Read Tzotzil 2 Crónicas 31 Bible Online

2 Crónicas 31 - Tzotzil bible

2 Crónicas 31

¹C'alal tsuts scotol taj une, scotol ti c'u yepal oyic ti israeletic ech' yu'unic ti bu taje, batic ta jteclumetic yu'un Judá, bat slilinic ta voq'uel ti loc'obbailetic ti pasbil ta tone, bat slilinic ta voq'uel sloc'obbail ti Aserae. Laj sjinesic ti c'opojebaletic ti oy ta toyol vitstique. Tsuts yu'unic ta slilinel scotol ti oy ta yosilal Judae, ta yosilal ti Benjamine, ta yosilal ti Efraine, xchi'uc ta yosilal ti Manasese. Ta jech yepal un, sutic ech'el scotol ti israeletic ta yosilal jujun ti bu slumalique.

²Ts'acal to ti Ezequías une laj yac'anbe sbain stunelic ti paleetique, ti levitaetic ti c'u s'elan ta x'ech'ic ta jujuchop ta sventa ti yabtelique, ta yaq'uel ti chic'bil matanaletique, ti matanal sventa ti lajesobil o'ntonale, ta yalel ti lequilale, xchi'uc ti yalicuc coliyal ti Diose, ti tunicuc ta sti'tac ti ch'ulnae.

³Ma'uc no'ox taje, ti c'usitic x'ayan yu'un ti ajvalile, laj scolta sba ta sloq'ues ti matanaletic ta xich' chiq'uel ta sobe, ta xich' chiq'uel ta mal c'ac'ale, ti matanaletic ta xich' chiq'uel ta sc'ac'alil cuxob o'ntonale, ta sq'uinal ti jujun ach' ue, ti yan q'uinetic tsots sc'oplal ta xich' pasele, jech c'u cha'al ts'ibabil ta jbel ti oy c'usi tsots albil yu'un ti Diose.

⁴Laj yalbe ya'i xtoc ti jnaclejetic nacalic ta Jerusalene, ti yac'beicuc ti paleetique, xchi'uc ti levitaetic ti patanil ta xaq'uic jujune, yo' jech ta xc'ot ta pasel yu'unic scotol ti oy jbel c'usi tsots yaloj ti Diose.

⁵C'alal puc batel ti mantal une, ti israeletique, ta sjunul yo'ntonic, laj yaq'uic ti t'ujbil lequil trigoe, ti vinoe, ti aceitee, ti ajapome, xchi'uc scotol ti c'usitic xloc' x'ayan yu'unic ta yosilique. Yepal no'ox ta j'ech'el laj yaq'uic ti jun ta jujun lajlajuneb ti c'usitic xloc' x'ayan yu'unique.

⁶Ti jnaclejetic yu'un Israel ti nacajtic ta yan jteclumetic yu'un Judae, laj yaq'uic ec ti jun ta jujun lajlajuncot vacaxe, ti yan chon bolometique, xchi'uc yan ti c'otem ta yu'un ti Ajvalil Dios yu'unique. Scotol, sbusul bus ta xaq'uic.

⁷C'alal loc' ti yoxibal (3) ue, liquic ta xch'aquel ti jujubus ta jujutose, yich'ojic o c'ot c'alal sta ti yucubal (7) ue.

⁸Ti Ezequías une, xchi'uc ti j'opisialetic ti c'alal bat sq'uelic c'u xa yepal oy ti c'usitic busanbile, laj yalbeic vocol ti Diose, xchi'uc ti jteclum Israele.

⁹Va'i un, ti Ezequiase laj sjac'be ti paleetique, xchi'uc ti levitaetic ti cholbatuc ya'i c'u s'elan oy ta sventa ti jujubus taje.

¹⁰Ti banquilal pale Azarías snitilul ti Sadoque, xi laj staq'ue: “Lic ono'ox talel yu'unic ti c'alal lic yich' aq'uel ti patanil ta sventa ti ch'ulnae. Yepal ma' ti c'usitic ta jtun ta jlajescutic avi tana li' une, ti ta xcom scomelale. Ti vi yepal scomelal le'e, sva'anoj sba ti Dios ta stojol ti steclumal une.”

¹¹Ti jech taj une, laj yal mantal ti Ezequiase ti yich'uc pasbel snail ta xch'ulna ti Diose.

¹²C'alal tsutsem xa une, lic stiq'uic ochel ti patanile, ti jun ta jujun lajlajunebe, xchi'uc ti sbusul bus laj yaq'uic ta sventa ti Diose. Ta sbainel scotol taje, ja' com yu'unic ta banquilal ti levita Conanías sbie. Ti xchi'inel sbaic ta sbainele, ja' com ti Simei ti xchi'il no'ox sbaic ta voq'uele.

¹³Ti jcoltavanejetic ti bainbilic yu'un ti Conaniase, xchi'uc ti xchi'il ta voq'uel ti Simei sbie, xi s'elan xcholet va'anatic yu'un ti ajvalil Ezequiase, xchi'uc ti Azarías banquilal jtunel ta xch'ulna ti Diose: ti Jehiele, ti Azariase, ti Nahate, ti Asaele, ti Jerimote, ti Jozabade, ti Eliele, ti Ismaquiase, ti Mahate, xchi'uc ti Benaiae.

¹⁴Ti jchabiej ti'na ti oy ta yelov sloq'ueb c'ac'ale, ja' sbainoj com ti levita vinic ti sbiinoj Coré xnich'on ti Imnae, ti sbainoj to ox ta stsobel ti matanal ti ta xloc' x'ayan ta o'ntonal ta yac'bel ti Diose, ta xch'aquel ti patanil ti ac'bil ta sventa ti Diose, ta spuquel ti matanaletic ti c'otem ta sventa ti Diose.

¹⁵Ti yajcoltaobbatac ti Coré ti yac'oj yo'ntonic ta xtunic ta steclumaltac ti paleetique, ja' ti Edene, ti Miniamine, ti Jesuse, ti Semaiase, ti Amariase, xchi'uc ti Secaniase. Ti paleetic taje sbainojic ta xch'aquel ti ve'lil ta stojol ti svinquileltac ti svoc'ol-voc' xquechet ta xch'acbe ti c'u yepal ta jujuchope.

¹⁶Laj yac'beic scotolic ti bu sbainoj yabtelic ta x'ech'ic jujun c'ac'al ta ch'ulnae, ti c'u s'elan xcholet ta x'ech'ic bu ta xc'ot yorail ta yabtelique, ti ojtiquinbil ti tsacal sbiic ec scotol ti yich'oj oxib (3) jabile xchi'uc ti x'ech' xa batele.

¹⁷Ti paleetique, ta jujuchop tsacal ta vun ti sbiique. Jech ec bejel ta vun sbiic ti levitaetic ti buch'utic yich'oj jtob (20) jabile, xchi'uc ti x'ech' batele, ti bu ta xtunique, xchi'uc c'u s'elan ti xcholet ta x'ech'ique.

¹⁸Ti bejel ta vun ti biile, ochem ta venta scotol ti bic'tal ololetique, ti yajniltaquique, ti squerem nich'nabique, ti yantsil nich'nabique, sbejel ta na ma' ti lec ta alele. C'ot ta o'ntonal ti laj yich' yabtel ti c'ot ta yajtunel ti Diose.

¹⁹Ta scotol ti jteclume, va'anbil viniquetic ta xch'aquel ti c'usitic ta xtun yu'un scotol ti paleetic snitilultac ti Aarone, xchi'uc scotol ti levitaetic ti bejel ta vun sbiic ti nacalic ta yosilal sve'eb ti vacax ti oy ta jteclumetic yu'un ti paleetique.

²⁰Jech laj spas ta scotol jteclum Judá ti Ezequiase. Scotol ti c'usi laj spas ti Ezequiase, oy stuq'uil, oy smelol, lec laj yil ta sba ta sat ti Ajvalil Dios yu'une.

²¹Scotol ti va'i s'elan laj sliques ti jtuneletic ta xch'ulna ti Diose, xchi'uc ti oy c'usi jbel tsots albile, xchi'uc ti mantaletique, lic spas ta sjunul sjol yo'nton laj sa' ti Diose. Jech lec c'ot ta loq'uel xchi'uc un.