Read Tzotzil 2 Crónicas 25 Bible Online

2 Crónicas 25 - Tzotzil bible

2 Crónicas 25

¹Yich'oj vo'ob xcha'vinic (25) jabil c'alal lic ochuc ta ajvalilal ti Amasiase, ti jalij baluneb xcha'vinic (29) jabil ta ajvalilal ta Jerusalene. Joadán sbi ti sme'e, ja' slumal ono'ox ti Jerusalene.

²Ti c'usitic laj spas ti Amasiase, lec laj yil ta sba ta sat ti Diose, ac'o mi mu jamaluc ti yo'ntone.

³C'alal stsacoj xa lec yip ta ajvalilal ti Amasiase, laj smil scotol ti j'opisialetic jmilvanejetic yu'un ti stote.

⁴Ja'uc le' une, mu'yuc laj smilbe ti yalab xnich'nabique. Laj spas jech c'u cha'al ts'ibabil ta svunal yu'un Moisés ti oy jbel c'usi tsots albil ti xi laj yal ti Diose: “Mu'yuc ta xich' milel ti totiletic ta scoj smul ti xnich'nabique. Ja' jech ec ti nich'nabile mu'yuc ta xich' milel ta scoj smul ti stotique, le'e ta jujun ta stoj ti smul stuquique.”

⁵Ti Amasiase laj stsob scotol ti jnaclejetic yu'un Judae, ti jnaclejetic yu'un Benjamine. Va'i laj yal mantal ta snabanel ta jpas-mantaletic yu'un ta jujuvoc'. Ta jech yepal un, lic stsacbe sbi scotolic ti buch'utic yich'ojic jtob (20) jabile, xchi'uc ti x'ech' xa batele. Loc' ta t'ujel vo'lajunvinic mil (300,000) ta vo' viniquetic ti chapalic ta ac'-letoe, ti xtojobic ta spiquel ti lanza xchi'uc ti macobbaile.

⁶Ma'uc no'ox taje, laj spas trate xchi'uc Israel sventa vo'vinic mil (100,000) ta vo' soldado, ti laj yac' oxmil xchi'uc vo'lajunvinic (3,300) ta kilo platae.

⁷Ja'uc le' une, oy jun vinic yajtunel Dios ti xi albat yu'un ti c'alal bat sva'an sba ta stojole: —Ma' le' une, ajvalil, mu xavol abaic xchi'uc ti soldado israeletique. Ictabilic xa comel yu'un Dios ti Israele, xchi'uc scotol svinictac ti Efraine.

⁸Mi ja' xa avip ta xc'ot ta xava'i ti soldadoetic yo' ta xatsacvan ta leto xchi'uque, ti Diose ta xac'ot ta yoc ta sc'ob ti acontrae. Ti Diose oy smuc'ul stsatsal ta xcoltavan, mi mo'oje, ta xjipvan ta lum.

⁹Ti Amasiase xi laj sjac'be ti vinic yajtunel Diose: —¿C'usi ta xc'ot ta pasel un cha'e ti laj cac'be oxmil xchi'uc vo'lajunvinic (3,300) ta kilo plata ti soldado yu'un Israele? Xi laj stac' ti yajtunel Diose: —Ti Diose yepal to xu' ta xac'bot, ja' jutuc no'ox taje.

¹⁰Va'i ti Amasías une, xchi'uc ti soldadoetic ti liquemic talel ta Efraín ti oy sc'oplal ta stsob sbaique, laj xch'ac sbaic, sutic ech'el ta snaic yu'un. Ti stuquic une cap sjolic yu'un ti Judae, ti bats'i ilinemic sutic ech'el ta snaique.

¹¹Ti Amasías une laj stsatsubtas yo'nton, yic'ojan batel ti yajsoldadotac ta Stenlejal Ats'am, ti laj smil lajunmil (10,000) ta vo' viniquetic ti liquemic talel ta Seire.

¹²Ma'uc no'ox taje. ti judaetique, cuxul laj staic ta tsaquel lajunmil (10,000) ta vo', ti yic'ojic batel ta jun lican ch'entic ti laj sjipic yalel ti bu taje. Toj lilijel c'ot scotolic.

¹³Jech ec ti soldadoetic ti mu'yuc xac' ti Amasiase, ti jmoj ox ta svol sbaic ta ac'-leto ti laj stacanan sutel ta snaique, laj smesic ta u'ninel ti jteclumetic oy ta yosilal Judae, ti lic ta Samariae, ti c'ot c'alal to Bet-horone. ti laj smilic oxmil (3,000) ta vo' jnaclejetique. Ep laj yelc'anic batel ti c'usitic x'ayane.

¹⁴C'alal sut talel ta stsalel edomitaetic ti Amasiase, laj yich' talel ti diosetic yu'un ti Seire. Lic sbisan ta yajdios ti laj sbic'tajes xchimanel sba ta yich'el ta muq'ue. Lic xchic'be pom ta stojol.

¹⁵Ilin ti Dios ta stojol ti Amasías ti jech laj spase. Laj stac batel yaj'alc'op ta stojol ti xi albat yu'une: —¿C'u cha'al laj anaban aba ta stojol diosetic yu'un ti jyanlumetic ti c'alal laj avil ti mu'yuc c'usi xu' yu'un ti laj atsacbe ta leto ti slumale?

¹⁶Ja'uc le' une, c'alal jech xyaquet ta xal ti j'alc'op taje, ti ajvalile xi laj stac' sutel ti c'ope: —¿Mi yu'un laj cac'cutic avabtel ta jbijubtasvanej yu'un ti ajvalile? ¡Ictao aba ta vulvunel xchi'uc taje! ¿Mi ja' lec ta xava'i ti ta xavich' milele? Ti j'alc'ope laj spajes sba, xi xa no'ox laj yal jbel cha'bele: —Jna' lec ti c'ot xa ta nopel yu'un ti Diose ti ta stub ac'oplal ta scoj ti mu xac'an xach'un ti ta jbijubtasote.

¹⁷Ja'uc ti Amasías une, ajvalil yu'un ti Judae, laj xch'un bijubtasel ta yan, ti xi laj stac batel mantal ta yalel ta stojol ti ajvalil yu'un ti Israele, ja' ti Joás xnich'on ti Joacaz, smom ti Jehue: “La', va'lucutic ta satilal quere.”

¹⁸Ja'uc ti Joase xi xcholet laj stac' sutel ti c'ope: “Ti tomal ch'ixe xi laj yalbe ti ch'ut te' ti oy ta Líbanoe: ‘Ac'bo avantsil nich'on ti jquereme yo' ta xic' sbaic.’ Le' une, ech' jcot jti'oval chon ti laj xvoch' ta teq'uel ti tomal ch'ixe.

¹⁹Atsaloj xa ti edomitaetic ti avuni tuc xa no'ox jech xava'i abae, xchi'uc ti xasa'ilan xa avich'el ta muq'ue. Oyan no'ox ta ana quere. ¿C'u cha'al ta xasa'ilan ava'i ti avocole, ti ta sta ta maquiel svocol avu'un ti Judae?”

²⁰Manchuc mi jech un, ti Amasiase mu'yuc laj yac'be ta venta ti sc'ope, yu'un nopbil xa yu'un Dios ti ta xac' ta sc'ob Joás ta scoj ti laj snijan xchiman sba ta stojol ti diosetic yu'un ti edomitaetique.

²¹Va'i ti Joás une laj stam batel sbe yo' ta stsac sbaic ta leto xchi'uc ti Amasías ta Bet-semes ti oy ta yosilal ti Judae.

²²Ti Israele laj stsalic ti Judae. Ta jujun tal stambeic jatobal c'alal ta snaic.

²³Ti Joás ajvalil yu'un ti Israele, ta Bet-semes laj sta ta tsaquel ti Amasías ajvalil yu'un ti Judae, ti yic'oj batel xtoc ta Jerusalene, ti c'ot sjom balunvinic (180) metro sjamlej smocal ti jteclume. Lic ta ti'na ti sbiinoj Efraine, c'ot c'alal to ti'na ti sbiinoj Xuc'ave.

²⁴Ma'uc no'ox taje, laj yu'ninan scotol ti oroe, ti platae, xchi'uc scotol ti c'usitic ta xtun ta xch'ulna ti Dios ti sbainoj ta xchabiel ti Obed-edome, xchi'uc xtoc ti c'usitic toyol stojol oy ta sna ti ajvalile. C'alal laj xa ox xchuc jayibuc viniquetic sventa ti spojobbailique, sut batel ta Samaria ta ts'acal to un.

²⁵Ti Amasías xnich'on ti Joase, ajvalil yu'un ti Judae, ch'i c'opoj to ech'el vo'lajuneb (15) jabil c'alal chamem xa ox ti yan Joás xnich'on ti Joacaz ajvalil yu'un ti Israele.

²⁶Ti sliqueb stsutseb slo'il ya'yej ti Amasiase, ts'ibabil com ta svunal slo'il ya'yej ajvaliletic yu'un ti Judae xchi'uc ti Israele.

²⁷C'alal lic xch'ac sba ta stojol Dios ti Amasiase, ta jech to yepal, lic spayic c'op ta scontrainel ti Amasías ta Jerusalene. Ti stuque jatav ech'el ta Laquis. Nutsbil ech'el ta jteclum taj une, ti bu laj smilique.

²⁸Ta jech yepal un, laj scajanic ech'el ta ca', bat smuquic ti bu mucul ti smolmuc'totac ta Steclumal ti Davide.