Read Tzotzil 2 Crónicas 33 Bible Online

2 Crónicas 33 - Tzotzil bible

2 Crónicas 33

¹C'alal lic ochuc ta ajvalilal ti Manasese, yich'oj to no'ox lajcheb (12) jabil. Laj sventain vo'lajuneb yoxvinic (55) jabil ti Jerusalene.

²Ti c'usitic lic spas une, mu lecuc laj yil ta sba ta sat ti Diose, xi s'elan lic spas jech c'u cha'al ti muc'tiquil jteclumetic ti spajebal o chopole, ti yilojic ta sba ta satic ti israeletic ti tenatic loq'uel yu'un ti Diose:

³Lic xcha'va'anan c'opojebaletic ti laj sjinesan ti Ezequías ti ja' stote. Lic xcha'va'anan altar sventa sloc'obbail ti Baale, ta xcha'loc'tael xq'uexol ti Aserae. Lic snijan xchiman sba ta yich'el ta muc' c'usitic ti ep ta tos xojoban ta vinajele.

⁴Laj sva'anan altaretic xtoc ta xch'ulna Dios ti albil sc'oplal yu'un Dios ti comem o ta xch'ulna sbatel osil ta Jerusalene.

⁵Ta xchibal yamaq'uil xch'ulna ti Diose, laj sva'anan yan altaretic sventa yich'el ta muc' ti c'usitic ep ta tos xojoban ta vinajele.

⁶Ma'uc no'ox taj une, laj yac' ta chiq'uel xnich'nab ta sventa matanal ta stenlejal yu'un Ben-himone. Lic xchan sc'oponel sti'inel ti ch'ulelale, ta xchanel sc'oplal ti jt'unvaneje, ta xchanel sc'oponel sti'inel ti pucuje. Laj yac' ye sti' ti ayanuc ti jt'unvanejetique, ti j'ac'-chameletique. Ech'em no'ox chopol ta j'ech'el ti c'usitic laj spas ta sba ta sat ti Diose, ti c'ot ta pasel ti lic ilinuc ti Dios yu'une.

⁷Ja' jech xtoc laj sva'an ta xch'ulna Dios ti loc'obbail laj yac' ta meltsanele, c'alal xi albat sc'oplal yu'un Dios ti Davide, xchi'uc ti xnich'on ti Salomón sbie: “Ti ch'ulna li' ta Jerusalene, ti laj jt'uj ta scotol yosilal ti jayvoc' Israele, c'ot ta yavil ti bu ta xi'ich'at ta muc' sbatel osile.

⁸Mi ja'uc xa ta jten loq'uel ta osil ti israeletic ti bu laj cac' nacliicuc ti smolmuc'totique, mi ta xc'ot ta xch'unel yu'unic scotol ti c'u s'elan caloje, xchi'uc scotol ti c'u s'elan chanubtasbilic cu'une, ti oy c'usi jbel tsots albil cu'une, xchi'uc ti nopbil cu'une, ti laj cac'beic ta sventa ti Moisese.”

⁹Ja'uc le' une, ti jnaclejetic yu'un Judae, xchi'uc ti Jerusalene, chanubtasatic ta stamel yan be yu'un ti Manasese, ti x'ech' to xjelav chopolil c'usitic lic spasique, ti ja' mu sta ti yan jteclumetic ti laj yilic ta sba ta satic ti israeletic ti tsutsesatic ta j'ech'el yu'un ti Diose.

¹⁰Ti Diose laj to sc'opon ti Manasese, xchi'uc ti steclumale. Mi ja'uc xa laj xchiquintabeic ti sc'ope.

¹¹Jech o xal ti Dios une laj stacbe talel ta stojolic ti banquilal soldadoetic yu'un ajvalil Asiriae, ti laj stic'beic xot-xot taq'uin ta sni' ti Manasese, ti chucbil bat ta c'anal carina taq'uin ti ic'bil bat yu'unic c'alal to Babiloniae.

¹²Ja'uc le' une, c'alal yacal xa ta xich' ti svocole, xvocolet liquel ta stojol ti Ajvalil Dios yu'une. Biq'uit xa laj yac' sba ta stojol Dios yu'un ti smolmuc'totaque.

¹³C'alal c'opoj ti'in ta stojol ti Dios yu'une, chiquintabat, a'yibat ti sc'op ti xvocolet ta stojole. Aq'ue sutuc ech'el ta Jerusalén ta sventainel yabtel ti ochem ta ajvalile. Va'i ti Manasés une, ja' to laj sna' ti Dios ja' Ajvalile.

¹⁴Ech' taj une, ti Manasese lic smeltsanbe smocal spat Steclumal ti David ta yeloval sloq'ueb c'ac'al yu'un ti Gihone, ti ech' yu'un ta uc'ume, ti c'ot c'alal ti' moc ti sbiinoj Stsacobil Choye, xchi'uc laj sjoyobta ta maquel ti Ofel sbie, ti toyol laj smeltsan ta j'ech'ele. Laj sva'anan banquilal soldadoetic ta scotol ti nac'obbail jteclumetic ta yosilal Judae.

¹⁵Ma'uc no'ox taje, laj sjipan loq'uel ta xch'ulna Dios ti bisbilic ta diosetique, ti loc'obbailetique, jech c'u cha'al ti altaretic ti ma'uc c'otem ta sventa Dios ti laj smeltsanan ta svitsal yosilal ti ch'ulnae, xchi'uc ta sjunul ti Jerusalene, ti laj sten loq'uel ta jteclume.

¹⁶Ts'acal to un, lic xcha'meltsanbe yaltar ti Diose. Lic yac' ta sba ti milbil matanal sventa lajesobil o'ntonale, xchi'uc ti matanal sventa coliyale. Laj yalbe ya'i mantal ti jteclum Judá ti liquicuc ta xch'unel ta xi'tael ti Diose, Ajvalil yu'un ti Israele.

¹⁷Manchuc mi jech un, ti jteclume staoj yav ta xaq'uic chic'bil matanal ta altaretic ti ma'uc c'otem ta sventa ti Diose, ac'o mi c'otem ta sventa Ajvalil ti Dios yu'unic ti yalojique.

¹⁸Ti slo'il ya'yejal ti Manasese, ti laj yalbe vocol ti Diose, ti c'usitic albat ta jamal yu'un ti j'alc'opetic ta sventa ti Ajvalil Dios yu'unic ti Israeletique, ts'ibabil com ta slo'il ya'yejal ti ajvaliletic yu'un Israele.

¹⁹Ti c'u s'elan tac'bat talel yu'un Dios ti c'alal laj sta ta c'oponele, scotol ya'yejal ti smul ti c'alal yanijem ti yo'ntone, ti laj smeltsanan ti ch'ulnaetic ti ma'uc ta sventa ti Diose, ti bu laj sva'anan sloc'obbail ti Aserae, xchi'uc ti yan meltsanbil diosetic ti c'alal mu'yuc to ta sbic'tajes sba ta stojol ti Diose, ts'ibabil com ta slo'il ya'yej ti j'alc'opetic yu'une.

²⁰C'alal chame, laj smuquic ta yavil ts'unbil nichim ta sna ti c'otem ta spasob mantale. Ts'acal to un, ich'bat yabtel ta ajvalilal yu'un ti xnich'on ti Amón sbie.

²¹Yich'oj xa chib xcha'vinic (22) jabil c'alal och ta ajvalilal ti Amone, chib (2) no'ox jabil och ta ajvalil ta Jerusalén.

²²Ti c'usitic lic spas une, mu lecuc laj yil ta sba ta sat Diose, co'ol jech laj spas jech c'u cha'al laj spas ti Manasés ti stote. Lic sbic'tajes sba ta yich'el ta muc', ta xchic'bel smoton scotol ti loc'obbailetic ti laj smeltsan ti Manasés ti ja' stote.

²³Ja'uc le' une, mu'yuc laj sbic'tajes sba jech c'u cha'al laj spas ti Manasés ti ja' stote. C'ajomal no'ox lic sbusanbe sba ti svocole.

²⁴Lic paybatuc sc'oplal yu'un ti yaj'opisialtaque, ti laj smilic ta sna ti c'otem ta pasob mantal yu'une.

²⁵Ti jteclume laj smilic ec ti buch'u laj spaybeic sc'oplal ti ajvalil Amone. Ti xnich'on ti sbiinoj Josiase laj yich' yabtel ta ajvalilal yu'unic.