Read Tzotzil 2 Crónicas 29 Bible Online

2 Crónicas 29 - Tzotzil bible

2 Crónicas 29

¹C'alal och ta ajvalilal ti Ezequiase, yich'oj xa vo'ob xcha'vinic (25) jabil. Baluneb xcha'vinic (29) jabil ech' ta ajvalilal ta Jerusalén un. Abi sbi ti sme'e, yantsil nich'on ti Zacariase.

²Ti c'usitic laj spas ti Ezequiase, lec laj yil ta sba ta sat ti Diose. Jech laj spas jech c'u cha'al laj spas scotol ti David ti smolmuc'tote.

³Taje, ja' ti buch'u laj xcha'meltsan xchi'uc laj sjambe sti' xch'ulna ti Diose, ti ta sliqueb u sba sjabilal yochel ta yabtele

⁴Ta jech yepal un, lic staan talel ta iq'uel ti paleetique, ti levitaetique. Laj svol ta tsobel ta tsoblebal ta stuq'uil ti yelov sloq'ueb c'ac'ale.

⁵Xi lic yalbe ya'iic une: “A'yio ava'iic, levitaetic: Poco tuso abaic avi tana li'e. Mesic tusic xch'ulna ti Ajvalil Dios yu'unic ti amolmuc'totic ta vo'nee. Loq'uesic talel ta ch'ulna scotol ti albil sc'oplal mu xtune.

⁶Yu'un ti jmolmuc'totic ta vo'nee, mu'yuc stuq'uil yo'ntonic ech'ic. Ti c'usitic laj spasique, mu lecuc laj yil ta sba ta sat ti Ajvalil Dios cu'untique. Laj sq'uej sbaic batel ta stojol un. Yan o bu laj yac' ech'el ti satique, ti laj sten laj sbajic ti bu nacal ti Dios une.

⁷Laj smacbeic ti ochebal sti'e. Laj stubbeic ti lamparaetic une. Laj yicta sbaic ta xchiq'uel ti pome, ta yaq'uel ti chic'bil matanal ta ch'ulna ta stojol Dios yu'un ti Israele.

⁸Jech o xal ti Diose ilin ta stojol ti Judae, xchi'uc ta stojol ti Jerusalene, ti c'ot ta stojol yu'un ti xbat xa ch'ulelal ta xi'el jech c'u cha'al ta xavilic ta aba ta asatic tana li'e.

⁹Jech o xal ec un, ti jtot jme'tique lajic ta milel ta yorail ti letoe. Chucbil batic ti jnich'nabtique, ti jtsebtique, ti cantsileltic une.

¹⁰Li' une, laj xa jnop ta jpas jtrate xchi'uc ti Ajvalile, Dios yu'un ti Israele, yo' jech ta x'ech' ti sc'ac'al yo'nton ta jtojoltique.

¹¹Jech ec un, jnich'nabtac, mu xalubtsajic, t'ujbiloxuc yu'un ma' ti Dios une yo' jech ta xavac' abaic ta tunel ti c'usi ta sc'an pasbele, ta yac'bel ti chic'bil pome.”

¹²Ti levitaetique ta jech yepal lic abtejicuc, ti xi s'elan xcholet ti sbiique: Ta sventa snitilultac ti Coate, ti Mahat xnich'on ti Amasaie, ti Joel xnich'on ti Azariase. Ta sventa snitilultac ti Merarie, ti Quis xnich'on ti Abdie, ti Azarías xnich'on ti Jehaeele. Ta sventa snitilultac ti Guersone, ti Joah xnich'on ti Zimae, ti Edene xnich'on ti Joahe.

¹³Ta sventa snitilultac ti Elizafane, ti Simrie, ti Jehiele. Ta sventa snitilultac ti Asafe, ti Zacariase, ti Mataniase.

¹⁴Ta sventa snitilultac ti Hemane, ti Jehiele, ti Simeie. Ta sventa snitilultac ti Jedutune, ti Semaiase, ti Uziele.

¹⁵Taje, scotolic ba'yel laj stsob ti yuts' yalalique, ti scotolic laj spoc stus sbaique. Ta jech yepal un, bat smesic stusic ti ch'ulna jech c'u cha'al albilic ono'ox mantal yu'un ti ajvalile, co'ol xchi'uc c'u s'elan yaloj smantal ti Diose.

¹⁶Ta ts'acal to un, ochic batel ti paleetic ta yut ti ch'ulnae yo' jech ta smesic ta stusic. Laj sloq'uesic talel ta yamaq'uil ch'ulna scotol ti c'usitic mu xtun laj staic ta yute, ti yich'ojic batel ti levitaetic ta uc'um Cedrone.

¹⁷Liquic ta smesel ta stusel ta sba c'ac'al yu'un ti sliqueb ue, ti c'otic xa ech'el ta yamaq'uil xch'ulna Dios ta xvaxaquibal (8) c'ac'al yu'un ti sliqueb ue. Laj to yich' ech'el vaxaquib (8) c'ac'al ti c'u to yepal sc'an mesel tusel ti ch'ulnae, ti tsuts xa yu'unic c'alal sta ti svaclajunebal (16) c'ac'al yu'un ti sliqueb ue.

¹⁸Ta ts'acal to un, xi bat yalbeic ya'i ti ajvalil Ezequías c'alal ochic batel ta snae: “Xi s'elan laj xa jmescutic jtuscutic scotol ma' ti ch'ulnae: ti altar scajleb xchic'obil matanale xchi'uc scotol ti c'usitic ta xtun yu'une, ti mexa ta xtun sventa scajleb pan ti tsots sc'oplal c'oteme.

¹⁹Ja' jech xtoc laj xa staan yav cu'uncutic xchi'uc laj xa jmes jtuscutic ti c'usitic laj sjipanan loq'uel ti Acaz ta scoj ti yanijem yo'nton ti c'u sjalil ochem ta yabtele, tsobol xa ta yaltar Dios tana li' une.”

²⁰Ti ajvalil Ezequías une, sob xa lic. Laj stsob talel ti j'abteletic yu'un ti jteclume, ti jmoj batic ta xch'ulna ti Dios une.

²¹Yic'ojic batel vuc-cot (7) ch'in vacax, vuc-cot (7) chij, vuc-cot (7) ch'in chij, xchi'uc vuc-cot (7) ch'in tentsun, ti c'ot ta matanaletic yu'un smulic ti c'u yepal oy yu'un ti ajvalile, ta sventa matanal yu'un ti ch'ulnae, ta sventa matanal yu'un ti Judae. Ti ajvalile laj yalbe mantal ti paleetic snitilultac ti Aarone, ti yaq'uicuc ta chic'bil matanal ta sba yaltar ti Diose.

²²Ti paleetic une laj smilic ti ch'in vacaxetique. Laj xch'ambeic xch'ich'el ti laj svajic ta altar taj une. Ta jech yepal un, jech lic spasbeic ti chije, ti ch'in chijetique.

²³Ta ts'acal to un, laj yiq'uic batel ta stojol ajvalil xchi'uc ta stojol jteclum ti ch'in tentsunetic sventa xch'ayobil ti mulile, ti laj scajan sc'obic ta sba chon bolom ti stuquic une.

²⁴Ti paleetic une lic smilic. Laj svajbeic ti xch'ich'el ta sba ti altare, ti c'ot ta matanal ta sventa ti mulile yo' jech ta xich' tabel ti ch'aybil ta xc'ot smul scotol ti Israele, yu'un laj ono'ox yal mantal ti ajvalile, ti yich'uc chiq'uel ti matanal ta sventa scotol ti Israele.

²⁵Ti Ezequías une lic sva'anan ta xch'ulna Dios levitaetic ta stijel ti set-set taq'uine, ti vobe, xchi'uc ti jchop o ta arpae, ti liquem comel yu'un ti David ti ac'bat sna' yu'un ti j'alc'op Natane, xchi'uc ti Gad yajtunel ajvalil ti jamal sba sate. Ti mantal taje, laj yac' comel ti Dios ta sventa ti yaj'alc'optaque.

²⁶Ti levitaetic une chapal xa va'alic xchi'uc ti c'usitic ep ta tos ta stijic ti c'otem ta yu'un ti Davide, ti chapal xa xchi'uc yoq'uesic ti paleetique.

²⁷Va'i ti ajvalil Ezequías une laj yal ti yich'uc chiq'uel ta sba altar ti matanale. C'alal yich' chiq'uel ti matanal une, lic ti q'uejimoletic sventa stoyel xi'el ti Diose. Xnic no'ox ti oq'uesetic yu'unique, ti stsac sba lec c'alal xlomet no'ox ti c'usitic ep ta tos stac' tijel ti liquem comel yu'un ti Davide.

²⁸C'alal xyaquet ta q'uejimol ti jq'uejojetique, ta yoq'uisanel oq'ues ti paleetique, scotol ti jteclume quejelic ta c'opojel ti'inel jech c'u cha'al tsots sc'oplal sc'an pasele. Ti c'u sjalil c'ot ta c'aq'uel ti matanale, ja' to jech laj yo'ntonic.

²⁹C'alal laj scotol une, jech ti ajvalile, xchi'uc ti c'u yepal ti xchi'iltaque, lic squejan sbaic ta c'opojel ti'inel jech c'u cha'al liqueme.

³⁰Ts'acal to un, ti ajvalil Ezequiase, xchi'uc ti j'abteletique, laj yalbeic ya'i mantal ti levitaetic ti yalbeicuc coliyal ti Dios ta sventa sq'uejimoltac ti Davide, xchi'uc ti j'alc'op Asafe. Xmuyubajic no'ox lic spasic, lic squejan sbaic ta c'opojel ti'inel jech c'u cha'al liqueme.

³¹Ta jech yepal, ti Ezequías une xi laj yalbe ya'i ti jteclume: “Li' tana une, chapaloxuc xa ta yajtunel ti Diose. Jech o xal, nopajanic talel, ich'ic talel ti matanaletic ti xich'uc milel ta sventa yalbel vocol yu'un xch'ulna ti Diose.” Va'i ti jteclum une laj yich'ic batel matanaletic ti ta xich' milel ta sventa col'albate. Laj yaq'uic chic'bil matanal ec ma' ti buch'utic loc' ayan ta yo'ntonic ti jech sc'an pasele.

³²Ti laj yaq'uic chon bolometic ti jteclum sventa ti chic'bil matanale, lajuneb xchanvinic (70) ta cot tot vacax, vo'vinic (100) ta cot chij, xchi'uc lajunvinic (200) ta cot ch'in chij. Scotol c'ot ta chic'bil matanal ta sventa smoton ti Diose.

³³Ta scotol ti chon bolometic laj yaq'uic ta matanale, vaquib ciento (600) ta cot ti vacaxe, oxmil (3,000) ta cot ti chije.

³⁴Ja'uc le' une, mu'yuc epic ti paleetique, mu xa jay loq'ueluc c'usi xut sbaic ta xcho'el ti chon bolometic sventa ta xich' chiq'uele. Coltaatic yu'un ti yan levitaetic ti svinquilel sbaic ta stsutsesel ti abtele. Lic smes stus sbaic ma' ti yan paleetic une. Ti levitaetique mu xch'ajeticuc laj smes stus sbaic, mu sta ti paleetique.

³⁵Ma'uc no'ox taje, yepal to ta j'ech'el ti matanaletic sc'an aq'uele, ti xepu'altac matanal yu'un lajesobil o'ntonal ti sc'an aq'uele, ti matanal vino sc'an aq'uele, ti jmoj ta x'och xchi'uc ti chic'bil matanaletique. Ti jech taje, c'ot ta pasel lic chapajuc yich'el ta muc' ti Dios ta xch'ulnae.

³⁶Ti Ezequías une, xchi'uc scotol ti jteclume, xmuyubajic no'ox yu'un Dios ti c'u s'elan laj spas ta stojol ti steclumale, ti mu sjaliluc c'ot ta pasel scotole.