Read Tzotzil 2 Crónicas 32 Bible Online

2 Crónicas 32 - Tzotzil bible

2 Crónicas 32

¹C'alal ech' ti va'i s'elan taje, ti naca xa ox ta xvinaj bu c'alal c'otem ti yutsilal slequilal o'ntonal yu'une, ja' o vul ta loq'uel ti Senaquerib ajvalil yu'un ti Asiriae, ti laj sbec' ta u'ninel ti jteclum Judae. Laj yac'be smacal ti pojobbail jteclumetic ti batem ta yo'nton ta yu'ninele.

²Ti jech laj yil ti Ezequiase, ti sjunul yo'nton ta sbec' ya'i ta u'ninel Jerusalén ti Senaqueribe,

³lic yich'be ye sti' ti banquilal jtuneletic yu'une, ti svinictac ti mu sna' xi'ique, ti yich'uc but'iel ti sat vo' ti oy ta loq'uebal yu'un ti jteclume. Lec laj ya'iic ti jech laj snope.

⁴Va'i un, laj stsob sbaic talel epal jnaclejetic ta sbut'iel scotol ti sat vo'etique, xchi'uc ti bu ta xtuc ti uc'um ta x'ech' ta yut banomile, yo' jech vocol xa sa'el vo' c'alal xc'ot ti ajvalil yu'un ti Asiriae.

⁵Ti Ezequías une mu xi'etuc yo'nton lic xcha'meltsanan ti moquetique. Laj smeltsan luchlebaletic ta sba ti moquetique. Ma'uc no'ox taje, lic yac'be yip ti but'bil lum ta Slumal ti Davide. Yepal no'ox laj yac'anan ta meltsanel lanzaetic, xchi'uc macobbailetic.

⁶Lic sva'anan yaj'opisialtac ta spasel ta mantal ti jteclume, ti laj stsob ta stenlejal sti' ti jteclume, ti xi laj yalbe ta stsatsubtasbel yo'ntonique:

⁷“¡Tsotsanic, oyuc yipal avu'unic! Mu xatsiq'ues avo'ntonic. Mi ja'uc xaxi'ic yu'un ti ajvalil Asiriae, xchi'uc ti epal soldado xchi'uc talel yu'une. Oy to jun ma' ti jelavem xu' yu'un ta xispojotique.

⁸Ti stuque, ja' yip yo'nton xchi'uc ti viniquetic xchi'inojan talele. Ja'uc ti vo'otique, ja' yipal cu'untic ti Ajvalil Dios ta scoltaelotic ta letovajele.” C'alal laj ya'iic ti va'i s'elan laj yal ti ajvalil Ezequiase, ti jteclume laj yich' yip ti yo'ntonic xchi'uque.

⁹Ts'acal to un, ti Senaquerib ajvalil yu'un Asiriae, c'alal xyaquet xa ta stsac ta leto ti jteclum Laquis xchi'uc ti yajsoldadotaque, laj stac batel yaj'opisialtac ta Jerusalén ti xi xcholet ta xalbeic ti Ezequías ajvalil yu'un ti jteclum Judae, xchi'uc scotol ti jnaclejetic oyic ta Jerusalene:

¹⁰“Ti Senaquerib ajvalil yu'un ti Asiriae, xi ta xal ti laj stacbot talel ti mantale: ‘¿C'u la cha'al ti jun avo'ntonic oyoxuc ta Jerusalén ti c'alal joyobtabil xae?

¹¹Mi ta xalboxuc ti Ezequías ti xu' yu'un ta spojoxuc loq'uel ta coc ta jc'ob ti Ajvalil Dios yu'une, ta xaslo'laoxuc. Ja' no'ox ta xilboxuc avocolic ti ta xachamic ta vi'nale, ta taqui ti'ile.

¹²¿Mi mu ja'uc ti Ezequías cha'e ti laj slilin ti toyol c'opojebaletique, xchi'uc laj slilinbe xchic'obil spom yaltaril scajleb smoton ti diosetique, ti laj yalbe ya'i jnaclejetic yu'un Judá xchi'uc Israel ti junuc no'ox altar yich'uc ac'bel matanal chic'bil pom yo' ta xich'ic ta muq'ue?

¹³¿Mi mu xa ono'ox xana'ic xcal le' une, ti vu'un xchi'uc ti jmolmuc'totac ti laj ech'uc ta vo'nee, ti c'u s'elan laj jpascutic talel ta jteclumetic yu'un ti yan muc'tiquil lume? ¿Mi cuch yu'unic ti diosetic ta spojel ta coc ta jc'obcutic ti jteclumetic taje?

¹⁴¿Bu xa ono'ox junucal ti diosetic ti cuch yu'unic ta spojel ta coc ta jc'obcutic ti jteclumetic taje, ti laj slilinic ti jmolmuc'totcutic ta vo'nee? ¿C'u cha'al la ta xanopic ti xu' ta spojoxuc ti Dios avu'unique?

¹⁵Ja'uc le' un cha'e, mu xavac' abaic ta lo'lael, ta xch'unbel sc'op ti Ezequiase. Mu tac'aluc xc'ot avu'unic. Mi junuc diosetic ta xcuch yu'un ta spojel ti steclumal ta coc jc'obcutique, ti poj yu'un ta yoc ta sc'obic ti jmolmuc'totcutic laj ech'icuc ta vo'nee. ¡Bu xa la ba cuchuc yu'un spojeloxuc ta coc ta jc'obcutic ti Dios avu'unique!’ ”

¹⁶Ma'uc no'ox taje, x'ech' to laj yalic yaj'opisialtac ti ajvalil yu'un Asiria ta scontrainel ti Dios ti ja' Ajvalile, ta scontrainel ti Ezequías yajtunele.

¹⁷Ti Senaqueribe xi laj yal batel ti laj sts'iba ta vun ta scontrainel ti Ajvalil Dios yu'un ti Israele: “Jech c'u cha'al diosetic yu'un ti yan muc'tiquil lum ti mu'yuc xu' yu'un ta spojel ti steclumale, ja' jech ti Dios yu'un ti Ezequiase mi ja'uc xu' ta spoj ta coc ta jc'ob ti slumale.”

¹⁸Yaj'opisialtac ti Senaqueribe satilaluc xa yu'unic ta sq'uelel batel ti jnaclejetic ta Jerusalén ti oyic ta ba moque, ti tsots avanic ta hebreo c'op ta sibtasvaneje, ta stsiq'uesbel yo'ntonic, yo' jech ta xu'ninic ti jteclume.

¹⁹Laj sbisic no'ox Dios yu'un ti Jerusalene jech c'u cha'al diosetic yu'un ti muc'tiquil lum ta banomile, yabtel no'ox viniquetic ti diosetic taje.

²⁰Ti jech taj une, ti ajvalil Ezequiase, ti j'alc'op Isaías xnich'on ti Amose, lic c'opoj ti'inicuc ta sc'anel talel coltael c'alal to vinajel.

²¹Va'i ti Dios une laj stac talel yaj'ánjel ta stsutsesel scotol ti soldadoetique, ti banquilal soldadoetique, ti its'inal banquilal soldadoetic ti oyic ta axibal na yu'un ti ajvalil Asiriae, ti nijil chimil xa ta xq'uexlal sut ech'el ta slumale. C'alal och ech'el ta xch'ulna ti sdiostaque, mile yu'un ti xnich'nab ti bu taje.

²²Jech c'ot ta pasel un, ti pojatic yu'un Dios ti Ezequiase, xchi'uc ti jnaclejetic ta Jerusalene ta yoc ta sc'ob ti Senaquerib ti ajvalil yu'un Asiriae, xchi'uc ta yoc ta sc'ob ti yane, ti lamajesbatic c'op xchi'uc ti yan jteclumetic sts'aquinoj sbaique.

²³Va'i un, yepal no'ox oy buch'u laj yich'ic batel matanal ta stojol ti Dios ta Jerusalene, xchi'uc matanaletic toyol stojol laj yich'ic batel ta stojol ti Ezequías ajvalil yu'un ti Judae. Lic un, ti mu albajuc puc ech'el sc'oplal ta stojol ti yan muc'tiquil lum une.

²⁴Ti jech yorail ta vo'ne taje, tsots tsaque ta chamel ti Ezequiase. Lic c'opoj ti'inuc ta stojol ti Dios une. Ch'ayal c'ot o'ntonal yu'un yutsil ti c'u s'elan tac'bat sutel talele.

²⁵Ti jech c'uxubinel laj stae, mu'yuc laj snijan xchiman sba ti Ezequiase. C'ajomal no'ox lic stoy sba xchi'uc ta j'ech'el. Ilin ti Dios ta stojol une, xchi'uc ta stojol ti Judae, ti Jerusalene.

²⁶Manchuc mi jech ti toyobba une, ti Ezequiase laj sbic'tajes sba ta stojol ti Diose. Jech laj spasic ec ti jnaclejetic yu'un Jerusalene. Jech mu'yuc laj sloq'ues sc'ac'al yo'nton ti Dios ta stojolic ti c'alal cuxul to ox ti Ezequiase.

²⁷Yepal sc'ulejal laj sc'upinan, xchi'uc laj sta ich'bil ta muc' ti Ezequiase. Yepal no'ox ti oro, ti platae, ti c'upil sba tonetique, ti muil poxiletique, ti macobbailetique, xchi'uc yan ti c'usitic toyol stojole.

²⁸Laj smeltsan xtoc naetic sq'uejobil ti jchop o ta trigoe, ti vinoe, ti aceitee, xchi'uc snail ep ta tos chon bolometic, xchi'uc scorral chijetic.

²⁹Laj sliquesan ta sva'anel jteclumetic xtoc, yepal no'ox ti vacaxe, xchi'uc ti chij yu'une, ti ac'bat sta slequilal yutsilal yu'un ti Diose

³⁰Ti Ezequiase, ja' ti buch'u laj yal mantal ti yich'uc q'uejanbel yoquinab vo' ta x'oquin loq'uel ta yac'ol Gihone, ti laj spolbe yalel yoc ta yolon stuq'uil smaleb c'ac'al ta Steclumal ti Davide. Scotol ti c'usitic laj spas ti Ezequías une, lec c'ot ta loq'uel yu'un.

³¹C'ot ta pasel un, ti Diose laj xch'ac sba loq'uel ta stojol ti Ezequiase yo' jech ta sna'be yo'nton c'u s'elan ta snop c'alal ta xc'otic yaj'opisialtac ti ajvalil yu'un ta Babiloniae, ti jech ta xvu'lanat ta xjaq'uilanbat ti c'usitic ch'ayal c'ot o'ntonal yu'un ta Judae.

³²Ti slo'il ya'yejal ti Ezequiase, xchi'uc ti lequil abtel laj spase, bejel com ta jpoc svunal ti bu ts'ibabil ti c'usitic ac'bat yil ti j'alc'op Isaías xnich'on ti Amose, xchi'uc ta jpoc svunal bu ts'ibabil slo'il ya'yejal ti ajvaliletic yu'un ti Judae, xchi'uc ti Israele.

³³C'alal cham ti Ezequiase, laj smuquic ta yac'ol smuquinal smucobbail ti David xchi'uc ti yalab xnich'nabe. Scotol jnaclejetic yu'un ti Judae, xchi'uc jnaclejetic yu'un ti Jerusalene, lic spasbeic yich'el ta muc'. Lic ich'batuc yabtel ta ajvalilal yu'un xnich'on ti Manasés sbi une.