Read Tzotzil 2 Crónicas 28 Bible Online

2 Crónicas 28 - Tzotzil bible

2 Crónicas 28

¹Yich'oj jtob (20) jabil c'alal lic ochuc ta ajvalilal ti Acaze. Vaclajuneb (16) jabil och ta ajvalilal ta Jerusalén. Ja'uc ti c'usitic lic spas une, mu lecuc laj yil ta sba ta sat ti Diose. Mu jechuc laj spas jech c'u cha'al laj spas ti smolmuc'tot Davide.

²C'ajomal no'ox lic stam ta spasel jech c'u cha'al laj spas ti ajvaliletic yu'un Israele. Lic yunijesan taq'uinetic ti laj sloc'ta diosetic sventa sloc'obbail ti Baale.

³Laj xchic' pom ta stenlejal yosilal Ben-hinom. C'ot ta pasel yu'un ti laj xchic' ta matanal ti xnich'nabe jech c'u cha'al ta spasic ti yan muc'tiquil jteclumetic ti tenbil loq'uic ta sba ta sat israeletic yu'un ti Diose.

⁴Ma'uc no'ox taje, laj yac' milbil matanaletic, xchi'uc chic'bil pom ta jujun c'opojebaletic, ta yolon scotol limlim muc'tiquil te'etic, xchi'uc ta xch'ulnatac ti bisbil ta diose.

⁵Ta scoj taj une, ti Dios ti ja' Ajvalil yu'une, laj spas mantal ti aq'ue batel ta c'abal ta stojol ti Siriae, ti cuch yu'un ta ilbajinvanej ti sirioetique, ti mu albajuc yepal chucbil batic ta Damascoe. Ja' jech xtoc, aq'ueic ech'el yu'un Dios ta yoc ta sc'ob ti ajvalil yu'un Israele.

⁶Jech un ti Peka xnich'on ti Remaliase, ta jun no'ox c'ac'al, laj smil vacvinic mil (120,000) ta vo' jtunel viniquetic ti mu sna' xi'ic ti oy ta Judae, ta scoj ti laj svalopatinic comel ti Dios yu'un ti smolmuc'totic ta vo'nee.

⁷Ti banquilal j'ac'-leto yu'un Efraín ti Zicri sbie, laj smil ti Maaseías xnich'on ti ajvalile, ti Azricam banquilal jchabiej na yu'un ti ajvalile, xchi'uc ti Elcaná banquilal j'opisial yu'un ti ajvalile.

⁸Ma'uc no'ox taj une, ti soldadoetic yu'un ti Israele laj stsaquic batel ta chuquel lajunvinic mil (200,000) ta vo' jnaclejetic yu'un ti Judae. Capal bat ta antsetic, ta queremetic, xchi'uc ta tsebetic. Ep ti c'usitic laj stamic ech'el ti yich'ojic batel ta Samariae.

⁹Ti bu taje, oy jun yaj'alc'op Dios, Obed ti sbie, ti xi laj yal c'alal loc' batel ta snupel ta be ti soldadoetic c'alal ta x'ochic ech'el ta Samariae: —Ti Ajvalile, Dios yu'un ti amolmuc'totic ta vo'nee, soc sjol yu'un ti Judae. Jech o xal laj yac'boxuc ta avoc ta ac'obic une. Ja'uc ti vo'oxuc une laj amilic ti c'ot c'alal to vinajel ta j'ech'el ti sti'emal ajolic yu'un ti sc'ac'al avo'ntonique.

¹⁰Ma'uc no'ox taje, nopbil xa avu'unic ta xamosovinic ti viniquetique, ti antsetique, ti jnaclejetic yu'un ti Jerusalene, ti Judae. Ti le' une, ¿mi mu'yuc van ataoj amulic ta stojol ti Ajvalil Dios avu'unique?

¹¹Ma' ti le'e, ta xcalboxuc ava'iic ti c'otuc ta avo'ntonic ti coltaic ech'el ti jchuqueletic ti laj atsaquic talele, yu'un avinquilel abaic. Tsots xa ilinem ma' ti Dios ta atojolic une.

¹²Va'i un, ti Azarías xnich'on ti Johanane, ti Berequías xnich'on ti Mesilemote, ti Ezequías xnich'on ti Salume, xchi'uc ti Amasa xnich'on ti Hadlaie, ti ja'ic banquilaletic yu'un ti Efraine, tsots laj sva'an sbaic ta stojol ti buch'u sutic xa talel ta ac'-letoe.

¹³Xi laj yalbe ya'iique: —Mu xaviq'uic talel ti jchuqueletic li'e, yu'un ti jech le'e ta jta jmultic ta stojol ti Diose. Ti c'usi oy ta avo'ntonique, c'ajomal no'ox ta xacajtsanic ta j'ech'el ti jmul jcolo'cutic ti epajem xa ta j'ech'ele, ti ta xlic ilinuc ep ti Dios ta stojol ti Israele.

¹⁴Va'i ti soldadoetic une laj scoltaic ti jchuqueletique. Ta sba ta sat ti banquilaletique yu'un ti jteclume, laj yac'beic comel ti c'usitic laj spojbeic talele.

¹⁵Ti viniquetic ti albat sc'oplal ti tsots laj sva'an sbaique, ta jech yepal un, lic sbainic ti jchuqueletique, xchi'uc ti c'usitic pojbatic talele. Lic sloq'uesic c'u'iletic. Laj yac'beic slap ti buch'utic t'analic une. Laj yac'beic slap xonobic un. Lic yac'beic sve'el yuch'omic. Lic xpoxtaic un ti buch'utic yayijemique. Laj scajanic batel ta burro ti buch'utic oyic ta vocol yo' ta xc'otic c'alal to Jericó, jun jteclum ti xantic sbie. Laj yictaic comel un ta stojol ti yuts' yalalique. Sutic ech'el ta Samaria ta ts'acal to un.

¹⁶Ti jech yorail ta vo'ne taje, ti ajvalil Acaze laj stac batel yaj'abteltac ta stojol ajvalil yu'un ti Asiriae, ta sc'anel ti coltaatuc yu'une.

¹⁷Yu'un ti edomitaetique lic no'ox sjolic yan velta ta tsacvanej ta leto, ti laj xa stsal ti Judae, xchi'uc ti yic'oj batel jayibuc jchuqueletique.

¹⁸C'alal jech xyaquet taje, ja'uc ec ti filisteoetique laj xa xchajic ta sa'el c'usitic x'ayan yu'un ti jteclumetic oy ta stenlejale, xchi'uc ti Néguev ti oy ta yosilal Judae. Laj xa yu'ninic ti Bet-semese, ti Ajalone, xchi'uc ti Guederote. Laj yu'ninic xtoc ti Socoe, ti Timnae, ti Gimzoe, xchi'uc ti jteclumetic yu'une, ti snacanoj xa sbaic ti bu taje.

¹⁹Yu'un ti Diose, oy ta yo'nton ti c'otuc ta j'ac'-lo'il-maxil ti Judá ta scoj ti Acaz ajvalil yu'un ti Judae, ti ja' laj sliques ti mu pajesbaj ti c'usi ta xc'ot ta Judae, xchi'uc ti mu'yuc slequilal yo'nton ta stojol ti Dios ta j'ech'ele.

²⁰Ti Tiglat-pilesere, ajvalil yu'un ti Asiriae, laj stam ech'el sbe ta stojol ti Acaze. X'ech' to ac'bat svocol yu'un c'alal jcoltavanej ta alele.

²¹Ti Acaze, ac'o mi laj stam loq'uel ti c'usitic toyol stojol oy ta xch'ulna ti Diose, ti oy ta snae, xchi'uc ti oy ta sna ti banquilaletique, yo' jech ta xac'be ta sventa patan ti ajvalil yu'un Asiriae, mi ja'uc jutebuc laj sta coltael ti jech laj spase.

²²Manchuc mi tsots xa batem ti vocol staoje, staoj yav yanijem yo'nton ta stojol ti Diose. ¡Ja' jech o stalel ma' ti ajvalil Acaz une!

²³Laj yaq'uilan milbil matanaletic ta stojol diosetic yu'un ti Damascoe, ti ja' ta scoj ti tsalbil c'ote. Laj snop, mi coltabil ti ajvaliletic ta jteclum Asiria yu'un ti diosetic taje, ja' jech ta xcoltaat ec mi ta xac'be ti milbil matanale, ti c'alal ja' ta scoj ti tsalbil c'ote, xchi'uc ta scotol ti Israele.

²⁴Ti Acaze laj stsob scotol ti c'usitic ta xtun ta xch'ulna ti Diose. Lic xchichinan ta voq'uel un. Mac xut ti ti' ch'ulnae. Lic yac'anan ta meltsanel altaretic xtoc un ti ma'uc ta sventa Dios ta scotol xuc'avtac ta jteclum Jerusalene.

²⁵Ta scotol jteclum Judae, laj smeltsanan c'opojebaletic yo' jech ta xchic' pom ta sventa ti ma'uc diose. Jech laj sliquesbe sc'ac'al yo'nton ti Ajvalil Dios yu'un ti smolmuc'totac ta vo'nee.

²⁶Ti slo'il ya'yejale, xchi'uc ti c'usitic lic spas ta sliquebale, ti stsutsebe, ts'ibabil com ta jpoc svunal slo'il ya'yejal ajvaliletic yu'un ti Judae, xchi'uc ti Israele.

²⁷C'alal chame, laj smuquic ta Jerusalén bu mucul ti smolmuc'totac une. Mi ja'uc bat smuquic ta smucobbail ti ajvaliletic yu'un ti Israele. Ts'acal to un, ich'bat yabtel ta ajvalilal yu'un xnich'on ti Ezequías sbie.