Read Tzotzil 2 Crónicas 3 Bible Online

2 Crónicas 3 - Tzotzil bible

2 Crónicas 3

¹Ti Salomone lic sliquesbe smeltsanel xch'ulna ti Dios ta vits Moria ti oy ta Jerusalén ti bu laj yac' sba iluc ti Dios ta stojol ti David ja' ti stote, ta osil ti laj xchapanbe yavil ti David ta smajob trigo ti Ornán ti jebuseo xcaltique.

²Laj sliques abtel ta xchibal c'ac'al yu'un ti xchibal u ta xchanibal xa jabil stic'lej ta ajvalile.

³Ti sliqueb yoc ch'ulna ti laj sliques ta smeltsanel ti Salomone, xi s'elan sbisol jech c'u cha'al li'e: vucub xcha'vinic (27) metro ti snatile, baluneb (9) metro ti sjamleje.

⁴Yamaq'uil sti' ti ch'ulna ta yelovale, yich'oj baluneb (9) metro ti snatile. Co'ol sjamlej yich'oj jech c'u cha'al ti ch'ulnae, jech c'u cha'al ti staylej yich'oj baluneb (9) metroe. Ti Salomone laj sbon lec ta naca lequil oro yamaq'uil ochebal yu'un ti ch'ulnae.

⁵Naca pechajtic tojal tenel-te' laj spac'be ti ta yutile, xchi'uc laj sbon lec ta bats'i oro. Laj sloc'ta ta ch'alel ta sloc'obbail xanetic, xchi'uc sloc'obbail carinaetic.

⁶Laj xnichimtas ta c'upil sba bax tonetic. Spajeb xa no'ox yutsil ti oro laj yich' tunesele.

⁷Xi s'elan laj sbon ta oro scotol yut ti ch'ulnae: ti ts'am-te'etique, ti scaj ti'naetique, ti pac'baletique, xchi'uc ti ti'naetique. Laj sloc'taan ta loc'tael ta pac'bal na ti c'usi oy xiq'uique.

⁸Ta yut ti ch'ulnae, laj xcha'c'alta ta meltsanel bu ta xcom ti Bats'i Cuxul Ch'ul Cuartoe, ti yich'oj baluneb (9) metro ti snatile, co'ol sjamlej jech c'u cha'al ti ch'ulna ti yich'oj baluneb (9) metro ti sjamleje. Ta jech yepal un, lic sbon ta bats'i lequil oro, ti jutuc mu laj yich' jtob ta mil (20,000) kilo ti oroe.

⁹Yalal ti jujun lauxetique, x'ech' jutuc ta o'lol kilo. Laj yich' bonel ta oro xtoc c'u sjamalul yut ta xcha'cojal na.

¹⁰Ti bu oy ti Bats'i Cuxul Ch'ul Cuartoe, laj yac' ta luchel ta loc'tael chib ti c'usi oy xiq'uique ti laj yich' bonel lec ta oroe.

¹¹Ti c'u sjamlej smacoj xic' ti c'usitic oy xiq'ue, yich'oj baluneb (9) metro. Ti jun xiq'ue yich'oj buluch-ch'ix xchi'uc oxbej c'ob (2.25 m.) ti snatile, ti tijil c'otem ta spac'balil yut nae. Ja' no'ox jech snatil yich'oj ti jun xiq'ue, ti snupoj sba c'otel xchi'uc sba xic' ti jun oy xiq'ue.

¹²Mu yanuc snatil xic' ti june, co'ol snatil ti tijil c'otem ta pac'bal nae. Ti jun xiq'ue co'ol snatil ec, ti snupoj sba c'otel sba xic' xchi'uc ti june.

¹³Smacoj baluneb (9) metro ta scotol ti c'usi oy xiq'uique. Va'alic lec, xchi'uc yac'oj yalel satic ta stuq'uil o'lol ti yut nae.

¹⁴Laj smeltsan xtoc lich'-lich' muc' ta poc' ti yax'elantic sba stsajale, ti yax'elan sbae, xchi'uc ti saquil poq'ue, ti laj sloc'taic ta luchel ti c'usitic oy xiq'ue.

¹⁵Ti Salomone laj smeltsan chib ti c'usi balajtic va'anbil muyele, ti yich'oj nan vaclajuneb (16) metro ti snatile, ti va'al muyel ta yeloval ti ch'ulnae, ti yich'oj buluch-ch'ix xchi'uc oxc'ob (2.25 m.) volol ti xnichimal sjole.

¹⁶Laj smeltsan xtoc scarinailtac co'ol s'elan uil ti laj sjoc'anan ta toyol yu'un ti c'usi balajtic va'anbil muyele. Laj xch'al ta loc'tael vo'vinic (100) ta bej xnich' granada ti laj stsoyanan ta carinae.

¹⁷Ti chib balajtic va'anbil muyel ta yeloval ti ch'ulnae, jun laj yac' ta stuq'uil bats'i c'ob, jun laj yac' ta stuq'uil ts'et c'ob. Ti jun ti va'al muyel ta stuq'uil bats'i c'obe, Jaquín laj yac'be sbi. Ti jun va'al muyel ta stuq'uil ts'et cobe, Boaz laj yac'be sbi.