Read Tzotzil 2 Crónicas 30 Bible Online

2 Crónicas 30 - Tzotzil bible

2 Crónicas 30

¹Ti Ezequiase laj stac batel mantal ta sjunlej ti Israele, xchi'uc ta stojol ti Judae, xchi'uc laj stac batel vunetic xtoc ta stojol ti Efraine, xchi'uc ta stojol ti Manasese yo' ta xalbe ya'i ti talicuc ta xch'ulna ti Dios ta Jerusalén ta spasel q'uin Colebal yu'un ti Ajvalil Dios yu'un ti Israele.

²C'alal laj xa yich'be ye ti yaj'opisialtaque, xchi'uc scotol ti jteclum Jerusalén ti ajvalile, ta ts'acal to un, laj snop ti ta spas sq'uinal Colebal ta xchibal ue.

³Mu'yuc xc'ot ta spasel ta yorail no'ox ti q'uine, ja' ti mu'yuc ep ti paleetic ti laj smes stus sbaique. Mi ja'uc laj stsob sbaic ti jnaclejetic ta Jerusalene.

⁴Ti ajvalil une, xchi'uc ti jteclume, lec laj ya'iic ti va'i s'elan c'ot ta nopel yu'unique.

⁵Nop yu'unic un ti spucbeicuc batel sc'oplal ta sjunul Israele, ti c'otuc to c'alal Beersebae, xchi'uc c'alal to Dan, ti ic'bilic ta Jerusalén ta spasel q'uin Colebal yu'un ti Ajvalil Dios yu'un ti Israele. Vo'ne xa mu sta jech muc'ul tsobolej ta spasic jech c'u cha'al albil sc'oplal avie.

⁶Loq'uic ech'el ti j'al-mantaletic ta sjunul Israel une, xchi'uc ta sjunul ti Judae, ti yich'ojbeic batel vunetic yu'un ti ajvalile, xchi'uc ti yaj'opisialtac ti xi ta xal smantal ti ajvalile: “Israeletic, sutanic talel ta stojol ti Ajvalile, Dios yu'un ti Abrahame, ti Isaaque, ti Israele. Jech ta xlic sventainoxuc ti stuc une, ja' ti c'u avepalic ti mu'yuc lajemoxuc ta milel yu'un ti ajvaliletic ta Asiriae.

⁷Mu jechuc xapasic ec jech c'u cha'al laj spasic ti amolmuc'totique, ti avinquilelique, ti yan yo'ntonic ta stojol ti Ajvalil Dios yu'un ti amolmuc'totic ta vo'nee, ti tubbat sc'oplalic yu'une jech c'u cha'al ta xavilic tana li'e.

⁸Mu xats'acliic ta spasel ti toj toyobbaoxuc jech c'u cha'al laj spasic ti amolmuc'totique. Nubo avoc ac'obic ta stojol ti Ajvalile. La'ic ta xch'ulna ti c'otem ta yu'un sbatel osile. Tunanic yu'un ti Ajvalil Dios avu'unique. Jech ta xicta ti ilinem ta atojolic une.

⁹Mi ta xasutic talel ta stojol ti Dios une, ti avajcontraic tana li' ti stsacoj ta chuquel ti avinquilelique, ti anich'nabique, ta xlic ayanuc syail xc'uxul yo'nton ta stojol. Jech ta xac' ye ti suticuc ech'el ta slumalique. Yu'un ti Ajvalil Dios avu'unique oy stuq'uil yutsil yo'nton, sna' xc'uxubinvan. Mu xasjipoxuc stenoxuc comel mi ta xasutic talel ta stojole.”

¹⁰Ti j'al-mantal j'ich'-c'op une lic xanabicuc ta yalel mantal ta steclumal Efraine, xchi'uc steclumal ti Manasese, ti yalel muyel ta jujun jteclumetic ti c'otic c'alal to jteclum Zabulóne. Ja'uc le' une, tse'intabilic, na'lebilic yu'un ti jteclume.

¹¹Manchuc mi jech un, oy jlom jnaclejetic snitilultac ti Asere, ti Manasese, xchi'uc ti Zabulone, laj sbic'tajes sbaic ta stojol ti Diose, batic ta Jerusalén.

¹²Ti Dios eque laj stijbe yo'nton ti jnaclejetic ta Judae, ti ta xch'unbe smantal ti ajvalile, xchi'uc ti yaj'opisialtac ti albilic yu'un ti Dios ti jech laj yalique.

¹³Sbuset no'ox yepal ta j'ech'el un, lic stsob sbaic ti jnaclejetic ta xchibal u ta Jerusalén ta spasel q'uin pan ti ch'abal yich'oj ti spajubtasobile.

¹⁴Ochic ta stenel loq'uel scotol ti yan altaretique, xchi'uc yavil ti chic'obil pom ta Jerusalene. Bat sjipic ta uc'um Cedrón.

¹⁵Ta xchanlajunebal (14) c'ac'al yu'un ti xchibal ue, laj smilic ti chij sventa q'uin Colel une. Calal laj yilic ti paleetic xchi'uc ti levitaetic ti ma'uc pocbil tusbilique, lic q'uexavicuc. Jech o xal lic spoc stus sbaic. Va'i un, laj yiq'uic talel chon bolometic ta xch'ulna Dios sventa ta xaq'uic ta chiq'uel.

¹⁶Ta jech yepal un, lic sventainic yabtelic jech c'u cha'al yaloj smantal ti Moisés ti yajtunel Diose. Ti paleetique laj svajic ti ch'ich' ti ta x'ac'batic jelavel yu'un ti levitaetique.

¹⁷Ti yepal to mu'yuc spocoj stusoj sbaic ti jteclume, ti levitaetique tsots sc'oplal laj smilic chon bolometic ta scoj scotolic ti buch'utic mu'yuc spocoj stusoj sbaic ta sventa q'uin Colele, yo' jech ventainbil ta xc'otic yu'un Dios ti chon bolometique.

¹⁸Yepal ono'ox jnaclejetic yu'un ti Efraine, ti Manasese, ti Isacare, xchi'uc ti Zabulone, lic chi'invanicuc ta ve'el ta sventa ti q'uin Colele, ti mu xco'olaj jech c'u cha'al albil ti sc'oplale, yu'un mu'yuc spocoj stusoj sbaic. Ja'uc ti Ezequías une c'opoj ti'in ta sventaic ti xi laj yale: “Ti atalel oy yutsil slequilal avo'ntone, Dios, ch'aybo smul scolo' scotolic ti buch'u ta sjunul yo'ntonic ta sa'ote.

¹⁹Le' une, Ch'ul Ajvalil, Diosot yu'un ti smolmuc'totic ta vo'nee, ch'aybo smul scolo', manchuc mi mu'yuc laj spasic jech c'u cha'al liquem ta poquel tusel ta sventa ti ch'ulnae.”

²⁰Ti Diose laj ya'ibe sc'opojel sti'inel ti Ezequiase. Laj xch'aybe smul scolo' ti jteclume.

²¹Vucub c'ac'al (7) sjalil un, xmuyubajic no'ox ta j'ech'el oyic ta Jerusalén ti israeletic ta spasbel q'uin c'alal ta xich' ve'el pan ti ch'abal yich'oj spajubtasobile. Stuc xa no'ox jech xlomet yu'unic ti ep ta tos ch'ul músicaetic ti xlic xcaj stoyel xi'el Dios yu'unic jujun c'ac'al ti paleetique, xchi'uc ti levitaetique.

²²Ti Ezequías une laj smuq'uibtasbe yo'nton scotol ti levitaetique, ti laj yaq'uic ta ilel ti sjunul yo'ntonic ta xac' sbaic ta tunel yu'un ti Diose. C'alal chi'invan xa ta ve'el ti vucub (7) c'ac'al sjalil une, ti laj xa yac' matanal yu'un ti lajesobil o'ntonale, ti laj xa smuyubta ta yalbel slequil yutsilal ti Ajvalil Dios yu'unic ti smolmuc'totic ta vo'nee,

²³laj snopic ma' ti jteclum une, ti ta to sjaliltasic vucub (7) c'ac'al ti q'uine. C'ot ta pasel ti xmuyubajic no'ox yu'une.

²⁴Yu'un ti Ezequías ajvalil yu'un ti Judae laj sq'uelanbe lajuneb ciento (1,000) ta cot ch'in vacax, xchi'uc vucmil (7,000) ta cot chij ti jteclum ti oyic ta tsobleje. Jech ec ti j'opisialetique laj sq'uelanic lajuneb ciento (1,000) ta cot ch'in vacax, xchi'uc lajunmil (10,000) ta cot chij ta sventa ti jteclume. Yepal paleetic laj spoc stus sbaic.

²⁵Xmuyubajic no'ox scotol ti jnaclejetic yu'un Judae. Xmuyubajic ec ti paleetique, ti levitaetique, xchi'uc scotol ti c'u yepal liquemic talel ta Israele, xchi'uc ti jyanlumetic ti liquemic talel ta sjunul ti Israele, xchi'uc ti nacalic ta Judae.

²⁶Bats'i mu no'ox albajuc yutsil ech' yu'unic ta j'ech'el ta Jerusalene. Sba to velta ti jech c'ot ta pasel. Ti c'alal tiq'uil ta ajvalilal ti Salomón xnich'on ti Davide, ajvalil yu'un xtoc ti Israele, mu'yuc jech xc'ot o ta pasel ta Jerusalén.

²⁷Ta ts'acal to un, ti paleetique, ti levitaetique, lic va'licuc yo' ta xac'beic yich' slequilal Dios ti jteclume, ti tsacbat ich'batic sc'opic yu'un ti Diose. C'ot c'alal to vinajel ti bu nacal ti ch'ul Diose.