Read Tzotzil 2 Crónicas 26 Bible Online

2 Crónicas 26 - Tzotzil bible

2 Crónicas 26

¹Va'i un, scotol ti jteclum Judae laj yiq'uic talel ti Uziase yo' jech ta x'och ta ajvalil yu'unic ta sventa ta xich'be yabtel ti Amasías ti ja' stote. Vaclajuneb (16) to no'ox jabil yich'oj ti Uziase.

²C'alal chamem xa ox ti stote, ta ts'acal to un, lic xcha'meltsan ti jteclum Elate, ti c'ot ta sventa Judá yu'une.

³Vaclajuneb (16) jabil yich'oj ti Uzías c'alal och ta ajvalilale. Ech' ta ajvalil lajcheb yoxvinic (52) jabil ta Jerusalén. Jecolías sbi ti sme'e, slumal ono'ox ti Jerusalene.

⁴Ti c'usitic laj spas ti Uziase, lec laj yil ta sba ta sat ti Dios. Jech laj spas jech c'u cha'al laj spas ti Amasías ti ja' stote.

⁵Laj yac' yo'nton ta snabanel sba ta stojol Dios ti c'alal cuxul to ox ti Zacariase, ti ac'bat yil ta xi'tael ti Diose. Ti jech nabal ta stojol Diose, ac'bat ti c'usi ta xtun yu'une.

⁶Ti Uziase lic stam sbe ta stsaquel ta leto ti filisteoetique. Laj slomesbe smocal ti jteclum Gate, ti Jabniae, xchi'uc ti Asdode, ti yochel ta sva'anel jteclumetic ta yosilal Asdod bu nacalic ti filisteoetique.

⁷Coltabil yu'un Dios ta scontrainel ti filisteoetique, xchi'uc ti árabeetic nacalic ta Gur-baale, xchi'uc ta scontrainel ti meunitaetique.

⁸Ti amonitaetique lic stojic patan ta stojol ti Uziase, ti puc ech'el sc'oplal c'alal to sts'aquil yosilal ti Egiptoe, yu'un stsacoj yip ti yabtel ta j'ech'ele.

⁹Laj smeltsanan xtoc luchlebaletic ta Jerusalén ta sts'el ti'na ti oy ta Xuc'ave, ta sts'el ti'na ti oy ta Stenlejale, xchi'uc ti ta xuc'ave. Chapal com yu'un.

¹⁰Laj sva'anan ta smeltsanel xtoc luchlebaletic ta sbajtical banomil. Laj sjots'anan ep joq'uetic, yu'un yepal ti chon bolometic yu'un ti oy ta stenlejale, xchi'uc ti muyemic batel ta stenlejal jol stseleje. Yepal viniquetic yu'un xtoc ti yac'oj sjol yo'nton ta abtel ta yav ts'unubaltic ti oy ta toyol muc'tiquil te'tique.

¹¹Ti Uziase oy yajsoldadotac ti chapalic xtoc ta ac'-letoe, ti svoc'ol-voc' xvolet ta xloq'uic ta ac'-leto ti c'u yepal tsacbil sbi ta jujuvoc' ti chapanbil yu'un ti Jehiel yajts'ibajom ti ajvalil ti ventainbil yu'un ti j'opisial Maaseías ti pasbil ta mantal yu'un ti Hananiase, ti ja' banquilal jpas-mantal yu'un yajsoldado ti ajvalile.

¹²Ti c'u yepal c'otemic ta banquilaletic yu'un ti jujuvoc' soldado ti mu sna' xi'ique, loc' ta chapel cha'mil xchi'uc vaquib ciento (2,600) ta vo' ta scotolic.

¹³Sbainojic ta sventainel vucub svaclajunvinic ta mil xchi'uc vo'ob ciento (307,500) ta vo' soldadoetic ti chapalic ta ac'-letoe, ti stsacoj lec yipic ta j'ech'el ta scoltael ti ajvalil ta ac'-letovajele.

¹⁴Scotol yajsoldadotac ti Uziase, laj xchapanbe ti smacobbailtaque, ti slanzaique, ti sbin jolique, ti smacobbailtaque, ti smac sti' yo'ntonique, xchi'uc ti sjimich'ique.

¹⁵Ma'uc no'ox taje, ti ta Jerusalene, laj smeltsan jtos o ta abtejebaletic sventa ac'ob leto yo' jech ta scotanic ta luchlebaletique, ti bu toyolic smoctac ti jteclume, ti ta xach'ic batele, ti yolobe, xchi'uc ta sjipel batel ti muc' ta tonetique. Puc batel sc'oplal ta nom. Jun no'ox yutsil coltabil yu'un ti Diose. Mu no'ox albajuc ma' ti yipal c'ot ta j'ech'el une.

¹⁶Ja'uc le' une, c'alal stsacoj xa lec yipal yu'un ta j'ech'ele, lic stoy sba, ti c'ot ta tsutsel xchi'uque. Laj syanijes sba ta stojol ti Dios yu'une, yu'un och batel ta xch'ulna Dios ta xchiq'uel pom ti bu oy yaltaril ti chic'obil pome.

¹⁷Ta spat une, tijil ochel ti pale Zacariase, xchi'uc chanvinic (80) ta vo' yajpaletac Dios ti mu sna' xi'ique,

¹⁸ti xi laj yalbeic ta sat ti laj svulique: “Ajvalil Uzías, ti ta xavac' chic'bil pom ta stojol ti Diose, ma'uc yabtel ti Jcuch abtele. Sbainojic ta xchiq'uel ti paleetic snitilultac ti Aarone, ti c'otemic ta yu'un Dios ta xchiq'uel ti pome. Loc'an batel, Jcuch abtel, li' ta ch'ulnae. Laj xa ayanijes aba ta stojol ti Diose. Ma'uc xa ich'bil ta xac'ot ta muc' yu'un ti jech le'e.”

¹⁹Ti Uzías une stsacoj chic'obil pom yo' ta xac' ti pome, lic socuc sjol ta stojol ti paleetique. Ta jech to yepal un, ta yut xch'ulna ti Dios ta sts'el ti altare, ta sba ta sat ti paleetique, lic tsaqueuc ta c'a'emal chamel ta sti'ba.

²⁰Ti banquilal pale Azariase, xchi'uc scotol ti yan paleetique, lic stuc'ulanic batel, tsacbil xa ta c'a'emal chamel ta sti'ba laj yilic un. Ta jech no'ox yepal laj sloq'uesic batel ti bu taje. Yo'ntonuc xa loc'uc batel ta anil ti stuque, tsitsat xa yu'un ti Dios une.

²¹Tsacbil o ta c'a'emal c'alal sta sc'ac'alil cham laj ti ajvalil Uzías une. Yipal o c'a'emal c'u sjalil cuxul ti ajvalile. Slecoj bu ac'bil ta jbej na. Mi ja'uc xa x'aq'ue ochuc ta xch'ulna ti Diose. Ti xnich'on ti Jotam sbie lic sbain ti abtelal ta sventainel ti muc' ta jteclume.

²²Ti sliqueb slajeb sc'oplal slo'il ya'yejal ti Uziase, laj sts'iba comel ti j'alc'op Isaías xnich'on ti Amose.

²³C'alal cham ti Uziase, laj smuquic ti bu mucul ti smolmuc'totac ta jun mucobbail yu'unic ti ajvaliletique, ti mu xch'ay xa'iic tsacbil ta c'a'emale. Ts'acal to un, lic ich'batuc yabtel ta ajvalilal yu'un xnich'on ti Jotam ti sbie.