolojic sbaic ta chabivanej jech c'u cha'al yaloj ti Diose.

⁷Ti levitaetique ta set sbaic ta joyob ta stojol ti ajvalil ti chapalic xchi'uc yabtejebic ta sc'obique, ti chi'inbil yu'unic ti buyuc no'ox ta xbat ti ajvalile. Ti buch'u ta stsatsal stic' sba ochel ya'i ta ch'ulnae, ta xcham.”

⁸Ti levitaetic une, xchi'uc ti jnaclejetic yu'un Judae, jech laj spasic scotol jech c'u cha'al albatic yu'un ti pale Joiadae. Ta jujun tal laj svol ti sviniquique, jech c'u cha'al ta xtunic ta cuxob o'ntonale, jech c'u cha'al ti buch'utic oy sc'oplal ta xloq'uic batele. Ti pale Joiadae mu xac' loc'uc batel ti buch'u oyic ta tunele.

⁹Va'i un, ti banquilaletic yu'un ti soldadoe, ac'batic yu'un Joiada ti lanzaetique, ti ep ta tos macobbailetic oy ta xch'ulna Dios ti laj to ox sbain ta xchabiel ti ajvalil Davide.

¹⁰Ta jech yepal un, scotol ti jnaclejetique laj yich'ic va'ananel ta sti'tac, ta sba sten-tenul sjol ti xi oy ta bats'i c'obe, ti xi oy ta ts'et c'ob yu'un ti ch'ulnae, xchi'uc ta joyob bu ti altare. Jujun stsacojanic slanzaic yo' jech ta spojic ti ajvalile.

¹¹Va'i un, ti Joiada xchi'uc ti xnich'nabe laj yiq'uic talel ti ajvalile. Laj yac'beic slap ti sronail sjole, xchi'uc yan ti c'usitic ta xtun sventa svinajeb ti c'ot ta ajvalile, xchi'uc laj sq'uebbeic aceite ta sjol ta sts'acal to un. Laj yalbeic sc'oplal ti c'ot xa ta ajvalile. Ta jech yepal un, scotolic xi lic avanicuque: “¡Ajvalil!”

¹²C'alal laj ya'i ti Atalía ti x'avlajetic ta stoybeic sc'oplal ti ajvalile, bat ta xch'ulna ti Diose, ti bu volol scotolique.

¹³Laj yil ti va'al xa ti ajvalil ta sts'el oy ta ochebale. Vololic ta xocon ti banquilaletique, ti ep ta tos músicaetique, xchi'uc ti xmuyubajic no'ox scotol ti jnaclejetic ti xvochet no'ox yu'unic ta yoq'uisanel ti oq'uesetique. Ti jq'uejimoletique chapalic lec xchi'uc smusicaic ta xnitvanic ta sq'uejintael ti lequil q'uejimole. Va'i un, ti Ataliae lic xch'i' ta jatel ti sc'u'e, ti xi lic avanuque: —¡J'ac'vanej ta milel! ¡J'ac'vanej xa ta milel!

¹⁴Ja'uc ti pale Joiada une xi laj yalbe ti laj spas ta mantal ti laj stac batel ti banquilal soldadoetic ti sbainojic ta spasel ta mantal ti epal soldadoetique: —¡Chechic loq'uel ti xc'alet ta o'lol ti bu chololique! ¡Milic ya'i ta espada ti buch'utic jmoj sjolic xchi'uque! Ti palee yaloj xa ono'ox mantal ti mu smilic ta xch'ulna ti Diose.

¹⁵Laj xchechic ech'el, xi laj yiq'uic loq'uel ta sti' snail ca' ti ta xc'ot ta na ti bu spasob mantal ti ajvalile. Laj smilic ti bu taj une.

¹⁶Laj taj une, ti Joiadae lic spas trate ti stuque, ti scotol ti jteclume, ti ajvalile, ti c'otemic ta steclumaltac ti Diose.

¹⁷Ta jech yepal un, batic scotolic ta sjinesel ta xch'ulna ti Baale, ti laj slilinic ti altaretique, ti loc'tabil loc'obbailetic yu'une. Ti Matán yajpale ti Baal une, laj sc'ocbeic snuc' ta sts'el ti altaretique.

¹⁸Ta jech no'ox yepal ti Joiada une, lic sva'an jchabivanejetic ta xch'ulna Dios ti pasbilic ta mantal yu'un ti paleetique, xchi'uc ti levitaetique, ti ac'bilic stunelic ta jujuvoc' ta xch'ulna Dios yu'un ti David ta yaq'uel ti chic'bil matanal ta stojol ti Dios ti albil ono'ox sc'oplal ta sventa c'usi jbel tsots albil yu'un ti Moisese, ti muyubajicuc no'ox q'uejinicuc jech c'u cha'al laj yal comel ti Davide.

¹⁹Laj sva'anan xtoc jchabiej ochebal ta sti' xch'ulna Dios yo' jech mu x'ochic batel ti buch'utic mu'yuc spocoj stusoj sbaic xcaltique.

²⁰Ta jech yepal un, laj yic' talel ti banquilal jpas-mantal yu'un ti soldadoetique, ti buch'utic ich'bil ye sti'ique, ti its'inal ajvaliletic yu'un ti jteclume, xchi'uc scotol ti jteclume. Xchi'inojic loq'uel ta xch'ulna Dios ti ajvalil c'alal to ta na ti c'otem ta spasob mantale, ochic ech'el ta ti'na ti bu cajal sc'oplale. Ts'acal to un, laj xchotanic ta spasob mantal ti ajvalile.

²¹Xmuyubajic no'ox liquel scotol ma' ti jteclum une. Ti jech cham ta milel ta espada ti Ataliae, lamaj c'op ma' ta jteclum une.