Read Tzotzil 2 Crónicas 24 Bible Online

2 Crónicas 24 - Tzotzil bible

2 Crónicas 24

¹Yich'oj vucub (7) jabil lic ochuc ta ajvalilal ti Joase. Cha'vinic (40) jabil ech' ta ajvalilal ta Jerusalén. Sibia sbi ti sme'e, ti liquem talel ta Beersebae.

²Lec laj yil ta sba ta sat Dios ti c'usitic laj spas ti Joás c'alal cuxul to ox ti pale Joiadae.

³Ti Joase sa'bat chib yajnil yu'un ti Joiadae. Laj yil squeremtac xchi'uc stsebtac ti Joás une.

⁴Ech' c'u sjaliluc to un, ti Joase lic snop ti ta xcha'meltsan xch'ulna ti Diose.

⁵Jech o xal un, lic svol ta tsobel ti paleetique, xchi'uc ti levitaetic ti xi laj yalbe ya'ie: “Batanic ta jteclumetic yu'un Judá yo' jech scotol israeletic ta xatsobbeic ti staq'uinique, yo' jech ta xich' meltsanel jujun jabil bu soquemic xch'ulna ti Diose. Sujo abaic yu'un taj une.” Ja'uc ti levitaetic une mu'yuc laj suj sbaic un.

⁶Va'i ti ajvalil une xi laj yalbe c'alal laj sta ta iq'uel ti pale Joiadae: —¿C'u cha'al ti mu'yuc laj atijbe yo'nton ta yac'bel yipal ti levitaetic ta stsobbel talel staq'uinic ti Judae, ti Jerusalene, yu'un ti laj yal mantal Moisés ti yajtunel Diose, ti scotol israeletic ta stsobbeic ta sventa ti Axibalna yu'un ti tratee?

⁷Yu'un ti Atalía spajebal xa no'ox me' mulile, xchi'uc ti jts'aclivanejetic yu'une, laj stamic loq'uel ti c'usitic oy ta xch'ulna Dios ti laj stunesic ta sventa spasbel stoyel xi'el ti loc'obbail diosetic yu'unique.

⁸Va'i ti ajvalil une laj yac' ta meltsanel jun caxa ti laj yich' bejanel ta spat sti' ti ch'ulnae.

⁹Ta jech yepal un, lic scaj'albeic ya'i scotol Judá xchi'uc Jerusalén ti tsotsuc sc'oplal yich'icuc talel ti patan ta stojol Dios jech c'u cha'al yaloj ono'ox ti Moisés yajtunel Dios ta stojol ti Israel ti c'alal oyic ta sbajtical banomile.

¹⁰Scotol ti banquilaletique, ti jteclume, xmuyubaj no'ox, bat yaq'uic ti patan ta caxae, ja' to ti c'uxi noj yu'unique.

¹¹Ti levitaetique sbainojic ta yich'el batel caxa ta stojol ti ajvalile yo' jech ta stuc'ulan ta sq'uelel. Mi stsoboj sba xa ti taq'uin laj yil une, ta xc'ot ti buch'u sbainoj ta yalel lo'il a'yej yu'un ti ajvalile, xchi'uc yan ti buch'u sbainoj ta sq'uelel ti tacbil yu'un ti banquilal palee. Ta xocobtasic ti caxae. Ta xbat yaq'uic yan velta ti bu bejel yu'unic une. Ja' yabtelic jujun c'ac'al ti jech ta spasique. Ep taq'uin ta staic ta tsobel.

¹²Ti ajvalil une xchi'uc ti Joiadae sbainojic ta yaq'uel ti taq'uin ta stojol ti buch'u sbainoj ti abtel ta ch'ulnae, ti spasicuc trate xchi'uc ti j'an-tonetique, ti jch'ul-te'etic ta xcha'meltsanel xch'ulna ti Diose. Ja' jech xtoc tsots sc'oplal spasicuc trate xchi'uc ti banquilaletic ti buch'utic sbainojic ta yabtelanel ti tsatsal taq'uine, ti c'anal taq'uine, yo' jech ta xich' cha'meltsanel ti ch'ulnae.

¹³Ti buch'utic sbainojic ti abtele lic abtejicuc, tojob scotol ma' ti abtel ti oy ta yoc ta sc'obic ta xcha'meltsanel une, jech lic xcha'meltsanic ti xch'ulna Dios jech c'u cha'al ti loc'tabil ta svunaltac ta ba'yele. Jun yutsil c'ot ta meltsanel yu'unic.

¹⁴C'alal c'ot ta tsutsel yu'unique, ti c'u to yepal com ti taq'uine, laj yich'ic batel ta stojol ajvalil xchi'uc ti Joiadae. Lic yaq'uic o ta meltsanel ti c'usitic ta xtun ta xch'ulna ti Diose, ti c'usitic ta xtun ta sventa stoyel xi'ele, ti ta xtun ta sventa xchic'obil ti matanale, ti muc' ta lechetique, xchi'uc ti c'usitic yan ta xtun ti meltsanbil ta oroe, xchi'uc ti ta platae. C'alal cuxul to ox ti Joiadae, mu xicta sbaic ta yaq'uel ti chic'bil matanal ta xch'ulna ti Diose.

¹⁵Molib ti Joiada une. Ti jech jal xa ti xch'iel sc'opojele, cham un. Yich'oj xa lajuneb yucvinic (130) jabil ti c'alal chame.

¹⁶Laj smuquic ta Steclumal David jmoj xchi'uc bu mucul ti ajvaliletique. Lec ech' ta stojol ti Israele, ta stojol ti Diose, xchi'uc ta stojol ti xch'ulnae.

¹⁷C'alal chamem xa ti Joiada une, ti banquilaletic yu'un ti Judae c'otic ta stojol ti ajvalile, ti xnijiletic xchimiletic laj yich'ic ta muq'ue, ti sq'ueloj sba c'u s'elan bijubtasat yu'unique.

¹⁸Lic yicta sbaic un ti ta xc'otic ta xch'ulna ti Ajvalil Dios yu'un ti smolmuc'totic ta vo'nee. Lic snijan xchiman sbaic ta yich'el ta muc' sloc'obbailtac ti Aserae, xchi'uc ti yan loc'obbailetique. Lic ilinuc ti Dios ta stojol ti Judae, xchi'uc ta stojol ti Jerusalene ta scoj ti mulil taj une.

¹⁹Manchuc mi jech un, ti Diose laj to stacan batel yaj'alc'optac ta stojolic ti suticuc talel ta stojole. Ja'uc ti jnaclejetic une mu xa xa'ibeic xchiquinal stojobtasel yu'un ti j'alc'opetique.

²⁰Va'i ti Zacarías une, xnich'on ti pale Joiadae, u'ninbat yo'nton yu'un xcuxlejal ti Diose. Bat sva'an sba bu lec toyol ti xi lic yalbe ti jnaclejetique: “Xi ta xal ti Diose: ‘¿C'u cha'al mu xac'an xach'unic ti jmantaltaque? ¿C'u cha'al ta xasa' ti avilbajinelique? ¡Ti laj xa ajip atenicun comel une, ta jtenoxuc jipoxuc comel ti vu'un ec une!’ ”

²¹Ja'uc le' une, lic sco'oltas sjolic ta scontrainel. Ta yamaq'uil xch'ulna Dios, laj spujbeic ton ta smantal ti ajvalile.

²²Ti ajvalil Joás une ch'ay ta sjol slequil yo'nton ti Joiada stot ti Zacarías ti oy c'usi lec ac'bat sna' yu'une. Laj smilbe ti xnich'on Zacarías sbie, ti xi lic avanuc ti c'alal ta xa xchame: “¡Oyuc ta sba ta sat ti Dios ti vi s'elan une, ti chapanaticuc yu'une!”

²³Ti ta yorail corixmae, ti soldadoetic yu'un Siriae laj svolic ta stsaquel ta leto ti Joase. Xvoletic batel ta slumal Judá, xchi'uc ta Jerusalén ta ts'acal to un, ti laj stsutsesic scotol ti banquilaletic yu'un ti muc' ta jteclume. Ti c'usi x'ayane, laj xchajic ta sa'el ti laj staquic batel ta stojol ti ajvalil yu'un Damascoe.

²⁴Juteb no'ox uni soldado sirioetic ti c'otique. Ti le' une, ac'batic ta yoc ta sc'obic yu'un Dios ti epal soldadoetique. Ja'uc le' une, aq'ueic ta c'abal ta scoj ti laj svalopatinic comel ti Ajvalil Dios yu'unic ti smolmuc'totic ta vo'nee. Laj stoj ta sjol Joás ti tsitsel ti lamal c'ot ta stojole.

²⁵C'alal laj yo'ntonic ta yaq'uel leto ti sirioetique, tsots xa ip ta xa'i laj yictaic comel ti Joase. Ti yaj'opisialtaque lic spay sc'opic ta scontrainel yo' ta spacbeic sutel ti laj yac' ta milel xnich'on ti pale Joiadae. Laj smilic ta stem un. Ts'acal to un, laj smuquic ta Steclumal ti Davide. Ma'uc bat smuquic bu ta xich' muquel ti ajvaliletique.

²⁶Ti buch'utic laj spay sc'opic xchi'uc ta scontrainele, ja' ti Zabad xnich'on ti Simeat ti jun amonitae, xchi'uc ti Jozabad xnich'on ti Simrit ti jun moabitae.

²⁷Sc'oplal slo'il ya'yejal xnich'nabtac ti Joás ti ep c'usitic caj'albil ta xc'ot ta stojolique, xchi'uc ti laj xcha'meltsan xch'ulna ti Diose, ts'ibabil com scotol ta jpoc svunal slo'il ya'yejal ti ajvaliletique. Ts'acal to un, ti Amasías ti ja' xnich'one laj yich'be yabtel ti stote.